ଆଇପିଏଲ୍‌-୨୦୨୦: ଦିଲ୍ଲୀ-ମୁମ୍ବାଇ ଫାଇନାଲ

ଆବୁଧାବି :ଇଣ୍ଡିଆନ ପ୍ରିମିୟର ଲିଗ୍‌ର ରବିବାର ଅନୁଷ୍ଠିତ କ୍ୱାଲିଫାୟର-୨ରେ ସନ୍‌ରାଇଜର୍ସ ହାଇଦ୍ରାବାଦକୁ ୧୭ ରନରେ ହରାଇ ଦିଲ୍ଲୀ କ୍ୟାପିଟାଲ୍ସ ପ୍ରଥମଥରପାଇଁ ଫାଇନାଲରେ ପ୍ରବେଶ କରିଛି। ପ୍ରଥମେ ବ୍ୟାଟିଂ କରିଥିବା ଦିଲ୍ଲୀ ୨୦ ଓଭରରେ ୩ ଉଇକେଟ ହରାଇ ୧୮୯ ରନ କରିଥିଲା। ଜବାବରେ କେନ୍‌ ଓ୍ବିଲିୟମସନଙ୍କ ଲଢ଼ୁଆ ବ୍ୟାଟିଂ ସତ୍ତ୍ୱେ ସନ୍‌ରାଇଜର୍ସ ୨୦ ଓଭରରେ ୮ ଉଇକେଟ ହରାଇ ୧୭୨ ରନ କରିବାକୁ ସକ୍ଷମ ହୋଇଥିଲା। ପରାଜୟ ସହ ସନ୍‌ରାଇଜର୍ସର ଅଭିଯାନ ଏଠାରୁ ଶେଷ ହୋଇଛି। ଦିଲ୍ଲୀ ଫାଇନାଲରେ ମୁମ୍ବାଇ ଇଣ୍ଡିଆନ୍ସକୁ ଭେଟିବ। ହାଇ ପ୍ରୋଫାଇଲ୍‌ ଲିଗ୍‌ର ଫାଇନାଲ ମଙ୍ଗଳବାର ଦୁବାଇରେ ଖେଳାଯିବ। ଚଳିତ ଲିଗ୍‌ର କ୍ୱାଲିଫାୟର-୧ରେ ମୁମ୍ବାଇ ଓ ଦିଲ୍ଲୀ ମଧ୍ୟରେ ମୁକାବିଲା ହୋଇଥିଲା। ଏଥିରେ ମୁମ୍ବାଇ ଜିତି ଫାଇନାଲରେ ପ୍ରବେଶ କରିଥିଲା। ତେଣୁ ଦିଲ୍ଲୀ ନିକଟରେ ଏବେ ପରାଜୟର ମଧୁର ପ୍ରତିଶୋଧ ନେବା ସୁଯୋଗ ରହିଛି। ୨୦୧୬ରେ ଚାମ୍ପିୟନ ହୋଇଥିବା ସନ୍‌ରାଇଜର୍ସ ୨୦୧୮ରେ ରନର୍ସଅପ୍‌ ଏବଂ ୨୦୧୩, ୨୦୧୭ ଓ ୨୦୧୯ରେ ୪ର୍ଥ ସ୍ଥାନ ଅଧିକାର କରିଥିଲା। ୨୦୧୪ ଓ ୨୦୧୫ରେ ଏହି ଦଳ ୬ଷ୍ଠ ସ୍ଥାନ ପାଇଥିବାବେଳେ ଏଥର ୩ୟ ସ୍ଥାନରେ ସନ୍ତୁଷ୍ଟ ହୋଇଛି।
ଟସ୍‌ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ ଦିଲ୍ଲୀ ଅଧିନାୟକ ଶ୍ରେୟାସ ଆୟାର। ଶିଖର ଧାଓ୍ବନଙ୍କ ସହ ଇନିଂସ ଓପନ କରିଥିଲେ ମାର୍କୁସ ଷ୍ଟୋଇନିସ। ରଣନୀତି ବଢ଼ିଆ କାମ ଦେଇଥିଲା। ଦୁଇ ଓପନର ଆକ୍ରମଣାତ୍ମକ ବ୍ୟାଟିଂ କରି ପାଓ୍ବାରପ୍ଲେ ୬ ଓଭରରେ ଦଳୀୟ ସ୍କୋରକୁ ୬୫ରେ ପହଞ୍ଚାଇଥିଲେ। ୫୦ ବଲ୍‌ରୁ ୮୬ ରନ ସଂଗ୍ରହ ପରେ ଓପନିଂ ଯୋଡ଼ି ଭାଙ୍ଗିଥିଲା। ତାରକା ସ୍ପିନର ରଶିଦ ଖାଁ ସନ୍‌ରାଇଜର୍ସକୁ ଏହି ବ୍ରେକ୍‌ ଥ୍ରୁ ଦେଇଥିଲେ। ୨୭ଟି ବଲ୍‌ ଖେଳିଥିବା ଷ୍ଟୋଇନିସ ୫ ଚୌକା ଓ ୧ ଛକା ସହାୟତାରେ ୩୮ ରନ ସ୍କୋର କରି ରଶିଦଙ୍କ ବଲ୍‌ରେ କ୍ଲିନ୍‌ ବୋଲ୍ଡ ହୋଇଯାଇଥିଲେ। ୯.