ଭଦ୍ରକ, ୨ା୯ (ସନାତନ ରାଉତ): ଭାବର ଠାକୁର କାଳିଆ ପାଖକୁ ରାଖୀ ପଠାଇ ଚର୍ଚ୍ଚାକୁ ଆସିଛନ୍ତି ଭଦ୍ରକ ଜିଲା ତିହିଡ଼ି ଅଞ୍ଚଳର ସାଇ ସୁକନ୍ୟା। ଜଗନ୍ନାଥ ଓ ବଳଭଦ୍ରଙ୍କୁ ନିଜର ବଡ଼ଭାଇ ମାନି ତିହିଡ଼ି ବ୍ଲକ ବାମନବିନ୍ଧା ଗ୍ରାମର ସଞ୍ଜୟ ମହାନ୍ତିଙ୍କ ଝିଅ ତଥା ଷଷ୍ଠ ଶ୍ରେଣୀ ଛାତ୍ରୀ ସାଇ ସୁକନ୍ୟା(୧୧) ସ୍ନେହରେ ଶ୍ରୀମନ୍ଦିର କାର୍ଯ୍ୟାଳୟକୁ ଡାକ ଯୋଗେ ରାଖୀ ପଠାଇଥିଲେ। ରାଖୀ ସହ ୫୦୦ ଟଙ୍କା ପଠାଇ ମୋ ବଡ଼ ଭାଇମାନଙ୍କୁ ରାଖୀ ବାନ୍ଧି ମୁଁ ଦେଇଥିବା ଟଙ୍କାରେ ମିଠା କିଣି ଖାଇବାକୁ ଦେବାକୁ ସେ ଚିଠିରେ ଲେଖିଥିଲେ। ରାଖୀ ପାଇବା ପରେ ଶ୍ରୀମନ୍ଦିର କାର୍ଯ୍ୟାଳୟ ପକ୍ଷରୁ ଏହାକୁ ଗ୍ରହଣ କରାଯାଇଛି ବୋଲି ପ୍ରଶାସନ ପକ୍ଷରୁ ଏକ ଧନ୍ୟବାଦ ପତ୍ର ଶୁକ୍ରବାର ସାଇ ସୁକନ୍ୟାଙ୍କ ପାଖକୁ ଆସିଛି। ବଡ଼ଠାକୁରଙ୍କ ଆଶୀର୍ବାଦ ସ୍ବରୂପ ନିର୍ମାଲ୍ୟ, ରଥ ଦଉଡ଼ି ଓ ରଥକାଠ ତାଙ୍କ ପାଖକୁ ପଠାଯାଇଛି। ଆପଣ ପଠାଇଥିବା ରାଖୀ ହସ୍ତଗତ ହୋଇଛି। ବଡ଼ଠାକୁର ବଳଭଦ୍ର ଓ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଲାଗି କରାଯିବା ପାଇଁ ଆବଶ୍ୟକ ପଦକ୍ଷେପ ନିଆଯାଇଛି ବୋଲି ଆସିଥିବା ଚିଠିରେ ଉଲ୍ଲେଖ ରହିଛି।
