ନୂଆଦିଲ୍ଲୀ,୯।୧୨(ପି.ଟି.): ବ୍ୟାଟ୍ସମ୍ୟାନମାନେ କାମଚଳା ବୋଲିଂ କରିବା ଦଳ ପାଇଁ ଗୁରୁତ୍ୱପୂର୍ଣ୍ଣ ବୋଲି ପୂର୍ବତନ କ୍ରିକେଟର ସୁରେଶ ରାଇନା କହିଛନ୍ତି। ପୂର୍ବରୁ ଏଭଳି ଉଦାହରଣ ରହିଥିଲା। ତେବେ ବର୍ତ୍ତମାନ ଭାରତୀୟ ଦଳରେ ଏହା ପରିଲକ୍ଷିତ ହେଉନାହିଁ । ପିଠିରେ ଅସ୍ତ୍ରୋପଚାର କରାଇଥିବାରୁ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏବେ ବୋଲିଂ କରୁନାହାନ୍ତି। ତେଣୁ ଭାରତ ନିକଟରେ ଷଷ୍ଠ ବୋଲିଂ ବିକଳ୍ପ ନାହିଁ। ସଦ୍ୟ ସମାପ୍ତ ଅଷ୍ଟ୍ରେଲିଆ ବିପକ୍ଷ ସୀମିତ ଓଭର ସିରିଜରେ ଭାରତୀୟ ଦଳ ପାଇଁ ଷଷ୍ଠ ବୋଲରଙ୍କ ବିକଳ୍ପ ନାହିଁ।
ତେଣୁ ଜଣେ ବ୍ୟାଟ୍ସମ୍ୟାନ ବୋଲିଂ କରିବା ଓ ଜଣେ ବୋଲର ଭଲ ବ୍ୟାଟିଂ କରିବା ନିଶ୍ଚିତ ଭାବେ ଦଳ ପାଇଁ ଗୁରୁତ୍ୱପୂର୍ଣ୍ଣ ରାଇନା ଏକ କାର୍ଯ୍ୟକ୍ରମରେ ଯୋଗ ଦେଇ କହିଛନ୍ତି। ରାଇନା ପୂର୍ବରୁ ଅଫ୍ ବ୍ରେକ୍ ବୋଲିଂ କରି ବେଶ୍ ସଫଳତା ହାସଲ କରିଛନ୍ତି। ସେହିପରି କ୍ରିକେଟ ଆଇକନ ସଚିନ ତେନ୍ଦୁଲକର ମଧ୍ୟ ତାଙ୍କ କ୍ୟାରିୟରରେ ଏକାଧିକ ବାର ବୋଲିଂ କରି ଦଳକୁ ଜିତାଛନ୍ତି। ପୂର୍ବତନ ଓପନର ବୀରେନ୍ଦ୍ର ସେହ୍ବାଗ ମଧ୍ୟ ନିୟମିତ ଭାବେ ବୋଲିଂ କରିବାର ଉଦାହରଣ ରହିଛି। ଏପରିକି ଯୁବରାଜ ସିଂ ବିଶ୍ୱକପ୍ରେ ଦୃଷ୍ଟାନ୍ତମୂଳକ ବୋଲିଂ କରି ଭାରତକୁ ଜିତାଇଥିଲେ। ସେହିପରି ବୋଲରମାନେ ମଧ୍ୟ ବେଳେ ବେଳେ ଉପଯୋଗୀ ବ୍ୟାଟିଂ କରିବା ଜରୁରୀ ବୋଲି ବୋଲି ୩୪ ବର୍ଷୀୟ ରାଇନା କହିଛନ୍ତି।