୪ ଓଭରରେ ଦିଲ୍ଲୀ ସ୍କୋର ୧୦୦ ଅତିକ୍ରମ କରିଥିଲା। ସେତେବେଳକୁ ଭେଟେରାନ ଧାଓ୍ବନ କ୍ୟାରିୟରର ୪୧ତମ ଆଇପିଏଲ ଅର୍ଦ୍ଧଶତକ ହାସଲ କରିସାରିଥିଲେ। ମଧ୍ୟଭାଗରେ ସନ୍‌ରାଇଜର୍ସ ବୋଲରମାନେ ଟାଇଟ୍‌ ବୋଲିଂ କରିଥିଲେ। ଫଳରେ ୧୦ରୁ ୧୫ ଓଭର ମଧ୍ୟରେ ଦିଲ୍ଲୀ ମାତ୍ର ୩୭ ରନ କରି ୧ ଉଇକେଟ ହରାଇଥିଲା। ଦ୍ୱିତୀୟ ଉଇକେଟରେ ଧାଓ୍ବନଙ୍କ ସହ ୪୦ ରନ ଯୋଡ଼ିବାପରେ ଆୟାର ବ୍ୟକ୍ତିଗତ ୨୧(୨୦ ବଲ, ୧ ଚୌକା) ରନ କରି ଆଉଟ ହୋଇଥିଲେ। ଶେଷଭାଗରେ ଧାଓ୍ବନ ଓ ଶିମରନ ହେଟମେର ଦ୍ରୁତ ହାରରେ ରନ ସଂଗ୍ରହ କରିଥିଲେ। ୧୮ ଓଭର ବେଳକୁ ଦିଲ୍ଲୀ ସ୍କୋର ୧୭୬/୨ ହୋଇଥିଲା। ତେବେ ୧୯ତମ ଓଭରରେ ଧାଓ୍ବନ ଆଉଟ ହୋଇଯିବାରୁ ଦିଲ୍ଲୀ ୨୦୦ର ନିକଟତର ହୋଇପାରି ନ ଥିଲା। ୫୦ଟି ବଲ୍‌ ଖେଳିଥିବା ଧାଓ୍ବନ ୬ ଚୌକା ଓ ୨ ଛକା ସହାୟତାରେ ୭୮ ରନ କରିଥିବାବେଳେ ସନ୍ଦୀପ ଶର୍ମାଙ୍କ ବଲ୍‌କୁ ରିଭର୍ସ ସୁଇପ୍‌ ଖେଳିବାକୁ ଯାଇ ବିଫଳ ହୋଇଥିଲେ। ତେବେ ଏହା ମଧ୍ୟରେ ସେ ଚଳିତ ଆଇପିଏଲ୍‌ରେ ୬୦୦ ରନ ପୂରଣ କରିଥିଲେ। ଶେଷ ୨ ଓଭରରୁ ମାତ୍ର ୧୩ ରନ ହୋଇ ପାରିଥିଲା। ହେଟମେର ୨୨ ବଲ୍‌ରୁ ଦ୍ରୁତ ୪୨(୪ ଚୌକା, ୧ ଛକା) ରନ କରି ଅପରାଜିତ ରହିଥିଲେ। ସନ୍‌ରାଇଜର୍ସ ପକ୍ଷରୁ ରଶିଦ ଖାଁ, ଜାସନ ହୋଲ୍ଡର, ସନ୍ଦୀପ ଶର୍ମା ଗୋଟିଏ ଲେଖାଏ ଉଇକେଟ ନେଇଥିଲେ।
ବୃହତ୍‌ ସ୍କୋର ବିଜୟ ଲକ୍ଷ୍ୟନେଇ ପଡ଼ିଆକୁ ଓହ୍ଲାଇଥିବା ସନ୍‌ରାଇଜର୍ସ ରବିଚନ୍ଦ୍ରନ ଅଶ୍ୱିନଙ୍କ ପ୍ରଥମ ଓଭରରୁ ୧୨ ରନ ସଂଗ୍ରହ କରିଥିଲେ ହେଁ ଦ୍ୱିତୀୟ ଓଭର ବୋଲିଂ କରିଥିବା କାଗିଶୋ ରାବାଡ଼ାଙ୍କ ପ୍ରଥମ ବଲ୍‌ରେ ଅଧିନାୟକ ଡେଭିଡ ଓ୍ବାର୍ନରଙ୍କ ଉଇକେଟ ହରାଇ ବ୍ୟାକ୍‌ଫୁଟ୍‌କୁ ଚାଲି ଯାଇଥିଲା। ଓ୍ବାର୍ନର ମାତ୍ର ୨ ରନ କରିଥିବାବେଳେ ରାବାଡ଼ାଙ୍କ ବଲ୍‌ରେ ବୋଲ୍ଡ ହୋଇ ଯାଇଥିଲେ। ଅଧିନାୟକଙ୍କ ବିଦାୟରେ ଚାପଗ୍ରସ୍ତ ହୋଇଥିଲେ ହେଁ ବ୍ୟାଟିଂକ୍ରମରେ ଉପରେ ଆସିଥିବା ପ୍ରିୟମ ଗର୍ଗ ଓ ମନୀଷ ପାଣ୍ଡେ ଦ୍ରୁତ ହାରରେ ରନ ସଂଗ୍ରହ ଉପରେ ମନୋନିବେଶ କରିଥିଲେ। ତେବେ ୫ମ ଓଭରରେ ବୋଲିଂ କରିବାକୁ ଆସିଥିବା ଷ୍ଟୋଇନିସ ଗୋଟିଏ ବଲ୍‌ ବ୍ୟବଧାନରେ ଏହି ଦୁଇ ବ୍ୟାଟ୍ସମ୍ୟାନଙ୍କୁ ପ୍ୟାଭିଲିୟନ ପଠାଇ ଦିଲ୍ଲୀ ଶିବିରରେ ଉତ୍ସାହ ଭରି ଦେଇଥିଲେ। ଗର୍ଗ ୧୨ ବଲ୍‌ରୁ ୧୭(୨ ଛକା) ଓ ମନୀଷ ୧୪ ବଲ୍‌ରୁ ୨୧(୩ ଚୌକା) ରନ କରିଥିଲେ। ଆବଶ୍ୟକ ରନହାର ବଢ଼ୁଥିବାରୁ କେନ୍‌ ଓ୍ବିଲିୟମସନ ଓ ଜାସନ ହୋଲ୍ଡର ସୁଯୋଗ ମିଳିଲେ ବଡ଼ ଶଟ୍‌ ଖେଳିବା ଉପରେ ଏକାଗ୍ର ରହିଥିଲେ। ତେବେ ୪ର୍ଥ ଉଇକେଟରେ ୪୬ ରନ ଯୋଗ ହେବାପରେ ହୋଲ୍ଡର ୧୧ ରନକରି ଅକ୍ଷର ପଟେଲଙ୍କ ବଲ୍‌ରେ ଆଉଟ ହୋଇଥିଲେ। ଚାପର ବଶବର୍ତ୍ତୀ ନ ହୋଇ ଓ୍ବିଲିୟମସନ ଲଢ଼ୁଆ ପ୍ରଦର୍ଶନ ଜାରି ରଖିଥିଲେ। ହୋଲ୍ଡରଙ୍କ ସହ ୪୬ ରନର ପାର୍ଟନରଶିପ୍‌ କରିଥିବା ଓ୍ବିଲିୟମସନ ଅବଦୁଲ ସମଦଙ୍କ ସହ ଅର୍ଦ୍ଧଶତକୀୟ ଭାଗୀଦାରି ଗଢ଼ି ଦଳପାଇଁ ଆଶା ଉଜ୍ଜୀବିତ ରଖିଥିଲେ। ମାତ୍ର ୧୬ତମ ଓଭରରେ ବୋଲିଂଭାର ପାଇଥିବା ଷ୍ଟୋଇନିସ ୫ମ ବଲ୍‌ରେ ଓ୍ବିଲିୟମସନଙ୍କୁ ରାବାଡ଼ାଙ୍କ ହାତରେ କ୍ୟାଚ କରାଇ ଦଳକୁ ବଡ଼ ସଫଳତା ଦେଇଥିଲେ। ଏହାଥିଲା ମ୍ୟାଚର ଟର୍ନିଂ ପଏଣ୍ଟ। ୪୫ଟି ବଲ୍‌ ଖେଳିଥିବା ଓ୍ବିଲିୟମସନ ୫ ଚୌକା ଓ ୪ ଛକା ସହାୟତାରେ ୬୭ ରନ କରିଥିଲେ। ଶେଷଭାଗରେ ସମଦ ଓ ରଶିଦ ଖାଁ କେତେକ ଦର୍ଶନୀୟ ଶଟ୍‌ ଖେଳିଥିଲେ ହେଁ ସନ୍‌ରାଇଜର୍ସ ଇନିଂସ ୧୭୨/୮ରେ ସୀମିତ ରହିଥିଲା। ରାବାଡ଼ା ୧୯ତମ ଓଭରର ୩ୟ ବଲ୍‌ରେ ସମଦ, ୪ର୍ଥ ବଲ୍‌ରେ ରଶିଦ ଓ ୫ମ ବଲ୍‌ରେ ଓ୍ବାଇଡ୍‌ ପରେ ଶ୍ରୀବତ୍ସ ଗୋସ୍ବମୀଙ୍କୁ ଆଉଟ କରିଥିଲେ। ସମଦ ୩୩(୧୬ ବଲ, ୨ ଚୌକା, ୨ ଛକା) ଓ ରଶିଦ ୧୧(୭ ବଲ୍‌, ୧ ଚୌକା, ୧ ଛକା) ରନ କରିଥିବାବେଳେ ଗୋସ୍ବାମୀ ଖାତା ଖୋଲିପାରି ନ ଥିଲେ। ଦିଲ୍ଲୀ ପକ୍ଷରୁ ରାବାଡ଼ା ୪ଟି, ଷ୍ଟୋଇନିସ ୩ଟି ଓ ଅକ୍ଷର ଗୋଟିଏ ଉଇକେଟ ନେଇଥିଲେ।


