କୋଲକାତା, ୪।୫ ଇଣ୍ଡିଆନ ସୁପର ଲିଗ୍(ଆଇଏସ୍ଏଲ୍)ର ମେଗା ଫାଇନାଲ ଶନିବାର ସଲ୍ଟ ଲେକ୍ ଷ୍ଟାଡିୟମରେ ଅନୁଷ୍ଠିତ ହେବ। ପରସ୍ପରର ସମ୍ମୁଖୀନ ହେବେ ଦୁଇ ଶକ୍ତିଶାଳୀ ଫୁଟବଲ କ୍ଲବ ମୋହନ ବାଗାନ ସୁପର ଜାଏଣ୍ଟ ଓ ମୁମ୍ବାଇ ସିଟି ଏଫ୍ସି। ଘରୋଇ ପରିବେଶରେ ମ୍ୟାଚ ଖେଳାଯିବାକୁ ଥିବାରୁ ଗ୍ରୀନ୍ ଆଣ୍ଡ ମାରୁନ୍ (ମୋହନ ବାଗାନ) ଦଳକୁ ସମର୍ଥନ ପାଇଁ ଷ୍ଟାଡିୟମରେ ୬୨,୦୦୦ ଦର୍ଶକ ଉପସ୍ଥିତ ରହିବା ସମ୍ଭାବନା ରହିଛି।
ଦୀର୍ଘ ୨୩ ବର୍ଷ ବ୍ୟବଧାନରେ ପ୍ରଥମଥର ଡୁରାଣ୍ଡ କପ୍ ବିଜୟ ସହ ମୋହନ ବାଗାନ ଦଳର ସିଜନ ଆରମ୍ଭ ହୋଇଥିଲା। ଆଇଏସ୍ଏଲ୍ ସିଜନ ମଧ୍ୟଭାଗରେ ଦଳ ପଏଣ୍ଟ ଟେବୁଲରେ ୫ମ ସ୍ଥାନକୁ ଖସି ଆସିଥିଲା। ମାତ୍ର ଜୁଆନ ଫେରାଣ୍ଡୋଙ୍କଠାରୁ ଆଣ୍ଟୋନିଓ ହବାସ ଦାୟିତ୍ୱ ନେବା ପରେ ଦଳର ପ୍ରଦର୍ଶନରେ ଉନ୍ନତି ଆସିଥିଲା। ଫଳ ସ୍ବରୂପ ମୋହନ ବାଗାନ ପ୍ରଥମଥର ପାଇଁ ଓ୍ବନର୍ସ ଶିଲ୍ଡ ହାସଲ କରିଥିଲା। ଦୁଇ ସପ୍ତାହ ପୂର୍ବରୁ ଏହି ଷ୍ଟାଡିୟମରେ ମୁମ୍ବାଇ ସିଟି ଏଫ୍ସିକୁ ହରାଇ ମୋହନ ବାଗାନ ଶିଲ୍ଡ ବିଜୟ ପକ୍କା କରିଥିଲା। ସମାନ ଗ୍ରାଉଣ୍ଡରେ ଏବେ ଦୁଇ ଦଳ ଫାଇନାଲରେ ଅବତୀର୍ଣ୍ଣ ହୋଇଛନ୍ତି। ଡୁରାଣ୍ଡ କପ୍ ପରେ ଆଇଏସ୍ଏଲ୍ ଶିଲ୍ଡ ଜିତି ସାରିଥିବାରୁ ଏବେ ଟାଇଟଲ ଜିତି ହ୍ୟାଟ୍ରିକ ଲକ୍ଷ୍ୟରେ ରହିଛି ମୋହନ ବାଗାନ।
ଫୁଟବଲ ପରିସଂଖ୍ୟାନବିତ୍ ହରି ପ୍ରସାଦ ଚଟୋପାଧ୍ୟାୟଙ୍କ ସୂଚନା ଅନୁସାରେ ମୋହନ ବାଗାନ ୨୩ ବର୍ଷ ତଳେ ୩ରୁ ଊର୍ଦ୍ଧ୍ୱ ଟାଇଟଲ ହାସଲ କରିଥିଲା। ସେତେବେଳେ ଏହି ଦଳ ନ୍ୟାଶନାଲ ଫୁଟବଲ ଲିଗ୍ (ଏନ୍ଏଫ୍ଏଲ୍), ଫେଡେରେଶନ କପ୍ କୋଲକାତା ପ୍ରିମିୟର ଡିଭିଜନ ଲିଗ୍, ସିକ୍କିମ ଗୋଲ୍ଡ କପ୍ ଆଣ୍ଡ ବୋର୍ଦୋଲୋଇ ଟ୍ରଫି ଜିତିଥିଲା। ଭାରତୀୟ ଦଳର ଅଧିନାୟକ ସୁନୀଲ ଛେତ୍ରୀଙ୍କ ଶ୍ୱଶୁର ସୁବ୍ରତୋ ଭଟ୍ଟାଚାର୍ଯ୍ୟ ସେତେବେଳେ ମୋହନ ବାଗାନର କୋଚ୍ ଥିଲେ।
