ନୂଆଦିଲ୍ଲୀ, ୪।୭: ଭାରତ ୨୦୨୨ ଏଏଫସି ଏସିଆନ କପ୍ ଆୟୋଜନ କରିବା ଘଟଣା ଭାରତୀୟ ମହିଳା ଫୁଟବଲ ଦଳର ଫରଓ୍ବାର୍ଡ ବାଲା ଦେବୀଙ୍କୁ ଖୁବ୍ ଉତ୍ସାହିତ କରିଛି। ଏଥିପାଇଁ ସେ ପଡ଼ିଆକୁ ଓହ୍ଲାଇ ଫିଟ୍ନେସ ରହିବା ଉପରେ ଗୁରୁତ୍ୱ ଦେଇଛନ୍ତି। ସ୍କଟିଶ୍ ପ୍ରିମିୟର ଲିଗ୍ରେ ଏହି ଭାରତୀୟ ଷ୍ଟ୍ରାଇକର ଖେଳିବେ। କରୋନା ଭାଇରସ ସଂକ୍ରମଣ ଯୋଗୁ ଏହା ଏବେ ବନ୍ଦ ରହିଛି। ଏହା ପୁଣି ଆରମ୍ଭ ହେବାକୁ ଉତ୍କଣ୍ଠାର ସହିତ ଅପେକ୍ଷା କରିଛନ୍ତି ଏହି ଭାରତୀୟ ମହିଳା ଫୁଟବଲ ତାରକା। ଭାରତ ଏଏଫସି ଏସିଆନ କପ୍ ଆୟୋଜନ ଅଧିକାର ପାଇଥିବାରୁ ମୁଁ ଅତ୍ୟନ୍ତ ଖୁସି। ଏପରି ଏକ ସମ୍ମାନଜନକ ଟୁର୍ନାମେଣ୍ଟ ଆୟୋଜନ କରିବା ସମ୍ମାନର କଥା। ଏହା ଭାରତୀୟ ମହିଳା ଫୁଟବଲ ପାଇଁ ଅନେକ ଗୁରୁତ୍ୱ ରଖିବ। ଏହା ବ୍ୟତୀତ ଏହା ଆମକୁ ଅଧିକ ପରିଶ୍ରମ କରିବା ପାଇଁ ପ୍ରେରିତ କରିବ ବୋଲି ବାଲା ଦେବୀ କହିଛନ୍ତି। କରୋନା ଭାଇରସ ସଂକ୍ରମଣ ଜନିତ ସଙ୍କଟ ସମୟରେ ବାଲା ଘର ଭିତରେ ବ୍ୟାୟାମ, ଯୋଗ କରିବା ସହ ନିକଟରେ ଥିବା ପାର୍କକୁ ଯାଇ ସାମାଜିକ ଦୂରତ୍ୱ ରକ୍ଷାକରି ଜଗିଂ କରୁଛନ୍ତି।
ଭାରତରେ ୨୦୧୬ରେ ଏଏଫସି ୧୬ ବର୍ଷରୁ କମ୍ ଚାମ୍ପିୟନଶିପ୍, ୨୦୧୭ରେ ଫିଫା ୧୭ ବର୍ଷରୁ କମ୍ ବିଶ୍ୱକପ ଆୟୋଜିତ ହୋଇଥିବାବେଳେ ୨୦୨୧ରେ ଫିଫା ୧୭ ବର୍ଷରୁ କମ୍ ମହିଳା ବିଶ୍ୱକପ ହେବାକୁ ଯାଉଛି। ୨୦୨୨ରେ ଏଏଫସି ଏସିଆନ କପ୍ ଆୟୋଜନ ହେବ। ତେଣୁ ଦେଶରେ ଫୁଟବଲ ପ୍ରତି ଆଗ୍ରହ ବଢ଼ିବାରେ ଲାଗିଛି ବୋଲି ଅନୁଭବ କରୁଛନ୍ତି ବାଲା। ”ଜଣେ ଫୁଟବଲରଭାବେ ନିଜ ଘରୋଇ ପରିବେଶରେ ଏକ ବିଶ୍ୱକପ କିମ୍ବା ଏସିଆନ କପ୍ ଖେଳିବାଠାରୁ ଆଉ ବଡ଼କଥା କିଛି ଅଛି ବୋଲି ଭାବି ହେଉନାହିଁ। ୧୭ ବର୍ଷରୁ କମ୍ ମହିଳା ବିଶ୍ୱକପ ଦେଶର ବାଳିକାଙ୍କ ପାଇଁ ବଡ଼ ପ୍ଲାଟ୍ଫର୍ମ ହେବ। ଏଥିରୁ ସେମାନେ ଅନେକ ଅଭିଜ୍ଞତା ହାସଲ କରିବେ“ ବୋଲି ବାଲା ପ୍ରକାଶ କରିଛନ୍ତି। ମହିଳା ଏସିଆନ କପ୍ ଏକ ବଡ଼ ଟୁର୍ନାମେଣ୍ଟ। ଭାରତୀୟ ସିନିୟର ମହିଳା ଦଳ ଘରୋଇ ପରିବେଶରେ ଖେଳିବ। ତେଣୁ ସମଗ୍ର ଦେଶ ଆମକୁ ସମର୍ଥନ କରିବାକୁ ଆଗେଇ ଆସିବା ଉଚିତ। ଆଗାମୀ ଦିନରେ ହେବାକୁ ଯାଉଥିବା ୨ଟି ଟୁର୍ନାମେଣ୍ଟ ଭାରତୀୟ ମହିଳା ଫୁଟବଲରେ ଶକ୍ତି ଭରିଦେବ। ସମସ୍ତଙ୍କ ନଜର ଦେଶର ବାଳିକାଙ୍କ ଉପରେ ରହିବ ବୋଲି ସେ କହିଛନ୍ତି।
