ବୋର୍ଡ ଅଫ କଣ୍ଟ୍ରୋଲ ଫର କ୍ରିକେଟ ଇନ ଇଣ୍ଡିଆ (ବିସିସିଆଇ) କରୋନା ଭାଇରସ ମହାମାରୀ ହେତୁ ଇଣ୍ଡିଆନ ପ୍ରିମିୟର ଲିଗ ୨୦୨୧ (ଆଇପିଏଲ)କୁ ଅର୍ନିଦ୍ଦିଷ୍ଟ କାଳ ପାଇଁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି। ବିସିସିଆଇର ନିଷ୍ପତ୍ତିର କିଛି ଘଣ୍ଟା ପରେ ଅଷ୍ଟ୍ରେଲୀୟ କ୍ରିକେଟର ତଥା ପୂର୍ବତନ ସନରାଇଜର୍ସ ହାଇଦ୍ରାବାଦ ଅଧିନାୟକ ଡେଭିଡ ୱାର୍ନର ତାଙ୍କ ଅଫିସିଆଲ ଇନଷ୍ଟାଗ୍ରାମରେ ଏକ ଭାବପ୍ରବଣ ବାର୍ତ୍ତା ଶେୟାର କରିଛନ୍ତି। ଆଇପିଏଲ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରହିବା ପରେ ଡେଭିଡ ୱାର୍ନର ସୋସିଆଲ ମିଡିଆରେ ତାଙ୍କ ୩ ଝିଅଙ୍କ ଦ୍ୱାରା ପ୍ରସ୍ତୁତ ଏକ ସ୍କଚ ଶେୟାର କରିଛନ୍ତି। ଏହି ସ୍କେଚରେ ୱାର୍ଣ୍ଣରଙ୍କ ଝିଅ ଲେଖିଛନ୍ତି – ଦୟାକରି ବାପା … ଶିଘ୍ର ଘରକୁ ଆସ । ଆମେ ତୁମକୁ ବହୁତ ମିସ୍ କରୁଛୁ ଏବଂ ଆମେ ତୁମକୁ ବହୁତ ଭଲପାଉ। ଆଇଭି, ଇଣ୍ଡି ଏବଂ ଇସଲା ଠାରୁ ପ୍ରେମ। ଏହି ସ୍କେଚ ଶେୟାର କରି ଡେଭିଡ ୱାର୍ଣ୍ଣର କ୍ୟାପସନ ଦେଇଛନ୍ତି- ମୋର ପ୍ରିୟ ଆଇଭି, ତୁମକୁ ବହୁତ ଭଲ ପାଇବା। ୱାର୍ଣ୍ଣରଙ୍କ ଝିଅଙ୍କ ଏହି ସ୍ପର୍ଶକାତର ପୋଷ୍ଟ ଆଇପିଏଲ ସ୍ଥଗିତ ହେବା ପରେ ଆସିଥିଲା। ତାଙ୍କ ଏହି ପୋଷ୍ଟକୁ ପ୍ରଶଂସକମାନେ ବହୁତ ପସନ୍ଦ କରିଛନ୍ତି।
ସନରାଇଜର୍ସ ହାଇଦ୍ରାବାଦର ଶେଷ ମ୍ୟାଚରେ ଦଳର ଅଧିନାୟକତ୍ୱରୁ ଡେଭିଡ ୱାର୍ନରଙ୍କୁ ହଟାଇ ଦିଆଯାଇଥିଲା। ତାଙ୍କ ସ୍ଥାନରେ କେନ ୱିଲିୟମସନ ହାଇଦ୍ରାବାଦର ନୂତନ ଅଧିନାୟକ ଭାବରେ ଦାୟିତ୍ୱ ଦିଆଯାଇଥିଲା। ସୋସିଆଲ ମିଡିଆରେ ବିଶେଷ କରି ଭାରତରେ ଡେଭିଡ ୱାର୍ନରଙ୍କର ବହୁତ ପ୍ରଶଂସକ ଅଛନ୍ତି। ତାଙ୍କୁ ମଧ୍ୟଭାଗରେ ଅଧିନାୟକତ୍ୱରୁ ହଟାଇଥିବାରୁ ପ୍ରଶଂସକମାନେ ସୋସିଆଲ ମିଡିଆରେ ଅସନ୍ତୋଷ ବ୍ୟକ୍ତ କରିଥିଲେ। ରାଜସ୍ଥାନ ରୟାଲ୍ସ ବିପକ୍ଷରେ କେନ ୱିଲିୟମସନଙ୍କ ଅଧିନାୟକତ୍ୱରେ ସନରାଇଜର୍ସ ହାଇଦ୍ରାବାଦ ୫୫ ରନରେ ହାରିଥିଲା। ଏହି ମ୍ୟାଚ୍ରେ ଡେଭିଡ ୱାର୍ଣ୍ଣର ଖେଳୁଥିବା ଏକାଦଶରେ ମଧ୍ୟ ସ୍ଥାନ ପାଇପାରି ନ ଥିଲେ।
