ବରଗଡ଼ ଅଫିସ୍,୨୯।୧୨: ବରଗଡ଼ ଜିଲା ଅମ୍ବାଭୋନା ବ୍ଳକ ଅନ୍ତର୍ଗତ ଝାରପାଲି ଗ୍ରାମର ନିହାର ରଞ୍ଜନ ପ୍ରଧାନ ଇସ୍ରୋର ବୈଜ୍ଞାନିକ ଭାବେ ସୁଯୋଗ ପାଇଛନ୍ତି। ସେ ଆସନ୍ତା ଜାନୁୟାରୀରେ ଇସ୍ରୋରେ ଯୋଗଦେବେ ବୋଲି କହିଛନ୍ତି। ମା’ ପଙ୍କଜିନୀ, ବାପା ରାଜକୁମାରଙ୍କ ସାନପୁଅ ନିହାର ଏକ ଚାଷୀ ପରିବାରର। ସେ ପିଲାବେଳୁ ନୂତନ ଜିନିଷ ତିଆରି କରିବାରେ ଆଗ୍ରହ ପ୍ରକାଶ କରୁଥିଲେ ।
ସେ ଗାଁ ସ୍କୁଲରେ ପ୍ରଥମରୁ ସପ୍ତମ ଶ୍ରେଣୀ ପାଠ ପଢ଼ିଥିବା ବେଳେ ଅମ୍ବାଭୋନାସ୍ଥିତ କେଦାରନାଥ ଆଦିବାସୀ ହାଇସ୍କୁଲରେ ଅଷ୍ଟମରୁ ଦଶମ ଶ୍ରେଣୀ ପର୍ଯ୍ୟନ୍ତ ପଢ଼ିଥିଲେ। ପରେ ବରଗଡ଼ ସ୍ଥିତ ବିକାଶ ଜୁନିୟର କଲେଜରେ ଯୁକ୍ତଦୁଇ ବିଜ୍ଞାନରେ ନାମ ଲେଖାଇ ଥିଲେ । ଜେଇଇ ମେନ୍ସ ଏବଂ ଆଡଭାନ୍ସ ଫଳାଫଳକୁ ନେଇ ଇଣ୍ଡିଆନ ଇନ୍ଷ୍ଟିଚ୍ୟୁଟ୍ ଅଫ୍ ସ୍ପେଶ ସାଇନ୍ସ ଆଣ୍ଡ୍ ଟେକ୍ନୋଲୋଜି(ଆଇଆଇଏସ୍ଟି)ର ଏରୋସ୍ପେଶ ଇଞ୍ଜିନିୟରିଂ ବିଭାଗରେ ବି-ଟେକ୍ ପାଇଁ ଆଡମିଶନ କରିଥିଲେ। ଚଳିତ ବର୍ଷ ଗ୍ରାଜୁଏଶନ ଶେଷ ହୋଇଥିଲା। ଆଇଆଇଏସ୍ଟି-ଅବଜର୍ପଶନରେ ଦକ୍ଷତା ଥିବାରୁ ତାଙ୍କୁ ଇସ୍ରୋର ବୈଜ୍ଞାନିକଭାବେ ମନୋନୀତ କରିଥିବା ନିହାର କହିଛନ୍ତି । ମା’ ବାପା, ଭାଇ, ଭଉଣୀ ତାଙ୍କୁ ଚାପ ମୁକ୍ତ ବାତାବରଣରେ ମନ ପସନ୍ଦର ବିଷୟ ପଢ଼ିବାର ସୁଯୋଗ ଦେଇଥିବାରୁ ଏଭଳି ସଫଳତା ମିଳିଛି ବୋଲି ସେ ପ୍ରକାଶ କରିଛନ୍ତି ।
