ମହାକାଳପଡ଼ା,୧୪ା୫ (ଡି.ଏନ.ଏ.): କନ୍ଧମାଳ ଜଲା ଦାରିଙ୍ଗବାଡ଼ି ଅଞ୍ଚଳର ଆଦିବାସୀ ଯୁବତୀ ଝିଲିମା ପ୍ରଧାନ (୨୪) ନ୍ୟାୟ ପାଇଁ ପ୍ରେମିକ ଘରେ ପହଞ୍ଚି ନ୍ୟାୟ ଦାବି କରି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଜମ୍ବୁ ସାମୁଦ୍ରିକ ଥାନାରେ ଶୁକ୍ରବାର ଲିଖିତ ଅଭିଯୋଗ କରିଛନ୍ତି। ମିଳିଥିବା ସୂଚନା ଅନୁସାରେ, ବ୍ଲକର ଖରିନାସୀ ଗ୍ରାମ କାଳିବାଡ଼ି ଅଞ୍ଚଳର ରାକେଶ ବୈରାଗୀ (୨୮)ଙ୍କ ସହ ୨୦୧୩ ମସିହାରେ ଆନ୍ଧ୍ର ପ୍ରଦେଶର ଏକ ସୂତା ମିଲରେ କାମ କରୁଥିବା ବେଳେ ଝିଲିମାଙ୍କ ସାକ୍ଷାତ ହୋଇଥିଲା। ପରବର୍ତ୍ତୀ ସମୟରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ସୁଦୃଢ ହୋଇଥିଲା। ୨୦୧୭ରେ ଉଭୟେ ଏକ ଘର ଭଡ଼ା ନେଇ ଜୀବନ ଅତିବାହିତ କରିଥିଲେ। ପରେ ଆନ୍ଧ୍ର ପ୍ରଦେଶର ଏକ ମନ୍ଦିରରେ ରାକେଶ ଝିଲିମାଙ୍କୁ ଶଙ୍ଖା ସିନ୍ଦୂର ପିନ୍ଧାଇ ସ୍ତ୍ରୀର ମାନ୍ୟତା ପ୍ରଦାନ କରିଥିଲେ ବୋଲି ପୀଡିତା କହିଛନ୍ତି। ପରବର୍ତ୍ତୀ ସମୟରେ ରାକେଶ ଝିଲିମାଙ୍କୁ ଡାକ୍ତରଖାନାକୁ ଦୁଇଥର ନେଇ ଗର୍ଭ ନଷ୍ଟ କରିଥିଲେ। ଝିଲିମା ରାକେଶ ଘରକୁ ଦୁଇଥର ଆସି ଶୁଦ୍ଧକ୍ରିୟାରେ ଯୋଗଦେଇ ପରିବାର ସହ ମିଶିଥିଲେ। ପରେ ଉଭୟେ ମିଶି ପୁଣି ଆନ୍ଧ୍ର ପ୍ରଦେଶ ସୂତା ମିଲରେ କାମ କରିବାକୁ ପଳାଇ ଥିଲେ। ହେଲେ ରାକେଶ ଅନ୍ୟ ଜଣେ ଯୁବତୀଙ୍କୁ ବିବାହ କରି ଘରକୁ ଆଣିଥିବା କୁହାଯାଇଛି। ଏହି ଖବରପାଇ ସୁଦୂର ଦାରିଙ୍ଗବାଡି ଅଞ୍ଚଳରୁ ଝିଲିମା ଛୁଟି ଆସିଛନ୍ତି ଖରିନାସୀ ରାକେଶଙ୍କ ଘରକୁ। ରାକେଶଙ୍କ ଘରେ ଝିଲିମା ପହଞ୍ଚତ୍ଲା ପରେ ପରିବାର ଲୋକେ ଧକ୍କା ଦେଇ ତାଙ୍କୁ ଘରୁ ବାହାରକୁ ବିଦା କରି ଦେଇଥିଲେ। ଉପାୟ ଶୂନ୍ୟ ହୋଇ ଝିଲିମା ନ୍ୟାୟ ପାଇଁ ଥାନାରେ ଲିଖିତ ଅଭିଯୋଗ କରିଛନ୍ତି। ଏଥିସହ ସେ ରାକେଶଙ୍କ ଦୁଆର ସମ୍ମୁଖରେ ନ୍ୟାୟ ପାଇଁ ଧାରଣାରେ ବସି ରହିଛନ୍ତି। ଏ ସମ୍ପର୍କରେ ଆଇଆଇସି ପରେଶ କୁମାର ମହାନ୍ତିଙ୍କୁ ପଚାରିବାରେ ଅଭିଯୋଗକୁ ଭିତ୍ତି କରି ତଦନ୍ତ ଚାଲିଛି ବୋଲି ସେ କହିଛନ୍ତି। ଏ ନେଇ ଥାନାରେ ନଂ. ୬୪/୨୨ରେ ମାମଲା ରୁଜୁ ହୋଇଛି।