ମୁମ୍ବାଇ ସିଟି ଏଫ୍ସି ୨୦୨୦-୨୧ ସିଜନରେ ଆଇଏସ୍ଏଲ୍ ଚାମ୍ପିୟନ ହୋଇସାରିଛି। ଏବେ ମୋହନ ବାଗାନ ପାଇଁ ସୁଯୋଗ ଆସିଛି। ୩ ବର୍ଷ ତଳେ ମୋହନ ବାଗାନ ଏକଦା ୧-୦ରେ ଅଗ୍ରଣୀ ରହିଥିଲେ ମଧ୍ୟ ମାର୍ଗାଓରେ ଅନୁଷ୍ଠିତ ଫାଇନାଲରେ ସମାନ ଦଳ ନିକଟରୁ ୧-୨ ଗୋଲରେ ହାରିଯାଇଥିଲା। କୋଭିଡ-୧୯ ମହାମାରୀ ଯୋଗୁ ସେତେବେଳେ ମ୍ୟାଚ ରୁଦ୍ଧଦ୍ୱାର (କ୍ଲୋଜ୍ ଡୋର୍ସ)ରେ ଖେଳାଯାଇଥିଲା। ମାତ୍ର ଏହି ପରାଜୟର ପ୍ରତିଶୋଧ ନେବା ତାଙ୍କ ମନରେ ନାହିଁ ବୋଲି ହବାସ ସ୍ପଷ୍ଟ କରିଛନ୍ତି। ଏପରି କଥା ମୁଭି ଓ ମିଡିଆରେ ଦେଖିବାକୁ ମିଳିଥାଏ। କଷ୍ଟସାଧ୍ୟ ପ୍ରତିଦ୍ୱନ୍ଦ୍ୱୀ ବିପକ୍ଷରେ ଆମେ ଆଉ ଏକ ମ୍ୟାଚ ଖେଳିବାକୁ ଯାଉଛୁ। ସମ୍ଭାବତଃ ଏହା ଆଇଏସ୍ଏଲ୍ର ଏକ ଗ୍ରେଟ୍ ଶୋ’ ହେବ ବୋଲି ମ୍ୟାଚ ପୂର୍ବ ଖବରଦାତା ସମ୍ମିଳନୀରେ ହବାସ ପ୍ରକାଶ କରିଛନ୍ତି। ଅନିରୁଦ୍ଧ ଥାପା, ଜାସନ କୁମିଙ୍ଗ୍ସ, ଡିମିଟ୍ରି ପେଟ୍ରାଟୋସ ଓ ମନଭିର ସିଂଙ୍କୁ ନେଇ ମୋହନ ବାଗାନ ଆକ୍ରମଣକୁ ଜୋରଦାର କରିବ। ଅତିରିକ୍ତ ସମୟକୁ ନ ଯାଇ ମ୍ୟାଚ ୯୦ ମିନିଟ ମଧ୍ୟରେ ଶେଷ କରିବା ତାଙ୍କ ଲକ୍ଷ୍ୟ ବୋଲି ହବାସ କହିଛନ୍ତି।
ଅନ୍ୟପକ୍ଷରେ ମୁମ୍ବାଇ ସିଟି ଏଫ୍ସି ଆଗାମୀ ମ୍ୟାଚରେ ଡଚ୍ ମିଡ୍ଫିଲ୍ଡର ୟୋଏଲ ଭନ୍ ନିଏଫ୍ଙ୍କ ସେବାରୁ ବଞ୍ଚତ୍ତ ରହିବ। କାରଣ ସେ ସସ୍ପେଣ୍ଡ ଅଛନ୍ତି। ଗତ ୪ ବର୍ଷ ଧରି ଆଇଏସ୍ଏଲ୍ ଶିଲ୍ଡ ଓ ଟ୍ରଫି ପାଇଁ ଲଢ଼େଇ ମୁଖ୍ୟତଃ ମୁମ୍ବାଇ ଓ ମୋହନ ବାଗାନ ମଧ୍ୟରେ ହେଉଛି। ଏକ ହୋଇ ରହିବା ଓ ଦଳଗତ ପ୍ରଦର୍ଶନ ହେଉଛି ଆମ ସଫଳତାର ମନ୍ତ୍ର। ସିଜନ ଆରମ୍ଭରେ ଆମେ ଗୋଟିଏ ଗ୍ରୁପ୍ଭଳି ଥିଲୁ। ଏବେ ପରିବାର ଭଳି ହୋଇଯାଇଛୁ ଏବଂ ସେଭଳି ଖେଳୁଛୁ। ଖେଳାଳିମାନେ ସର୍ବଦା ଦର୍ଶକରେ ଭରା ଷ୍ଟାଡିୟମରେ ଖେଳିବାକୁ ଭଲ ପାଆନ୍ତି। ଏହା ସେମାନଙ୍କୁ ଅଧିକ ମୋଟିଭେଟ କରିଥାଏ ବୋଲି ମୁମ୍ବାଇ ସିଟି ଏଫ୍ସି କୋଚ୍ ପିଟର କ୍ରାଟ୍କି ପ୍ରକାଶ କରିଛନ୍ତି।
