ମୁମ୍ବାଇ,୧୮।୧୨ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ରବିବାର ସ୍ବଦେଶୀ ନିର୍ମିତ ପି-୧୫-ବି ଷ୍ଟିଲ୍ଥ ଗାଇଡେଡ କ୍ଷେପଣାସ୍ତ୍ର ବିନାଶକ ଯୁଦ୍ଧ ଜାହାଜ ମୋର୍ମୁଗାଓକୁ ଭାରତୀୟ ନୌସେନାରେ ସାମିଲ କରିଛନ୍ତି। ଏହା ମୁମ୍ବାଇର ନାଭାଲ ଡକୟାର୍ଡରେ ସାମିଲ ହୋଇଛି। ଏହା ଭାରତ ମହାସାଗରରେ ଭାରତୀୟ ନୌସେନାର ଶକ୍ତି ବୃଦ୍ଧି କରିବା ସହିତ ଦେଶର ସାମୁଦ୍ରିକ ସୀମାର ସୁରକ୍ଷାକୁ ଆହୁରି ସୁଦୃଢ଼ କରିବ। ବିନାଶକାରୀ ଯୁଦ୍ଧ ଜାହାଜକୁ ଭାରତୀୟ ନୌସେନାର ’ୱାରଶିପ ଡିଜାଇନ ବ୍ୟୁରୋ’ ଡିଜାଇନ କରିଛି ଏବଂ ମୁମ୍ବାଇର ମାଜାଗାଓଁ ଡକ ଶିପବିଲ୍ଡର୍ସ ଲିମିଟେଡ ଦ୍ୱାରା ନିର୍ମାଣ କରାଯାଇଛି।
ପଶ୍ଚିମ ଉପକୂଳରେ ଥିବା ଐତିହାସିକ ବନ୍ଦର ସହର ଗୋଆର ନାମରେ ଆଇଏନଏସ ମୋର୍ମୁଗାଓ ନାମିତ ହୋଇଛି। ପର୍ତ୍ତୁଗୀଜ ଶାସନରୁ ଗୋଆର ମୁକ୍ତି ହେବାର ୬୦ ବର୍ଷ ପୂରଣ ଅବସରରେ ଗତ ବର୍ଷ ଡିସେମ୍ବର ୧୯ ରେ ଆଇଏନଏସ ମୋର୍ମୁଗାଓ ପ୍ରଥମ ଥର ପାଇଁ ସମୁଦ୍ରକୁ ଯାଇଥିଲା। ଭାରତରେ ନିର୍ମିତ ଏକ ଶକ୍ତିଶାଳୀ ଯୁଦ୍ଧ ଜାହାଜ ମଧ୍ୟରୁ ଆଇଏନଏସ ମୋର୍ମୁଗାଓ ଅନ୍ୟତମ। ଏହାର ଲମ୍ବ ୧୬୩ ମିଟର ଏବଂ ପ୍ରସ୍ଥ ୧୭ ମିଟର ଏବଂ ଓଜନ ୭,୪୦୦ ଟନ। ଜାହାଜଟି ଚାରୋଟି ଶକ୍ତିଶାଳୀ ଗ୍ୟାସ ଟର୍ବାଇନ ସହିତ ସଜ୍ଜିତ ଏବଂ ୩୦ ରୁ ଅଧିକ ସାମୁଦ୍ରିକ ମାଇଲ ବେଗରେ ଗତି କରିପାରିବ ।
