ମାରଗାଓ,୨୦।୧୨(ପି.ଟି.): ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଶନିବାର ଅନୁଷ୍ଠିତ ମ୍ୟାଚରେ ଚେନ୍ନାଇନ୍ ଏଫ୍ସି ୨-୧ ଗୋଲରେ ଏଫ୍ସି ଗୋଆକୁ ପରାସ୍ତ କରିଛି। ଏଥିସହ ଚେନ୍ନାଇନ ୬ଟି ମ୍ୟାଚ ଖେଳି ୨ଟି ଲେଖାଏ ବିଜୟ, ଡ୍ର ଓ ପରାଜୟ ସହ ୮ ପଏଣ୍ଟ ପାଇ ତାଲିକାର ଅଷ୍ଟମ ସ୍ଥାନରେ ରହିଛି। ଅନ୍ୟପଟେ ଗୋଆ ୭ଟି ମ୍ୟାଚ ଖେଳି ୨ଟି ବିଜୟ, ୨ଟି ଡ୍ର ଓ ୩ଟି ପରାଜୟ ସହ ୮ ପଏଣ୍ଟ ପାଇ ସପ୍ତମ ସ୍ଥାନରେ ରହିଛି।
ସ୍ଥାନୀୟ ଫାଟୋର୍ଡା ଷ୍ଟାଡିୟମରେ ଅନୁଷ୍ଠିତ ଏହି ସଂଘର୍ଷପୂର୍ଣ୍ଣ ମ୍ୟାଚରେ ଚେନ୍ନାଇନ୍ ତରଫରୁ ବ୍ରାଜିଲ ଷ୍ଟ୍ରାଇକର ରାଫାଏଲ କ୍ରିଭେଲାରୋ ପଞ୍ଚମ ମିନିଟ୍ରେ ପ୍ରଥମ ଗୋଲ ଦେଇ ଦଳକୁ ଅଗ୍ରଣୀ କରାଇଥିଲେ। ତେବେ ଏହାର ଠିକ୍ ୪ ମିନିଟ୍ ପରେ ଗୋଆ ତରଫରୁ ସ୍ପେନ୍ ରାଇଟ୍ ଓ୍ବିଙ୍ଗର ଜର୍ଜ ଓର୍ଟିଜ ମେଣ୍ଡୋଜା ନବମ ମିନିଟରେ ଗୋଲ ଦେଇ ମ୍ୟାଚ ୧-୧ ସମାନସ୍ଥିତିକୁ ଆଣିଥିଲେ ଓ ଏହା ପ୍ରଥମାର୍ଦ୍ଧ ଶେଷ ପର୍ଯ୍ୟନ୍ତ ବଜାୟ ରହିଥିଲା। ଦ୍ୱିତୀୟାର୍ଦ୍ଧରେ ଚେନ୍ନାଇନ୍ ଫରଓ୍ବାର୍ଡ ରାହିମ ଅଲି ୫୩ ମିନିଟରେ ଗୋଲ ଦେଇ ଦଳକୁ ୨-୧ରେ ଅଗ୍ରଣୀ କରାଇଥିଲେ। ଇଞ୍ଜୁରି ଟାଇମ ବାବଦରେ ୬ ମିନିଟ ଖେଳ ହୋଇଥିଲେ ମଧ୍ୟ ମ୍ୟାଚରେ ଆଉ ଗୋଲ ସ୍କୋର ହୋଇ ନ ଥିଲା। ଫଳରେ ଚେନ୍ନାଇନ ବିଜୟୀ ହୋଇଥିଲା। କିନ୍ତୁ ବଲ ପଜେଶନ, ପାସ୍ ଓ ପାସ୍ ଆକ୍ୟୁରେସିରେ ଗୋଆ ଆଗରେ ରହିଥିଲା। ଉଭୟ ଦଳ ଏକାଧିକ ସୁଯୋଗ ହାତଛଡ଼ା ମଧ୍ୟ କରିଥିଲେ।