Enter your email to get our daily news in your inbox.

All Right Reserved By Dharitri.Com

ପୁଲଓ୍ବାମା ଶହୀଦଙ୍କ ପୁଅଙ୍କୁ ମାଗଣା କ୍ରିକେଟ ଟ୍ରେନିଂ ଦେବେ ସେହଓ୍ବାଗ

ଭାରତୀୟ କ୍ରିକେଟ ଦଳର ବିସ୍ଫୋରକ ବ୍ୟାଟ୍ସମ୍ୟାନ୍‌ ବିରେନ୍ଦ୍ର ସେହଓ୍ବାଗ ଏକ ମହତ କାମ ପାଇଁ ହାତ ବଢାଇଛନ୍ତି। ସେ ପୁଲଓ୍ବାମା ଶହୀଦଙ୍କ ପୁଅଙ୍କୁ ମାଗଣା କ୍ରିକେଟ...

‘କ୍ରୁନାଲ, ମୋ ମଧ୍ୟରେ ଯାହା ଘଟିଗଲା’

ନବି ମୁମ୍ବାଇ,୮।୪: ଟିମ୍‌ ଇଣ୍ଡିଆ ଏବଂ ଲକ୍ଷ୍ନୌ ସୁପର ଜ୍ୟାଣ୍ଟ୍ସ (ଏଲ୍‌ଏସ୍‌ଜି) ଅଲରାଉଣ୍ଡର ଦୀପକ ହୁଡା ଦୀର୍ଘ ଦିନ ପରେ କ୍ରୁନାଲ ପାଣ୍ଡ୍ୟାଙ୍କ ସହ ବିବାଦ...

