ନୂଆଦିଲ୍ଲୀ,୨୫।୯: ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଦିନିକିଆ (ODI) ସିରିଜ୍ ସେପ୍ଟେମ୍ବର ୨୭ରୁ ଆରମ୍ଭ ହେବାକୁ ଯାଉଛି। ଏହି ସିରିଜ୍ରେ ଆଉ ଥରେ ନିଜ ପ୍ରିୟ ଖେଳାଳି ବିରାଟ କୋହଲି ଏବଂ ରୋହିତ ଶର୍ମାଙ୍କୁ ପଡ଼ିଆରେ ଦେଖିବା ପାଇଁ କ୍ରିକେଟ୍ ପ୍ରଶଂସକମାନେ ବେଶ୍ ଉତ୍ସାହିତ ଅଛନ୍ତି। T20 ଏବଂ ଟେଷ୍ଟ କ୍ରିକେଟ୍ରୁ ଏହି ଦୁଇ ଦିଗ୍ଗଜ ସନ୍ନ୍ୟାସ ନେବା ପରଠାରୁ, ସେମାନେ ୨୦୨୭ ଦିନିକିଆ ବିଶ୍ୱକପ୍ ଖେଳିବେ କି ନାହିଁ ତାହାକୁ ନେଇ କ୍ରମାଗତ ପ୍ରଶ୍ନ ଉଠୁଛି। ଅନେକ ପ୍ରଶଂସକ ଏହି ଦୁଇ ଷ୍ଟାର୍ଙ୍କ ବିନା ଭାରତୀୟ ଦିନିକିଆ ଟିମ୍କୁ କଳ୍ପନା ସୁଦ୍ଧା କରିପାରନ୍ତି ନାହିଁ। ତେବେ ଯଦି ଦୁହେଁ ଦିନିକିଆ କ୍ରିକେଟ୍ରୁ ସମ୍ପୂର୍ଣ୍ଣ ସନ୍ନ୍ୟାସ ନିଅନ୍ତି, ତେବେ କ’ଣ ହେବ? ଏହା ଉପରେ ପୂର୍ବତନ ଭାରତୀୟ ଓପନର୍ ବିରେନ୍ଦ୍ର ସେହ୍ବାଗ ନିଜର ବେପରୁଆ ପ୍ରତିକ୍ରିୟା ରଖିଛନ୍ତି।
ସେହ୍ବାଗ କହିଛନ୍ତି, “ଲୋକମାନେ ନିଶ୍ଚିତ ଭାବେ କହୁଛନ୍ତି ଯେ ସେମାନେ କେବଳ ରୋହିତ ଓ ବିରାଟଙ୍କ ପାଇଁ କ୍ରିକେଟ୍ ଦେଖୁଛନ୍ତି, କିନ୍ତୁ ଗୋଟିଏ ସମୟରେ ସୁନିଲ ଗାଭାସ୍କର, କପିଲ ଦେବ ଏବଂ ସଚିନ ତେନ୍ଦୁଲକରଙ୍କ ପାଇଁ ମଧ୍ୟ ସମାନ କଥା କୁହାଯାଉଥିଲା। ପ୍ରଶଂସକମାନେ ସାଧାରଣତଃ କହନ୍ତି ଯେ ନିଜର ପ୍ରିୟ ଖେଳାଳି ଅବସର ନେବା ପରେ ସେମାନେ କ୍ରିକେଟ୍ ଦେଖିବା ବନ୍ଦ କରିଦେବେ। ହୋଇପାରେ କିଛି ପ୍ରଶଂସକ ଏପରି କରିବେ, କିନ୍ତୁ ବାସ୍ତବରେ ସେମାନେ ଖେଳ ଦେଖିବା ଛାଡ଼ନ୍ତି ନାହିଁ। ଯଦି କେବଳ ଖେଳାଳିଙ୍କ ଦ୍ୱାରା କ୍ରିକେଟ୍ ଚାଲୁଥାନ୍ତା, ତେବେ ଏହା ବହୁ ପୂର୍ବରୁ ବନ୍ଦ ହୋଇସାରନ୍ତାଣି।”
ଅନ୍ୟପଟେ କ୍ରିକେଟ୍ ବିଶେଷଜ୍ଞଙ୍କ ମଧ୍ୟରୁ ଅଧିକାଂଶଙ୍କ ମତ ଯେ ୨୦୨୭ ବିଶ୍ୱକପ୍ ପାଇଁ ଭାରତୀୟ ଦଳରେ ରୋହିତ ଓ ବିରାଟଙ୍କ ଭଳି ଅଭିଜ୍ଞ ଖେଳାଳିଙ୍କୁ ସାମିଲ କରାଯିବା ଉଚିତ୍। ଏଥର ଦିନିକିଆ ବିଶ୍ୱକପ୍ ଦକ୍ଷିଣ ଆଫ୍ରିକା, ଜିମ୍ବାୱେ ଏବଂ ନାମିବିଆର ମିଳିତ ଆୟୋଜନରେ ଖେଳାଯିବ। ଏହି ଭଳି ପରିସ୍ଥିତିରେ ଏହି ଦୁଇ ଅଭିଜ୍ଞ ବ୍ୟାଟର୍ଙ୍କ ଦଳରେ ରହିବା ଅତ୍ୟନ୍ତ ଜରୁରୀ।
ରିପୋର୍ଟ ଅନୁଯାୟୀ, ଦକ୍ଷିଣ ଆଫ୍ରିକାରେ ଭାରତୀୟ ଦଳ ୫୯ଟି ଦିନିକିଆ ମ୍ୟାଚ୍ରୁ ୨୪ଟିରେ ବିଜୟୀ ହୋଇଛି। ନାମିବିଆରେ ଭାରତ ଏପର୍ଯ୍ୟନ୍ତ କୌଣସି ଆନ୍ତର୍ଜାତୀୟ ୫୦-ଓଭର ମ୍ୟାଚ୍ ଖେଳିନାହିଁ। ସେହିପରି ଜିମ୍ବାୱେ ମାଟିରେ ଖେଳାଯାଇଥିବା ୩୪ଟି ଦିନିକିଆ ମ୍ୟାଚ୍ ମଧ୍ୟରୁ ଭାରତ ୨୬ଟି ମ୍ୟାଚ୍ରେ ଜିତି ସଫଳତା ହାସଲ କରିଛି।
