ନୂଆଦିଲ୍ଲୀ,୧୫।୯: ଅକ୍ଟୋବରରୁ ଡିସେମ୍ବର ମଧ୍ୟରେ ଉତ୍ତର ଭାରତ ମହାସାଗର, ବିଶେଷକରି ବଙ୍ଗୋପସାଗର ଓ ଆରବ ସାଗରରେ ଘୂର୍ଣ୍ଣିିଝଡ଼ କାର୍ଯ୍ୟକଳାପ ବଢ଼ିବାର ସମ୍ଭାବନା ରହେ। ଏହି ସମୟକୁ ଭାରତର ଘୂର୍ଣ୍ଣିିଝଡ଼ ଋତୁର ଏକ ପ୍ରମୁଖ ପର୍ଯ୍ୟାୟ ବୋଲି ମଧ୍ୟ ଧରାଯାଏ। ବଙ୍ଗୋପସାଗର ଓ ଆରବ ସାଗରରେ ସୃଷ୍ଟି ହେଉଥିବା ଉଷ୍ଣମଣ୍ଡଳୀୟ ଘୂର୍ଣ୍ଣିିଝଡ଼ର ପ୍ରଭାବ ଭାରତର ପୂର୍ବ ଓ ପଶ୍ଚିମ ଉପକୂଳରେ ପଡ଼ିପାରେ। ତେଣୁ ଉପକୂଳବର୍ତ୍ତୀ ଅଞ୍ଚଳରେ ପ୍ରଶାସନକୁ ଆଗୁଆ ପ୍ରସ୍ତୁତି ରଖିବା ଜରୁରୀ। ବଙ୍ଗୋପସାଗରରେ ଘୂର୍ଣ୍ଣିିଝଡ଼ ସୃଷ୍ଟି ହେଲେ ଓଡ଼ିଶା, ପଶ୍ଚିମବଙ୍ଗ ଓ ଆନ୍ଧ୍ରପ୍ରଦେଶ ଉପକୂଳ ପ୍ରଭାବିତ ହେବାର ଆଶଙ୍କା ରହେ। ସେହିପରି ଆରବ ସାଗରରେ ସୃଷ୍ଟି ହେଉଥିବା ପ୍ରଣାଳୀର ପ୍ରଭାବ କର୍ନାଟକ, କେରଳ ଓ ତାମିଲନାଡୁ ସମେତ ଦକ୍ଷିଣ ଓ ପଶ୍ଚିମ ଉପକୂଳରେ ପଡ଼ିପାରେ। ତେବେ କୌଣସି ଘୂର୍ଣ୍ଣିିଝଡ଼ କେଉଁଠାରେ ଲ୍ୟାଣ୍ଡଫଲ କରିବ କିମ୍ବା କେତେ ତୀବ୍ର ହେବ, ତାହା ଅନେକ ଦିନ ପୂର୍ବରୁ ନିଶ୍ଚିତ ଭାବେ କହିହେବ ନାହିଁ। ଚକ୍ରବାତର ଗତିପଥ ଓ ତୀବ୍ରତା ସମୁଦ୍ରର ତାପମାତ୍ରା, ପବନର ଗତି ଓ ଦିଗ ଭଳି ବିଭିନ୍ନ ପାଣିପାଗୀୟ ପରିସ୍ଥିତି ଉପରେ ନିର୍ଭର କରେ। ଶକ୍ତିଶାଳୀ ଘୂର୍ଣ୍ଣିିଝଡ଼ ସମୟରେ ଭୀଷଣ ବର୍ଷା, ଝଡ଼ ପବନ ଓ ସମୁଦ୍ରରେ ବଡ଼ ବଡ଼ ଲହଡ଼ି ସୃଷ୍ଟି ହୋଇପାରେ। ଉପକୂଳ ଅଞ୍ଚଳରେ ପାଣି ଜମିବା ସହ ବନ୍ୟା ପରିସ୍ଥିତି ମଧ୍ୟ ଦେଖାଦେଇପାରେ। ଏହାର ପ୍ରଭାବରେ ଘର, ରାସ୍ତା, ବିଦ୍ୟୁତ୍ ଯୋଗାଣ ଓ ଯାତାୟାତ ବ୍ୟବସ୍ଥା ପ୍ରଭାବିତ ହେବାର ଆଶଙ୍କା ରହେ। ବିଶେଷ କରି ମତ୍ସ୍ୟଜୀବୀ, ଜାହାଜ ଚଳାଚଳ ଏବଂ ଉପକୂଳ ଅଞ୍ଚଳର ଲୋକଙ୍କ ପାଇଁ ଏଭଳି ସମୟରେ ସତର୍କତା ଜରୁରୀ। ପାଣିପାଗ ବିଶେଷଜ୍ଞଙ୍କ ମତରେ, ସମୁଦ୍ରରେ ଘୂର୍ଣ୍ଣିିଝଡ଼ ସୃଷ୍ଟି ହେବା ପରେ ହିଁ ଏହାର ଗତିପଥ ଓ ତୀବ୍ରତା ସମ୍ପର୍କରେ ଅଧିକ ସଠିକ ଆକଳନ କରାଯାଇପାରେ। ଅନେକ ସମୟରେ ଚକ୍ରବାତ ଲ୍ୟାଣ୍ଡଫଲ ପୂର୍ବରୁ ଗତିପଥ ବଦଳାଇ ଦୁର୍ବଳ ହୋଇ ସମୁଦ୍ରରେ ହିଁ ଶେଷ ହୋଇଯାଏ। ତେଣୁ ଘୂର୍ଣ୍ଣିିଝଡ଼ ସମ୍ପର୍କରେ ସୋସିଆଲ ମିଡିଆ କିମ୍ବା ଅନ୍ୟ ଅନଧିକୃତ ରିପୋର୍ଟ ଉପରେ ଭରସା ନକରି ଭାରତୀୟ ପାଣିପାଗ ବିଭାଗ (IMD)ର ଅଧିକାରିକ ବୁଲେଟିନ ଓ ସତର୍କ ସୂଚନା ଉପରେ ନଜର ରଖିବା ଉଚିତ। IMD ଚକ୍ରବାତ ସୃଷ୍ଟି ହେଲେ ଏହାର ଗତିପଥ, ତୀବ୍ରତା, ସମ୍ଭାବ୍ୟ ଲ୍ୟାଣ୍ଡଫଲ ଓ ବର୍ଷା-ପବନ ସମ୍ପର୍କରେ ନିୟମିତ ବୁଲେଟିନ ଜାରି କରିଥାଏ।
