ସିଡନୀ,୫।୫: ପୂର୍ବତନ ଅଷ୍ଟ୍ରେଲୀୟ କ୍ରିକେଟର ଷ୍ଟୁଆର୍ଟ ମ୍ୟାକଗିଲଙ୍କୁ ଅପହରଣ କରିନେଇଛନ୍ତି ଦୁର୍ବୃତ୍ତ। ଏହି ଘଟଣା ଗତ ମାସରୁ ହୋଇଛି। ଯେଉଁଠାରେ ମ୍ୟାକଗିଲଙ୍କୁ ତାଙ୍କ ସିଡନୀ ଘରୁ ଅପହରଣ କରାଯାଇଥିବା ଅଭିଯୋଗ ହୋଇଥିଲା। ଏପ୍ରିଲ ୧୪ରେ ନ୍ୟୁ ସାଉଥ ୱେଲ୍ସ ପୋଲିସ ଅପହରଣ ହୋଇଥିବା ପୀଡିତଙ୍କୁ ୫୦ ବର୍ଷୀୟ ବୟସ୍କ ମ୍ୟାକଗିଲ ବୋଲି ଚିହ୍ନଟ କରିଥିଲା। ମ୍ୟାକଗିଲଙ୍କୁ ତାଙ୍କ ଘରୁ କିଛି ବ୍ୟକ୍ତି ଉଠାଇ ନେଇଥିଲେ। ଏହି ମାମଲାରେ ସମ୍ପୃକ୍ତ ୪ ଜଣଙ୍କୁ ଗିରଫ କରିଛି ଅଷ୍ଟ୍ରେଲୀୟ ପୋଲିସ।
ଅଷ୍ଟ୍ରେଲୀୟ ପୂର୍ବତନ ଟେଷ୍ଟ ବୋଲରଙ୍କୁ ଦକ୍ଷିଣ-ପଶ୍ଚିମ ଏକ ସହରକୁ ନେଇଯାଇଥିବା ଜଣାପଡିଛି। ଏହା ପରେ ସ୍ଥାନଟି ପରିବର୍ତ୍ତନ କରାଯାଇଥିଲା। ମୁକ୍ତ ହେବା ପୂର୍ବରୁ ତାଙ୍କୁ ହତ୍ୟା ଧମକ ମଧ୍ୟ ଦିଆଯାଇଥିଲା। ମ୍ୟାକଗିଲଙ୍କ ଅପହରଣ ସମ୍ପର୍କରେ ସୂଚନା ଏପ୍ରିଲ ୨୦ରେ ପୋଲିସ କର୍ତ୍ତୃପକ୍ଷଙ୍କୁ ଦିଆଯାଇଥିଲା। ଏହା ପରେ ପୋଲିସ ସିଡନୀରେ ଥିବା କେତେକ ଘରେ ଚଢାଉ କରି ଚାରି ଜଣଙ୍କୁ ଗିରଫ କରିଥିଲା। ତେବେ ଗିରଫ ହୋଇଥିବା ବ୍ୟକ୍ତିଙ୍କ ନାମ ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ। ଏହି ଲୋକମାନଙ୍କର ବୟସ ପ୍ରାୟ ୨୭, ୨୯, ୪୨ ଏବଂ ୪୬ ଏବଂ ବୁଧବାର ସକାଳେ ସ୍ଥାନୀୟ ସମୟ ୬ଟା ସମୟରେ ସେମାନଙ୍କୁ ଗିରଫ କରାଯାଇଥିଲା।
ମ୍ୟାକଗିଲ ଜଣେ ପୂର୍ବତନ ଲେଗ-ସ୍ପିନ ବୋଲର। ୧୯୮୮ରୁ ୨୦୦୮ ମଧ୍ୟରେ ଅଷ୍ଟ୍ରେଲିଆ ପାଇଁ ୪୪ଟି ଟେଷ୍ଟ ମ୍ୟାଚରେ ୨୦୮ ଉଇକେଟ ନେଇଛନ୍ତି। ୧୯୮୮ରେ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ମ୍ୟାଚରୁ ମ୍ୟାକଗିଲ ଅନ୍ତର୍ଜାତୀୟ ଡେବ୍ୟୁ କରିଥିଲେ। ଏଥି ସହିତ ସେ ୨୦୦୮ରେ ୱେଷ୍ଟଇଣ୍ଡିଜ ବିପକ୍ଷରେ ତାଙ୍କର ଶେଷ ଅନ୍ତର୍ଜାତୀୟ ମ୍ୟାଚ ଖେଳିଥିଲେ।