ଆଇଏନଏସ ମୋର୍ମୁଗାଓ ବ୍ରାହ୍ମୋସ ଏବଂ ବରାକ-୮ ପରି କ୍ଷେପଣାସ୍ତ୍ରରେ ସଜ୍ଜିତ। ଏହା ଇସ୍ରାଏଲର ଏମଏଫ ଷ୍ଟାର ରାଡାର ସହିତ ସଜ୍ଜିତ, ଯାହା ବାୟୁରେ ଦୀର୍ଘ ଦୂରଗାମୀ ଲକ୍ଷ୍ୟ ଚିହ୍ନଟ କରିପାରିବ। ୧୨୭ ମିଲିମିଟର ବନ୍ଧୁକ ସହିତ ସଜ୍ଜିତ Iଆଇଏନଏସ ମୋର୍ମୁଗାଓ ୩୦୦ କିଲୋମିଟର ଦୂରରେ ଥିବା ଟାର୍ଗେଟକୁ ଭେଦ କରିବାରେ ସକ୍ଷମ। ଏହା ଏକ ଏକେ-୬୩୦ ଆଣ୍ଟି-ମିଜାଇଲ ବନ୍ଧୁକ ପ୍ରଣାଳୀ ସହିତ ସୁସଜ୍ଜିତ ହୋଇଛି। ଏଥିସହ ଏଥିରେ ଏକ ଆଣ୍ଟି-ସବମେରାଇନ ରକେଟ ଲଞ୍ଚର୍ ରହିଛି।
ଏହି କାର୍ଯ୍ୟକ୍ରମରେ ସିଡିଏସ ଜେନେରାଲ ଅନୀଲ ଚୌହ୍ବାନ, ନୌସେନାର ମୁଖ୍ୟ ଆଡମିରାଲ ଆର ହରି କୁମାର, ଗୋଆ ରାଜ୍ୟପାଳ ପିଏସ ଶ୍ରୀଧରନ ପିଲ୍ଲାଇ, ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଯେ ଆଇଏନଏସ ମୋର୍ମୁଗାଓ ଭାରତରେ ନିର୍ମିତ ସବୁଠାରୁ ଶକ୍ତିଶାଳୀ ଯୁଦ୍ଧ ଜାହାଜ ମଧ୍ୟରୁ ଅନ୍ୟତମ। ଏହାଦ୍ୱାରା ଭାରତର ସାମୁଦ୍ରିକ କ୍ଷମତା ବୃଦ୍ଧି ପାଇବ। ଏମଡିଏସଏଲ ଦ୍ୱାରା ନିର୍ମିତ ଏହି ଯୁଦ୍ଧ ଜାହାଜ ଆମର ସ୍ବଦେଶୀ ପ୍ରତିରକ୍ଷା ଉତ୍ପାଦନ କ୍ଷମତାର ଏକ ଉତ୍ତମ ଉଦାହରଣ। ଏଥିରେ କୌଣସି ସନ୍ଦେହ ନାହିଁ ଯେ, ଭବିଷ୍ୟତରେ, ଆମେ କେବଳ ନିଜ ଆବଶ୍ୟକତା ପାଇଁ ନୁହେଁ, ଦୁନିଆର ଆବଶ୍ୟକତା ପାଇଁ ମଧ୍ୟ ଜାହାଜ ନିର୍ମାଣ କରିବୁ।
ଏହି ଅବସରରେ ନୌସେନା ମୁଖ୍ୟ ଆଡମିରାଲ ଆର ହରି କୁମାର କହିଛନ୍ତି ଯେ, ଆଜି ଆମେ ଏକ ବିନାଶକାରୀ ସ୍ବଦେଶୀ ଯୁଦ୍ଧ ଜାହାଜ ନିର୍ମାଣ କରି ଆଉ ଏକ ମାଇଲଖୁଣ୍ଟ ସ୍ଥାପିତ କରିଛୁ। ଏହି ସଫଳତା ଗତ ଦଶନ୍ଧି ମଧ୍ୟରେ ଯୁଦ୍ଧ ଜାହାଜ ଡିଜାଇନ ଏବଂ ନିର୍ମାଣ ସାମର୍ଥ୍ୟରେ ଆମ ଦ୍ୱାରା ନିଆଯାଇଥିବା ବଡ ପଦକ୍ଷେପକୁ ସୂଚାଉଛି।
