ଛତ୍ରପୁର,୨୯ା୧(ସନ୍ତୋଷ ପାଢ଼ୀ/ଦିଲୀପ ସାମଲ): ସ୍ତ୍ରୀଙ୍କୁ ହତ୍ୟା ମାମଲାରେ ଗିରଫ ହୋଇ ଛତ୍ରପୁର ସବଜେଲରେ ବିଚାରାଧୀନ ବନ୍ଦୀ ଥିବା ଅଭିଯୁକ୍ତ ଫୋନରେ ସାକ୍ଷୀଙ୍କୁ ଧମକାଇଥିବା ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି। ଛତ୍ରପୁର ଏସଡ଼ିଜେଏମ୍ ପ୍ରୀତିଶ କୁମାର ରଥ ଏହି ମାମଲାର ଶୁଣାଣି କରି ଅଭିଯୁକ୍ତ ବିପୁଳିଙ୍ଗି ଗ୍ରାମର ରାଧାଶ୍ୟାମ ପଣ୍ଡାଙ୍କୁ ୧ ମାସ କାରାଦଣ୍ଡରେ ଦଣ୍ଡିତ କରିଛନ୍ତି। ହତ୍ୟା ମାମଲାର ଏତଲାକାରୀ ତଥା ସାକ୍ଷୀ ଆଶିଷ ପଣ୍ଡାଙ୍କୁ ରାଧାଶ୍ୟାମ ଜୀବନରେ ମାରିବାକୁ ଧମକ ଦେବା ମାମଲାରେ ଦୋଷୀ ସାବ୍ୟସ୍ତ ହୋଇ ଏହି ସଜା ପାଇଛନ୍ତି। ସରକାରଙ୍କ ପକ୍ଷରୁ କ୍ୟାଡ଼ର ଏପିପି ରାଜେଶ କୁମାର ମିଶ୍ର ଏହି ମାମଲା ପରିଚାଳନା କରୁଥିଲେ ।
ସୂଚନାଯୋଗ୍ୟ, ୨୦୨୩ ଫେବୃଆରୀ ମାସରେ କୌଣସି ଏକ କାରଣକୁ ନେଇ ରାଧାଶ୍ୟାମ ଓ ତାଙ୍କ ସ୍ତ୍ରୀଙ୍କ ମଧ୍ୟରେ ଝଗଡା ହୋଇଥିଲା । ପରେ ଘରେ କେହି ନଥିବାର ସୁଯୋଗ ନେଇ ରାଧାଶ୍ୟାମ ତାଙ୍କ ସ୍ତ୍ରୀଙ୍କୁ ହତ୍ୟା କରିଥିଲେ। ଏହି ଖବରପାଇ ଓ ବାପାଙ୍କ ଅତ୍ୟାଚାର ସହି ନପାରି ତାଙ୍କ ପୁଅ ଦେବାଶିଷ ପଣ୍ଡା ଆତ୍ମହତ୍ୟା କରିଥିଲେ। ହତ୍ୟା ଅଭିଯୋଗରେ ଗତବର୍ଷ ମାର୍ଚ୍ଚରୁ ଅଭିଯୁକ୍ତ ରାଧାଶ୍ୟାମ ଛତ୍ରପୁର ସବଜେଲରେ ବିଚରାଧୀନ ବନ୍ଦୀ ଭାବେ ରହିଛନ୍ତି। ସେଠାରେ ରହିଲା ପରେ ବି ତାଙ୍କର ଅତ୍ୟାଚାର କମି ନ ଥିଲା। ସେ ନିଜର ଅନ୍ୟ ୨ ପୁଅ ଆଶିଷ ଓ ଶାନ୍ତନୁଙ୍କୁ ମାରିବା ପାଇଁ ବିଭିନ୍ନ ଲୋକଙ୍କ ମାଧ୍ୟମରେ ତଥା ଫୋନ ମାଧ୍ୟମରେ ଧମକ ଦେଇ ଆସୁଥିଲେ। ଏହାକୁ ପ୍ରଥମେ ପୁଅମାନେ ଏତେ ଧ୍ୟାନ ଦେଉନଥିଲେ । ପରେ ଯେତେବେଳେ ଏହି କଥା ବଢିବାରେ ଲାଗିଲା, ସେତେବେଳେ ଦୁଇ ପୁଅ ଛତ୍ରପୁର ଥାନାକୁ ଜଣାଇଥିଲେ। ଗତ ଅଗଷ୍ଟ ୨୦ ତାରିଖରେ ଆଶିଷ ଛତ୍ରପୁର ଥାନାରେ ଲିଖିତ ଅଭିଯୋଗ କରିବା ପରେ ଅଗଷ୍ଟ ୨୦, ୨୦୨୩ରେ କେସ ନମ୍ବର ୫୪୭/୨୦୨୩ରେ ମାମଲାଟି ରୁଜ୍ଜୁ ହେବା ସହ ତଦନ୍ତକାରୀ ଅଧିକାରୀ ବିନୟ କୁମାର ଦାସ ଏହାର ବିଭିନ୍ନ ପ୍ରମାଣକୁ ଏକାଠି କରି ଚାର୍ଜସିଟ ଦାଖଲ କରିଥିଲେ । ଏହି ମାମଲାଟି ଜିଆର ୧୧୦୧/୨୩ ରେ ପଞ୍ଜିକୃତ ହୋଇ ଛତ୍ରପୁର କୋର୍ଟରେ ବିଚରାଧୀନ ରହିଥିଲା। ସୋମବାର ୭ଜଣ ସାକ୍ଷୀଙ୍କ ବୟାନକୁ ଭିତ୍ତି କରି ତଥା ସାକ୍ଷୀଙ୍କ ସୁରକ୍ଷା କଥା ଚିନ୍ତା କରି ଅଭିଯୁକ୍ତଙ୍କୁ ୫୦୬ଧାରାରେ ଅଭିଯୁକ୍ତ ରାଧାଶ୍ୟାମଙ୍କୁ ବିଚାରପତି ଦୋଷୀ ସାବ୍ୟସ୍ତ କରିଥିଲେ। ।
