ଶ୍ରୀନଗର,୧୮।୪ : ପାକିସ୍ତାନୀ ଗୁପ୍ତଚର ଏଜେନ୍ସି ଆଇଏସଆଇ ଜମ୍ମୁ-କଶ୍ମୀରରେ ଆତଙ୍କବାଦକୁ ସୁଦୃଢ଼ କରିବାକୁ ଚେଷ୍ଟା କରୁଛି। ଆତଙ୍କବାଦୀ ସଂଗଠନରେ ମିଳିତ ଭାବେ ରାଜ୍ୟରେ ମହିଳା ଓଭରଗ୍ରାଉଣ୍ଡ ଏବଂ ଅଣ୍ଡରଗ୍ରାଉଣ୍ଡ କର୍ମୀଙ୍କ ନେଟୱାର୍କକୁ ସକ୍ରିୟ କରିବାକୁ ଷଡ଼ଯନ୍ତ୍ର କରାଯାଇଛି। ଏହା ସହିତ ଆଇଏସଆଇ ପିଓକେର ମୁରିଦକେ ନିକଟରେ ଏକ ଆତଙ୍କବାଦୀ ତାଲିମ ଶିବିର ଚଳାଉଛି। ଯେଉଁଠାରେ ମହିଳାମାନଙ୍କୁ ଆତଙ୍କବାଦ ଉପରେ ସ୍ବତନ୍ତ୍ର ତାଲିମ ଦିଆଯାଉଛି ।
ଜମ୍ମୁ-କଶ୍ମୀରରେ ଆତଙ୍କବାଦୀଙ୍କ ବିରୋଧରେ ହେଉଥିବା ଲଗାତାର ଦମନମୂଳକ କାର୍ଯ୍ୟକ୍ରମରେ ରାଗିଯାଇ ପାକିସ୍ତାନ ଆତଙ୍କବାଦକୁ ବିସ୍ତାର କରିବା ପାଇଁ ଏକ ନୂଆ ଯୋଜନା ପ୍ରସ୍ତୁତ କରୁଛି ବୋଲି ଭାରତୀୟ ଗୁପ୍ତଚର ଏଜେନ୍ସି ପକ୍ଷରୁ କୁହାଯାଇଛି। ମହିଳାମାନଙ୍କ ମାଧ୍ୟମରେ ଜମ୍ମୁ-କଶ୍ମୀରରେ ଆତଙ୍କବାଦ ବିସ୍ତାର କରିବାକୁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯାଇଛି।
ଉଲ୍ଲେଖନୀୟ କଥା ହେଉଛି, ଜମ୍ମୁ-କଶ୍ମୀରରେ ଓଭରଗ୍ରାଉଣ୍ଡ ଏବଂ ଅଣ୍ଡରଗ୍ରାଉଣ୍ଡ ସଦସ୍ୟମାନେ ଆତଙ୍କବାଦୀଙ୍କ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ପ୍ରତ୍ୟେକ ଆତଙ୍କବାଦୀ କାର୍ଯ୍ୟକଳାପ ପାଇଁ ସେମାନେ ଆତଙ୍କବାଦୀଙ୍କୁ ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରିଥାନ୍ତି । ରାଜ୍ୟରେ ଓଭରଗ୍ରାଉଣ୍ଡ ଏବଂ ଅଣ୍ଡରଗ୍ରାଉଣ୍ଡ ସମସ୍ୟ ଭାବେ ଆଇଏସଆଇ କେବଳ ସେହି ମହିଳାମାନଙ୍କୁ ପ୍ରାଥମିକତା ଦେଉଛି ଯେଉଁମାନଙ୍କର ପରିବାର ସଦସ୍ୟ ଆତଙ୍କବାଦୀ କାର୍ଯ୍ୟକଳାପରେ ଜଡିତ ଅଛନ୍ତି କିମ୍ବା ଯେଉଁମାନେ ସିଧାସଳଖ ଆତଙ୍କବାଦୀଙ୍କ ସହ ଜଡିତ ଅଛନ୍ତି। ସୂତ୍ରରୁ ପ୍ରକାଶ ଓଭରଗ୍ରାଉଣ୍ଡ ଏବଂ ଅଣ୍ଡରଗ୍ରାଉଣ୍ଡ ସଦସ୍ୟଙ୍କ ମାଧ୍ୟମରେ ବର୍ତ୍ତମାନ ଆଇଏସଆଇ ଚାହୁଁଛି, ସେମାନେ ରାଜ୍ୟରେ ଆଇଇଡି ଷ୍ଟିକି ବୋମା ଲଗାନ୍ତୁ।
ସମ୍ପ୍ରତି ପାକିସ୍ତାନ କ୍ରମାଗତ ଭାବରେ ଡ୍ରୋନ ମାଧ୍ୟମରେ ଜମ୍ମୁ-କଶ୍ମୀରକୁ ଆଇଇଡି ଷ୍ଟିକି ବୋମା ପଠାଉଛି। ଏସବୁକୁ ସ୍ଥାପନ କରିବା ଅତି ସହଜ। ଡ୍ରୋନ ମାଧ୍ୟମରେ ପାକିସ୍ତାନ ଦ୍ୱାରା ପଠାଯାଇଥିବା ଏହି ବୋମା ଦୁଇଟି ତାରକୁ ସଂଯୋଗ କରି ସକ୍ରିୟ କରାଯାଇପାରିବ। ଯାହା ମହିଳାମାନେ ସହଜରେ କରିପାରିବେ।
ଏହି କାର୍ଯ୍ୟ ପାଇଁ ମହିଳାମାନେ ଆଇଏସଆଇର ପ୍ରଥମ ପସନ୍ଦ କାରଣ ସୁରକ୍ଷା ବାହିନୀ ସାଧାରଣତଃ ମହିଳାମାନଙ୍କୁ ସନ୍ଦେହ କରନ୍ତି ନାହିଁ। ଏହି ପ୍ରଶିକ୍ଷଣରେ, ମହିଳାମାନଙ୍କୁ ଧାର୍ମିକ ଶିକ୍ଷା ସହିତ ଅସ୍ତ୍ରଶସ୍ତ୍ର ପରିଚାଳନା ତାଲିମ ଏବଂ ଆଇଡି ସକ୍ରିୟ କରିବା ତଥା ଏହାକୁ ପ୍ରୟୋଗ କରିବା ଶିକ୍ଷା ମଧ୍ୟ ଦିଆଯାଉଛି। ଏହା ପଛରେ ପାକିସ୍ତାନର ଉଦ୍ଦେଶ୍ୟ ହେଉଛି ତାଲିମ ପରେ ଏହି ମହିଳାମାନଙ୍କୁ ଜମ୍ମୁ-କଶ୍ମୀରରେ କାର୍ଯ୍ୟ କରୁଥିବା ଆତଙ୍କବାଦୀଙ୍କ ସ୍ତ୍ରୀ କିମ୍ବା ସମ୍ପର୍କୀୟ କରି ପଠାଇ ପାରିବ। ଯେଉଁଠାରେ ଏହି ମହିଳାମାନେ ନିଜର ନେଟୱାର୍କ ସ୍ଥାପନ କରିପାରିବେ।
