ଥିରୁଭାନନ୍ଥପୁରମ, ୨୮।୯(ପି.ଟି.): ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ବୁଧବାରଠାରୁ ୩ ମ୍ୟାଚ ବିଶିଷ୍ଟ ଅନ୍ତଜର୍ର୍ାତୀୟ ଟି୨୦ କ୍ରିକେଟ ସିରିଜ ଆରମ୍ଭ ହେବ। ଆଗକୁ ଟି୨୦ ବିଶ୍ୱକପ ରହିଥିବାରୁ ପ୍ରସ୍ତୁତି ଦୃଷ୍ଟିରୁ ଏହି ସିରିଜ ଗୁରୁତ୍ୱପୂର୍ଣ୍ଣ। ନିକଟରେ ଅଷ୍ଟ୍ରେଲିଆ ବିପକ୍ଷ ସିରିଜରେ ବିଜୟ ଲାଭ କରିଥିଲେ ମଧ୍ୟ ଡେଥ୍ ବୋଲିଂରେ ଉନ୍ନତି ଆଣିବାକୁ ପଡ଼ିବ ବୋଲି ଅଧିନାୟକ ରୋହିତ ଶର୍ମା କହିଛନ୍ତି। ଆୟୋଜକ ଦଳ ଏହାର ଦୁଇ ପ୍ରମୁଖ ବୋଲର ହାର୍ଦ୍ଦିକ ପାଣ୍ଡ୍ୟା ଓ ଭୁବନେଶ୍ୱର କୁମାରଙ୍କ ବିନା ପଡ଼ିଆକୁ ଓହ୍ଲାଇବ। ଆସନ୍ତା ମାସରେ ଆଇସିସି ଇଭେଣ୍ଟ ରହିଥିବାରୁ ସେମାନଙ୍କୁ ବିଶ୍ରାମ ଦିଆଯାଇଛି। ବିଶ୍ୱକପ୍ ପାଇଁ ରିଜର୍ଭ ଖେଳାଳି ରହିଥିବା ମହମ୍ମଦ ଶାମି ଏ ପର୍ଯ୍ୟନ୍ତ କୋଭିଡ୍ରୁ ସୁସ୍ଥ ହୋଇନାହାନ୍ତି। ସେ ଦକ୍ଷିଣ ଆଫ୍ରିକା ବିପକ୍ଷ ସିରିଜ ପାଇଁ ଉପଲବ୍ଧ ହେବେ ନାହିଁ। ତାଙ୍କ କ୍ୟାରିୟର ଇକୋନୋମି ରେଟ୍ ୯.୦୫ ରହିଛି। ଅଷ୍ଟ୍ରେଲିଆ ବିପକ୍ଷରେ ତାଙ୍କର ଆଭରେଜ ଓଭର ପିଛା ୧୨ରନ ରହିଥିଲା। ଦୀପକ ଚହର ମଧ୍ୟ ବିଶ୍ୱକପ୍ ପାଇଁ ଷ୍ଟାଣ୍ଡବାଇ ରହିଛନ୍ତି। ପୂର୍ବ ସିରିଜରେ ତାଙ୍କୁ ଗୋଟିଏ ହେଲେ ଗେମ୍ରେ ଖେଳିବା ଲାଗି ସୁଯୋଗ ମିଳି ନ ଥିଲା। ଦଳ ଯଦି ଏହାର ପେସ୍ ବୋଲରଙ୍କୁ ରୋଟେଟ କରିବାକୁ ଚାହିଁବ ତା’ହେଲେ ହୁଏତ ତାଙ୍କୁ ଗୋଟିଏ ଗେମ୍ରେ ସୁଯୋଗ ମିଳିପାରେ। ସ୍ଲଗ ଓଭରରେ ଅର୍ଶଦୀପ ସିଂ ଓ ଯଶପ୍ରୀତ ବୁମ୍ରାଙ୍କ ଯୋଡ଼ି ବେଶ୍ ପ୍ରଭାବୀ ସାବ୍ୟସ୍ତ ହେବେ ବୋଲି ଆଶା। ଇଞ୍ଜୁରିରୁ ଫେରିଥିବା ଯଶପ୍ରୀତ ବୁମ୍ରା ସମ୍ପୂର୍ଣ୍ଣ ରିଦିମ ଫେରିପାଇବା ଲାଗି ଉଦ୍ୟମ କରିବେ। ଅଷ୍ଟ୍ରେଲିଆ ବିପକ୍ଷ ସିରିଜ ନିର୍ଣ୍ଣାୟକ ମ୍ୟାଚ୍ରେ ୟୁଜବେନ୍ଦ୍ର ଚହଲ ଦେଖାଇଦେଲେ ଯେ, ଯଦି ବଲ୍ ଟର୍ନ କରେ ତାଙ୍କ ବୋଲିଂ ପ୍ରଭାବୀ ହେବ। ବିରାଟ କୋହଲି ଓ ରୋହିତ ଫର୍ମରେ ଥିବାଭଳି ମନେ ହେଉଛନ୍ତି। ବିଶ୍ୱକପ୍ ପାଇଁ ମନୋନୀତ ହୋଇଥିବା ଦୀପକ ହୁଦା ପିଠିରେ ସମସ୍ୟା ଯୋଗୁ ମଧ୍ୟ ଏହି ସିରିଜରେ ଖେଳିପାରୁନାହାନ୍ତି। ହୁଦାଙ୍କ ସ୍ଥାନରେ ଶ୍ରେୟସ ଆୟାରଙ୍କୁ ସ୍ଥାନ ମିଳିପାରେ। ଅଷ୍ଟ୍ରେଲିଆରେ ଖେଳାଯିବାକୁଥିବା ବିଶ୍ୱକପ୍ରେ ଏକ ଗ୍ରୁପ୍ ଗେମ୍ରେ ଦକ୍ଷିଣ ଆଫ୍ରିକା ଓ ଭାରତ ପରସ୍ପରକୁ ଭେଟିବେ। ‘ଅଷ୍ଟ୍ରେଲିଆର ପିଚ୍ଗୁଡ଼ିକ ହେଉଛି ଭିନ୍ନ ଏବଂ ଗ୍ରାଉଣ୍ଡ ଆକାର ମଧ୍ୟ ବହୁତ ବଡ଼। ଜଣେ ବୋଲରଙ୍କୁ ସ୍ଥାନୀୟ କଣ୍ଡିଶନକୁ ଦୃଷ୍ଟିରେ ରଖି ବୋଲିଂ କରିବାକୁ ପଡ଼ିବ। ଭାରତୀୟ ବ୍ୟାଟରମାନଙ୍କୁ ବୋଲିଂ କରିବା ଏକ ବଡ଼ ସୁଯୋଗ ବୋଲି ଦକ୍ଷିଣ ଆଫ୍ରିକା ବୋଲର ଟାବ୍ରେଜ୍ ଶାମ୍ସି ପ୍ରକାଶ କରିଛନ୍ତି। ଯୁବ ଖେଳାଳି ଟ୍ରିଷ୍ଟିଆନ୍ ଷ୍ଟବ୍ସଙ୍କ ଉପରେ ସମସ୍ତଙ୍କ ନଜର ରହିବ। ଫ୍ରାଞ୍ଚାଇଜ୍ କ୍ରିକେଟରେ ଉଚ୍ଚକୋଟୀର ପ୍ରଦର୍ଶନ ପାଇଁ ତାଙ୍କୁ ବିଶ୍ୱକପ୍ ଦଳରେ ସ୍ଥାନ ମିଳିଛି।
ଦକ୍ଷିଣ ଆଫ୍ରିକା ଦଳ: ଟେମ୍ବା ବାଭୁମା (ଅଧିନାୟକ), କ୍ୱିଣ୍ଟନ ଡି’କକ୍, ବ୍ୟର୍ନ ଫୋର୍ଟୁଇନ୍, ରିଜା ହେଣ୍ଡ୍ରିକ୍ସ, ହେନ୍ରିକ୍ କ୍ଲାସେନ, ମାର୍କୋ ଜାନ୍ସେନ୍, କେଶବ ମହାରାଜ, ଏଡେନ ମାରକ୍ରମ, ଡେଭିଡ୍ ମିଲର, ଲୁନ୍ଗି ଏନ୍ଗିଡି, ଏନ୍ରିଚ୍ ନୋର୍ଜେ, ଓ୍ବେନ ପାର୍ନେଲ, ଆଣ୍ଡିଲ ଫେଲୁକ୍ୱାୟୋ, ଡ୍ବେନ ପ୍ରିଟୋରିଅସ, କାଗିସୋ ରାବାଡ଼ା, ରିଲି ରୋସୋ, ଟାବ୍ରେଜ୍ ଶାମ୍ସି ଓ ଟ୍ରିଷ୍ଟାନ ଷ୍ଟବ୍ସ।
ଭାରତୀୟ ଦଳ: ରୋହିତ ଶର୍ମା (ଅଧିନାୟକ), କେ.ଏଲ୍. ରାହୁଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ରିଷଭ ପନ୍ତ (ଉଇକେଟକିପର), ଦୀନେଶ କାର୍ତ୍ତିକ (ଉଇକେଟକିପର), ଆର୍. ଅଶ୍ୱିନ, ୟୁଜବେନ୍ଦ୍ର ଚହଲ, ଅକ୍ଷର ପଟେଲ, ଅର୍ଶଦୀପ ସିଂ, ହର୍ଷଲ ପଟେଲ, ଦୀପକ ଚହର ଓ ଯଶପ୍ରୀତ୍ ବୁମ୍ରା।
