ଭଞ୍ଜନଗର,୨୨/୪(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ଅଧ୍ୟକ୍ଷ ପ୍ରଦୀପ କମାନୁ ଛାତ୍ରୀଛାତ୍ରମାନଙ୍କୁ ଉତ୍ସାହିତ କରିବା ପାଇଁ ଅନେକ ସମୟରେ କିଛି ନୂଆ ନୂଆ ପଦକ୍ଷେପ ନେଉଛନ୍ତି। ଯାହାକୁ ନେଇ ଛାତ୍ରୀଛାତ୍ର ଏବଂ ଅଭିଭାବକମାନେ ଖୁସିବ୍ୟକ୍ତ କରିଛନ୍ତି। ଯେଉଁ ଛାତ୍ରୀଛାତ୍ରଙ୍କ ଯେଉଁଦିନ ଜନ୍ମଦିନ ପଡୁଛି ସେହିଦିନ ସଂପୃକ୍ତ ଛାତ୍ରୀଛାତ୍ରଙ୍କୁ ବିଦ୍ୟାଳୟ ପ୍ରାର୍ଥନା ସମୟରେ ସ୍ବତନ୍ତ୍ର ଭାବେ ସମସ୍ତ ଛାତ୍ରୀଛାତ୍ରଙ୍କ ସମ୍ମୁଖରେ ବାଜା ବଜାଇ ସ୍ବାଗତ କରାଯାଉଛି। ଏଥିସହ ଯେଉଁ ଛାତ୍ରୀଛାତ୍ରଙ୍କ ଜନ୍ମଦିନ ପଡିବ ସେମାନେ ସେହିଦିନ ଅଭିଭାବକ, ଶିକ୍ଷକଙ୍କ ସହ ମିଶି ବିଦ୍ୟାଳୟରେ ଚାରାରୋପଣ କରିବେ। ଗତ ସୋମବାର ଜଣେ ଛାତ୍ରଙ୍କ ଜନ୍ମଦିନରେ ବିଦ୍ୟାଳୟରେ ଛାତ୍ର ଏବଂ ତାଙ୍କ ଅଭିଭାବକ ମିଶି ବ୍ରହ୍ମକମଳ ଫୁଲ ଗଛ ଲଗାଇଥିଲେ। ଏହାଦ୍ବାରା ଛାତ୍ରୀଛାତ୍ର ମାନଙ୍କ ମଧ୍ୟରେ ପରିବେଶ ସୁରକ୍ଷା ନେଇ ସଚେତନତା ବାର୍ତ୍ତା ବଢିବ। ଆଗାମୀ ଦିନରେ ଏହିଭଳି ଅଧିକରୁ ଅଧିକ ନୂଆ ନୂଆ କାର୍ଯ୍ୟକ୍ରମ କରିବା ଲକ୍ଷ୍ୟ ଅଛି ବୋଲି ଅଧ୍ୟକ୍ଷ କମାନୁ ଏଠାରେ ସୂଚନା ଦେଇଛନ୍ତି।
Dharitri – Odisha’s No.1 Odia Daily
