ପାରାଦୀପ,୨୨ା୯(ସ୍ବ.ପ୍ର.): ପାରାଦୀପ ଡେଭଲେପମେଣ୍ଟ ଅଥରିଟି (ପିଡିଏ)ପକ୍ଷରୁ ନିମିଢି ମୌଜାଠାରେ ୨୦୦୦ମସିହାରୁ ଏକ ଟାଉନସିପ ପାଇଁ ଜାଗା ବଣ୍ଟନ କରାଯାଇଛି। ସମୁଦାୟ ୯୨ ପ୍ଲଟ ବିଭିନ୍ନ ଲୋକ ନେଇଛନ୍ତି। ସେଥିରୁ ୩୫ ଜଣ ଘର କରି ଦୀର୍ଘବର୍ଷ ହେଲା ରହୁଛନ୍ତି। ଏହା ମଧ୍ୟରେ ୨୨ବର୍ଷ ଅତିକ୍ରାନ୍ତ କରିଥିଲେ ହେଁ ଏ ପର୍ଯ୍ୟନ୍ତ ସେମାନଙ୍କ ପାଇଁ ରାସ୍ତା, ଡ୍ରେନ, ପାର୍କ, ଆବର୍ଜନା ପକାଇବାକୁ ଜାଗା ନାହିଁ। ଏ ସମ୍ପର୍କରେ ସେହି ଲୋକମାନେ ଏକାଧିକ ବାର ପିଡିଏକୁ ଲିଖିତ ଅଭିଯୋଗ କରୁଛନ୍ତି। କିନ୍ତୁ ସମାଧାନର ବାଟ ବାହାରୁନାହିଁ। ଅପରପକ୍ଷେ ଜଣାଯାଇଛି, ଯେତେବେଳେ ଲୋକ ଅଭିଯୋଗ କରୁଛନ୍ତି ସେତେବେଳେ ପିଡିଏ କର୍ତ୍ତୃପକ୍ଷ ବିଡିଓଙ୍କୁ ଲେଖୁଛନ୍ତି। ବିଡିଓ ସରପଞ୍ଚଙ୍କୁ ଲେଖୁଛନ୍ତି। ସରପଞ୍ଚ ଅର୍ଥ ନାହିଁ ବୋଲି ଚୁପଚାପ ରହୁଛନ୍ତି। ଏଭଳି ସେମିତି ଏକ ଚିଠି ଏବେ ହସ୍ତଗତ ହୋଇଛି। ଗତ ଏପ୍ରିଲ ୪ରେ ପିଡିଏ ଟାଉନସିପ ବାସିନ୍ଦା ଏକ ଚିଠି ପିଡିଏ ସଚିବଙ୍କୁ ଲେଖିଥିଲେ। ସଚିବ କାହ୍ନୁଚରଣ ଧିର ଉକ୍ତ ପ୍ରସଙ୍ଗ ଉପରେ କୁଜଙ୍ଗ ବିଡିଓ ସୌମଶ୍ରୀ ପାଣିଗ୍ରାହୀଙ୍କୁ ସେପ୍ଟେମ୍ବର ୫ ନଂ. ୩୬୯ରେ ଚିଠି କରିଛନ୍ତି। ସେଥିରେ ଦର୍ଶାଯାଇଛି, ପିଡିଏ ପ୍ଲଟ ଅଧୀନରେ ଥିବା ଜାଗାରେ ରାସ୍ତା ଡ୍ରେନ ଆଦି ବିଭିନ୍ନ ଉନ୍ନତିମୂଳକ କାର୍ଯ୍ୟ କରିବା ପାଇଁ ବିଡ଼ିଓ ପାଣିଗ୍ରାହୀ ଗତ ୯ ତାରିଖରେ ଗଡ ପଞ୍ଚାୟତ ସରପଞ୍ଚ ସସ୍ମିତା ବେହେରାଙ୍କୁ ଚିଠି ଲେଖିଛନ୍ତି। ସେଥିରେ ପିଡିଏ ଦେଇଥିବା ଚିଠି ସହିତ ଦର୍ଶାଇଛନ୍ତି, ଏହା ଯଦି ପଞ୍ଚାୟତ ଅର୍ଥରେ କରାଯାଇପାରିବ ତାହା ହେଲେ ଆଲୋଚନା କରିବାକୁ ସେ ପ୍ରସ୍ତାବ ଦେଇଛନ୍ତି। ସରପଞ୍ଚ ବେହେରାଙ୍କ ମତ ହେଲା ପଞ୍ଚାୟତ ପାଇଁ ଯେତିକି ଫଣ୍ଡ ଆସିଛି ତାହା ଆମର ଡିମାଣ୍ଡ କାମକୁ ନିଅଣ୍ଟ। ପିଡିଏ ଅଞ୍ଚଳ ପାଇଁ ଅର୍ଥ କୁଆଡୁ ଆସିବ। ସେ ତାଙ୍କର ବଜେଟରେ କାମ କରନ୍ତୁ। ପିଡିଏ ଅଫିସ ସୂତ୍ରରୁ ମିଳିଥିବା ସୂଚନା ଅନୁସାରେ, ୨୦୦୦ ମସିହାରେ ପ୍ଲଟ ଆବଣ୍ଟନ କରାଯାଇଥିଲା। ସେତେବେଳେ ୪ଟି ବର୍ଗରେ ଏହା ବଣ୍ଟନ ହୋଇଥିଲା। ସେସବୁ ହେଲା ଏଚଆଇଜି, ଏମ୍ଆଇଜି, ଏଲ୍ଆଇଜି, ଓ ଇଡବ୍ଲ୍ୟୁଏସ୍(ହାଆର ଇନ୍ଫର୍ମ ଗ୍ରୁପ, ମିଡିଲ ଇନଫର୍ମ ଗ୍ରୁପ, ଲୋୟର ଇନଫର୍ମ ଗ୍ରୁପ ଓ ଇକୋନୋମିକ୍ ୱିକର ସେକ୍ସନ) ଆଧାରରେ ଦିଆଯାଇଛି। ସେତେବେଳେ ରାସ୍ତା ଡ୍ରେନ ପାର୍କ ଆବର୍ଜନାସ୍ଥଳ ଆଦି କରାଯାଇଥିଲା। ପରବର୍ତ୍ତୀ ସମୟରେ କେତେକ ମୁଷ୍ଟିମେୟ ଲୋକ ପାର୍କ ପାଇଁ ଉଦିଷ୍ଟ ଜାଗାକୁ ଜବରଦଖଲ କରିବାରେ ଲାଗିଛନ୍ତି। ଏହା ବ୍ୟତିରେକ ୨୦୦୪ରେ ସେଠାରେ ବାଲି ଉତ୍ତୋଳନକୁ ନେଇ ବିବାଦ ଉପୁଜିଥିଲା। ଯାହା ଏ ପର୍ଯ୍ୟନ୍ତ ଅସମାହିତ ରହିଛି। ଲୋକଙ୍କ ସମସ୍ୟା ସମ୍ପର୍କରେ ପିଡିଏ ସଚିବ ଧିରଙ୍କୁ ପଚାରିବାରେ ସେ କୌଣସି ଉତ୍ତର ଦେଇ ନ ଥିଲେ।
