ନୂଆଦିଲ୍ଲୀ, ୧୫।୩ – ଅନ୍ତର୍ଜାତୀୟ ସ୍ତରରେ ପଦାର୍ପଣ ମ୍ୟାଚ୍ରେ ହିଁ ବିସ୍ଫୋରକ ଅର୍ଦ୍ଧଶତକୀୟ ଇନିଂସ ଖେଳିଛନ୍ତି ଇଶାନ କିଷାନ। ଏଥି ନେଇ ତାଙ୍କୁ ପ୍ରଶଂସା କରିଛନ୍ତି ବହୁ କିମ୍ବଦନ୍ତୀ ଭାରତୀୟ ଖେଳାଳି। ଏପରି କି ଇଶାନଙ୍କୁ ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସହ ତୁଳନା କରିଛନ୍ତି ବୀରେନ୍ଦ୍ର ସେହ୍ବାଗ।
ପୂର୍ବତନ ଭାରତୀୟ ଓପନର ଟୁଇଟ୍ କରି ଲେଖିଛନ୍ତି, ଝାଡ଼ଖଣ୍ଡର ଯୁବ ଉଇକେଟକିପର ବ୍ୟାଟ୍ସମ୍ୟାନଙ୍କୁ ଟପ ଅର୍ଡରରେ ବ୍ୟାଟିଂ ମିଳିବା ଓ ସେ ଦକ୍ଷତାର ପରିଚୟ ଦେବା ନୂଆ କଥା ନୁହେଁ। ଏହା ପୂର୍ବରୁ ମଧ୍ୟ ଘଟିଛି। ବିନା ଡରରେ କିଷାନ ଯେଉଁ ଭଳି ଆଟାକିଂ ବ୍ୟାଟିଂ କଲେ, ତାହା ମୋତେ ଖୁବ୍ ପସନ୍ଦ ଆସିଲା। ଏଠାରେ ସେହ୍ବାଗ ଯୁବ ଓପନର କିଷାନଙ୍କୁ ଧୋନୀଙ୍କ ସହ ତୁଳନା କରିଛନ୍ତି। ଧୋନୀ ମଧ୍ୟ ତାଙ୍କ କ୍ୟାରିୟରର ପ୍ରାରମ୍ଭିକ କିଛି ମ୍ୟାଚ୍ ଫେଲ ହେବା ପରେ ପାଇଥିଲେ ଟପ୍ ଅର୍ଡରରେ ବ୍ୟାଟିଂ କରିବାର ସୁଯୋଗ। ପାକିସ୍ତାନ ବିପକ୍ଷରେ ସେ ଖେଳିଥିଲେ ବିସ୍ଫୋରକ ଶତକୀୟ ଇନିଂସ, ଯାହା ତାଙ୍କୁ ଅନ୍ତର୍ଜାତୀୟ କ୍ରିକେଟରେ ଦେଇଥିଲା ପରିଚୟ। ସେହ୍ବାଗଙ୍କ ବ୍ୟତୀତ ଯୁବରାଜ ସିଂ, ଭିଭିଏସ୍ ଲକ୍ଷ୍ମଣ, ଇର୍ଫାନ ପଠାନ, ମହମ୍ମଦ କୈଫ, ଆର.ପି. ସିଂଙ୍କ ଭଳି ପୂର୍ବତନ ଭାରତୀୟ ଖେଳାଳି ଇଶାନଙ୍କୁ ପ୍ରଶଂସା କରିଛନ୍ତି।