ଓଡ଼ିଶାରେ ପ୍ରଥମଥର ଜାତୀୟ ସିନିୟର ଭଲିବଲ

ଭୁବନେଶ୍ୱର, ୨୪।୧୨(କ୍ରୀଡ଼ା ପ୍ରତିନିଧି)- ଓଡ଼ିଶାରେ ପ୍ରଥମଥରପାଇଁ ଆୟୋଜନ ହେବାକୁ ଯାଉଛି ଜାତୀୟ ସିନିୟର ଭଲିବଲ (ମହିଳା, ପୁରୁଷ) ପ୍ରତିଯୋଗିତା। ପ୍ରତିଯୋଗିତାର ଏହି ୬୮ତମ ସଂସ୍କରଣ କିଟ୍‌...

ଭାରତକୁ ଚେତାବନୀ ଦେଲେ ପାକିସ୍ତାନ ଅଧିନାୟକ: କୋହଲି ଦେଲେ ଦୃଢ ଜବାବ

ଦୁବାଇ,୧୭।୧୦: ୟୁଏଇ ଏବଂ ଓମାନ ମାଟିରେ ଆଜିଠାରୁ ଟି -୨୦ ବିଶ୍ୱକପ ଆରମ୍ଭ ହେଉଛି। ଏହି ଟୁର୍ନାମେଣ୍ଟରେ ସମଗ୍ର ବିଶ୍ୱର ଆଖି ରହିଛି ଭାରତ ଏବଂ...

ଶେଷ ମ୍ୟାଚ୍‌ ଜିତି ଟୁର୍ନାମେଣ୍ଟରୁ ବିଦାୟ ନେଲା ଚେନ୍ନାଇ

ଦୁବାଇ,୧।୧୧: ଆଇପିଏଲ ୨୦୨୦ର ୫୩ତମ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ ୯ ଉଇକେଟ୍‌ରେ କିଙ୍ଗ୍ସ ଏକାଦଶ ପଞ୍ଜାବକୁ ପରାସ୍ତ କରିଛି। ୧୫୪ ବିଜୟ ଲକ୍ଷ୍ୟକୁ ପିଛା...

ରୋମାଞ୍ଚକ ମୋଡ଼ରେ ଦ୍ୱିତୀୟ ଟେଷ୍ଟ, ଟାର୍ଗେଟ ୩୭୦: ଦକ୍ଷିଣ ଆଫ୍ରିକା ୧୨୭/୧

ରାଓ୍ବଲପିଣ୍ଡି,୮।୨: ପାକିସ୍ତାନ ଓ ଭ୍ରମଣକାରୀ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ଦ୍ୱିତୀୟ ତଥା ଅନ୍ତିମ ଟେଷ୍ଟ ମ୍ୟାଚ୍‌ ରୋମାଞ୍ଚକ ମୋଡ଼ରେ ପହଞ୍ଚିଛି। ଟସ୍‌ ଜିତି ପାକିସ୍ତାନ...

ଆଇସିସି ବୋର୍ଡ ବୈଠକ: ଅକ୍ଟୋବରରେ ହୋଇପାରେ ଆଇପିଏଲ୍‌

ନୂଆଦିଲ୍ଲୀ,୨୭।୫(ପି.ଟି.): ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)ର ଗୁରୁତ୍ୱପୂର୍ଣ୍ଣ ବୋର୍ଡ ବୈଠକ ଗୁରୁବାର ବସିବ। ଟେଲି କନଫରେନ୍ସ ମାଧ୍ୟମରେ ବସିବାକୁ ଥିବା ଏହି ବୈଠକ ଏକାଧିକ ଗୁରୁତ୍ୱପୂର୍ଣ୍ଣ...

ଲର୍ଡ୍ସ ଟେଷ୍ଟ: ଇଂଲଣ୍ଡ ଆଗରେ ବଡ଼ ଚ୍ୟାଲେଞ୍ଜ

ଲଣ୍ଡନ,୧୧।୮ : ଐତିହାସିକ ଲଡର୍‌ସ ଗ୍ରାଉଣ୍ଡରେ ଗୁରୁବାର ଠାରୁ ଭାରତ ଓ ଇଂଲଣ୍ଡ ମଧ୍ୟରେ ଆରମ୍ଭ ହେବାକୁ ଯାଉଛି ଦ୍ୱିତୀୟ ଟେଷ୍ଟ। ପ୍ରଥମ ମ୍ୟାଚ୍‌ରେ ବର୍ଷା...

Advertisement
Archives

Model This Week