ଧର୍ମଶାଳା/ଚଢ଼େଇଧରା, ୬ା୫(ଡି.ଏନ.ଏ.): ଧର୍ମଶାଳା ତହସିଲ ଅନ୍ତର୍ଗତ ବହୁଚର୍ଚ୍ଚିତ ଡଙ୍କାରୀ ପାହାଡ଼ରେ ଗୁରୁବାର ତହସିଲ ପ୍ରଶାସନ ପକ୍ଷରୁ ମିଳିତ ଚଢ଼ାଉ କରାଯାଇ ମାପଚୁପ କରାଯାଇଛି। ଖାଦାନରୁ ଲିଜ୍ଧାରୀ ଅଧିକ ପରିମାଣର କଳାପଥର ଉତ୍ତୋଳନ କରି ଅନ୍ୟତ୍ର ଚାଲାଣ କରୁଛନ୍ତି। ଫଳରେ ସେମାନେ ମାଲାମାଲ ହେଉଥିବା ବେଳେ ସରକାର ବ୍ୟାପକ ରାଜସ୍ବ ହରାଉଛନ୍ତି। ଏହି ବେଆଇନ ଚୋରା ଚାଲାଣକୁ ରୋକିବା ପାଇଁ ଜିଲାପାଳଙ୍କ ଦ୍ୱାରା ଗଠିତ ଟାକ୍ସଫୋର୍ସ ବିଭିନ୍ନ ସମୟରେ ଚଢ଼ାଉ କରି ମାପଚୁପ କରିଥାନ୍ତି। ଏହିକ୍ରମରେ ଧର୍ମଶାଳା ତହସିଲଦାର ସ୍ବାଗତ ଦାସଙ୍କ ନେତୃତ୍ୱରେ ଅତିରିକ୍ତ ତହସିଲଦାର ଦେବୀ ପ୍ରସନ୍ନ ମହାନ୍ତି, ଭୂତତ୍ତ୍ୱବିତ ସନ୍ତୋଷୀପ୍ରଭା ସେଠୀ, ପରିବେଶ ଯନ୍ତ୍ରୀ ଦିବ୍ୟଲୋଚନ ମହାପାତ୍ର, ସ୍ଥାନୀୟ ଆର୍ଆଇ ମାନସ ବେଜ ଓ ଜଗବନ୍ଧୁ ଜେନା ପ୍ରମୁଖ ଏହି ଟାକ୍ସଫୋର୍ସରେ ସାମିଲ ହୋଇଥିଲେ। ଡଙ୍କାରୀ ପାହାଡ଼ରେ ଲିଜ ଦିଆଯାଇଥିବା ଖାଦାନଗୁଡ଼ିକୁ ମାପଚୁପ କରିବା ସହିତ ଡ୍ରୋନ କ୍ୟାମେରା ଦ୍ୱାରା ଫଟୋ ଉତ୍ତୋଳନ କରିଥିଲେ। ତେବେ ରାଜସ୍ବ ବିଭାଗର ଏହା ଏକ ନିୟମିତ ପ୍ରକ୍ରିୟା ବୋଲି ତହସିଲ ପକ୍ଷରୁ ସୂଚନା ଦିଆଯାଇଛି।
ପ୍ରକାଶଥାଉକି, ୫୦୦ ଏକର ପରିମିତ ଡଙ୍କାରୀ ପାହାଡ଼ରେ ୯ଟି ଖାଦାନ ରହିଥିବାବେଳେ ମାତ୍ର ୨ଟି ଖାଦାନକୁ ଲିଜ ଦିଆଯାଇଛି। କିନ୍ତୁ ଲିଜ ଦିଆଯାଇ ନ ଥିବା ସଇରାତଗୁଡ଼ିକରୁ ମାଫିଆମାନେ ବେଆଇନ ଭାବେ ପଥର ଉତ୍ତୋଳନ କରିଚାଲିଛନ୍ତି। ହେଲେ ପ୍ରଶାସନ ପକ୍ଷରୁ ଲିଜ ଦିଆଯାଇଥିବା ୨ଟି ସଇରାତକୁ ମାପଚୁପ କରି ଫଟୋ ଉଠାଇ ଆଣିଥିବାବେଳେ ଅନ୍ୟ ସଇରାତଗୁଡ଼ିକୁ ଛାଡ଼ି ଦିଆଯାଉଛି। ଫଳରେ ମାଫିଆଙ୍କ ପାଇଁ ଏହା ପୁଷମାସ ସଦୃଶ ହୋଇଛି। ତେଣୁ ଏଠାରେ ଲିଜ ଦିଆଯାଇ ନ ଥିବା ସଇରାତ ଗୁଡିକୁ ମାପଚୁପ କରି ଲିଜ ପ୍ରଦାନ କରିବାକୁ ଦାବି ହୋଇଛି। ନଚେତ ମାଫିଆ ଲାଭବାନ ହୋଇ ଚାଲିଥିବା ବେଳେ ସରକାର ରାଜସ୍ବ ହରାଉଥିବେ ବୋଲି ସାଧାରଣରେ ମତପ୍ରକାଶ ପାଇଛି।
