ବାମ୍ବୋଲିମ୍,୫।୧୨: ଇଣ୍ଡିଆନ ସୁପରଲିଗ୍ (ଆଇଏସ୍ଏଲ୍)ରେ ଶୁକ୍ରବାର ଖେଳାଯାଇଥିବା ମ୍ୟାଚ୍ରେ ବେଙ୍ଗାଲୁରୁ ଏଫ୍ସି ୧-୦ ଗୋଲରେ ଚେନ୍ନାଇନ୍ ଏଫ୍ସିକୁ ପରାସ୍ତ କରିଛି। ଗୋଆର ବାମ୍ବୋଲିମ୍ସ୍ଥିତ ଜିଏମ୍ସି ଷ୍ଟାଡିୟମରେ ଅନୁଷ୍ଠିତ ଏହି ସଂଘର୍ଷପୂର୍ଣ୍ଣ ମୁକାବିଲାର ପ୍ରଥମାର୍ଦ୍ଧ ଗୋଲ ଶୂନ୍ୟ ଭାବେ ଶେଷ ହୋଇଥିଲା। ତେବେ ଦ୍ୱିତୀୟାର୍ଦ୍ଧରେ ବେଙ୍ଗାଲୁରୁ ତରଫରୁ ଅଭିଜ୍ଞ ଷ୍ଟ୍ରାଇକର ସୁନୀଲ ଛେତ୍ରୀ ୫୬ତମ ମିନିଟ୍ରେ ପେନାଲ୍ଟି ଜରିଆରେ ମ୍ୟାଚ୍ର ଏକମାତ୍ର ଗୋଲ ସ୍କୋର କରିଥିଲେ। ଚେନ୍ନାଇନ ମିଡ୍ଫିଲ୍ଡର ଅନିରୁଦ୍ଧ ଥାପ୍ପା ୧୬ତମ ମନିଟ୍ରେ ଆହତ ହୋଇ ପଡିଆ ଛାଡିଥିଲେ। ଫଳରେ ଚେନ୍ନାଇନ୍କୁ ଜବରଦସ୍ତ ଝଟ୍କା ଲାଗିଥିଲା। ତାଙ୍କ ସ୍ଥାନରେ ଏଡ୍ଓ୍ବିନ ଭାନ୍ସପଲ୍ ଖେଳିଥିଲେ। ବେଙ୍ଗାଲୁରୁ ୩ଟି ମ୍ୟାଚ୍ ଖେଳି ଗୋଟିଏ ବିଜୟ, ୨ଟି ଡ୍ର ସହ ୫ ପଏଣ୍ଟ ହାସଲ କରି ତାଲିକାର ଦ୍ୱିତୀୟ ସ୍ଥାନ ଅଧିକାର କରିଛି। ଅନ୍ୟପଟେ ଚେନ୍ନାଇନ ୩ଟି ମ୍ୟାଚ୍ ଖେଳି ଗୋଟିଏ ଲେଖାଏ ବିଜୟ, ଡ୍ର ଓ ପରାଜୟ ସହ ୪ ପଏଣ୍ଟ ପାଇ ଷଷ୍ଠ ସ୍ଥାନରେ ରହିଛି। ବେଙ୍ଗାଲୁରୁ ତା’ର ପରବର୍ତ୍ତୀ ମ୍ୟାଚ୍ ୮ ତାରିଖରେ ନର୍ଥଇଷ୍ଟ ୟୁନାଇଟେଡକୁ ଭେଟିବ। ସେହିପରି ଚେନ୍ନାଇନ୍ ୯ ତାରିଖରେ ମୁମ୍ବାଇ ସିଟି ଏଫ୍ସି ବିପକ୍ଷରେ ପଡିଆକୁ ଓହ୍ଲାଇବ। ବେଙ୍ଗାଲୁରୁ ଏଫସିର ସୁରେଶ ଓ୍ବାଙ୍ଗଜାମ ହିରୋ ଅଫ୍ ଦି ମ୍ୟାଚ ପୁରସ୍କାର ପାଇଥିଲେ।
