ନୂଆଦିଲ୍ଲୀ,୨୩।୧୦: ଭାରତୀୟ କୋର୍ଟଗୁଡ଼ିକ ବ୍ୟକ୍ତିଗତ ଅଧିକାର ଏବଂ ସ୍ବାଧୀନତାକୁ ସମର୍ଥନ କରଥାନ୍ତି। ଯେତେବେଳେ ବ୍ୟକ୍ତି କିମ୍ବା ସମାଜ ସଙ୍କଟରେ ପଡ଼ିଥାନ୍ତି, ସେତେବେଳେ ସେମାନଙ୍କ ସହାୟତା ପାଇଁ ଅଦାଲତ ହିଁ ଠିଆ ହୋଇଥାଏ। ସୁପ୍ରିମ୍କୋର୍ଟର ପ୍ରଧାନ ବିଚାରପତି ଏନ୍.ଭି. ରମନା ଶନିବାର ଏଭଳି କହିଛନ୍ତି। ବମ୍ବେ ହାଇକୋର୍ଟର ଔରଙ୍ଗାବାଦ୍ ସ୍ଥିତ ୨ଟି ଆନେକ୍ସ ବେଞ୍ଚ୍ର ଲୋକାର୍ପଣ ଉତ୍ସବରେ ଯୋଗଦେଇ ସେ ଏଭଳି କହିଛନ୍ତି।
ସାଧାରଣରେ ଏକ ଧାରଣା ରହିଛି ଯେ, କେବଳ ଅପରାଧୀ କିମ୍ବା ଅପରାଧର ଶିକାର ହୋଇଥିବା ବ୍ୟକ୍ତି କୋର୍ଟକୁ ଆସିଥାନ୍ତି।
ସେହିପରି କେତେକେ ଲୋକେ ଗର୍ବ ଅନୁଭବ କରନ୍ତି ଯେ ଜୀବନ କାଳରେ ଆମେ କେବେ କୋର୍ଟ କଚରୀ ଦେଖିନାହୁଁ। କିନ୍ତୁ, ଏଭଳି ଭ୍ରାନ୍ତ ଧାରଣା ହଟାଇବାକୁ ପଡ଼ିବ। ସାଧାରଣ ଲୋକଙ୍କ ଅଧିକାରକୁ ନିଶ୍ଚିତ କରିବା ପାଇଁ କୋର୍ଟକୁ ଆସିବା ଜରୁରୀ। ବେଳେବେଳେ ସାଧାରଣ ବ୍ୟକ୍ତି ତାଙ୍କ ଜୀବନ କାଳରେ ଏକାଧିକ ଆଇନଗତ ସମସ୍ୟାରେ ଜଡ଼ିତ ହୋଇଥାନ୍ତି। ଜଣେ ବ୍ୟକ୍ତି ଭୟରେ ଅବା ଶଙ୍କାଯୁକ୍ତ ହୋଇ କୋର୍ଟକୁ ଯିବାକୁ ଦ୍ୱିଧାବୋଧ କରିବା ଉଚିତ୍ ନୁହେଁ । ନ୍ୟାୟପାଳିକା ଉପରେ ଲୋକମାନଙ୍କର ବିଶ୍ୱାସ ହେଉଛି ଗଣତନ୍ତ୍ରର ସବୁଠାରୁ ବଡ଼ ଶକ୍ତି।
ଆଇନର ଶାସନ ଦ୍ୱାରା ପରିଚାଳିତ ଯେ କୌଣସି ସମାଜ ପାଇଁ କୋର୍ଟ ଅପରିହାର୍ଯ୍ୟ। କୋର୍ଟ କୋଠାଗୁଡ଼ିକ କେବଳ ସିମେଣ୍ଠ ଏବଂ ଇଟା ଦ୍ୱାରା ନିର୍ମିତ ସଂରଚନା ନୁହେଁ, ବରଂ ସକ୍ରିୟ ଭାବରେ ଅଧିକାରର ସାମ୍ବିଧାନିକ ଅଧିକାରକୁ ନିଶ୍ଚିତ କରାଇଥାନ୍ତି।
ଦେଶରେ ଉପଯୁକ୍ତ ନ୍ୟାୟିକ ଭିତ୍ତିଭୂମିର ଅଭାବ ରହିଥିବା ପ୍ରଧାନ ବିଚାରପତି କହିଛନ୍ତି। ଦେଶରେ ନ୍ୟାୟିକ ଅଧିକାରୀଙ୍କ ମୋଟ ଅନୁମୋଦିତ ସଂଖ୍ୟା ୨୪,୨୮୦ ଏବଂ ଉପଲବ୍ଧ କୋର୍ଟ ହଲ ସଂଖ୍ୟା ୨୦,୧୪୩ ରହିଛି। ଏଥିରେ ୬୨୦ ଭଡ଼ା ହଲ ରହିଛି। ୨୬ ପ୍ରତିଶତ କୋର୍ଟ କମ୍ପ୍ଲେକ୍ସରେ ଅଲଗା ମହିଳା ଶୌଚାଳୟ ନାହିଁ ଏବଂ୧୬ ପ୍ରତିଶତରେ ପୁରୁଷ ଟଏଲେଟ ନାହିଁ। ୫ ପ୍ରତିଶତ କୋର୍ଟରେ ପିଇବା ପାଣି ସୁବିଧା ରହିଛି। ୫ ପ୍ରତିଶତ କୋର୍ଟରେ ମେଡ଼ିକାଲ ସୁବିଧା ରହିଛି। ସେହିପରି ୩୨ ପ୍ରତିଶତ କୋର୍ଟରେ ଅଲଗା ରେକର୍ଡ ରୁମ୍ ରହିଛି। କେବଳ ୫୧ ପ୍ରତିଶତ କୋର୍ଟରେ ଲାଇବ୍ରେରୀ ରହିଛି। ୨୭ ପ୍ରତିଶତ କୋର୍ଟରେ କମ୍ପ୍ୟୁଟର ମାଧ୍ୟମରେ ଭିଡ଼ିଓ କନଫରେନ୍ସିଂ ସୁବିଧା ରହିଛି ବୋଲି ସେ କହିଛନ୍ତି।
ପ୍ରଭାବଶାଳୀ ନ୍ୟାୟପାଳିକା ଦ୍ୱାରା ଦେଶର ଅର୍ଥନୈତିକ ବିକାଶ ସମ୍ଭବ ହୋଇ ପାରିଥାଏ। ୨୦୧୮ରେ ପ୍ରକାଶିତ ଅନ୍ତର୍ଜାତୀୟ ଅନୁସନ୍ଧାନ ଅନୁଯାୟୀ, ଠିକ ସମୟରେ ନ୍ୟାୟ ପ୍ରଦାନରେ ବିଫଳତା ଯୋଗୁ ଦେଶର ବାର୍ଷିକ ଜିଡିପିର ୯ ପ୍ରତିଶତ ସମାନ ଅର୍ଥ ଖର୍ଚ୍ଚ ହୋଇଥାଏ। ଏକ ସମର୍ଥିତ ନ୍ୟାୟପାଳିକାର ପ୍ରଭାବ ବିଦେଶୀ ପୁଞ୍ଜି ନିବେଶ ଉପରେ ମଧ୍ୟ ପଡ଼ିଥାଏ। ପର୍ଯ୍ୟାପ୍ତ ଭିତ୍ତିଭୂମି ବିନା ଆମେ ଏହି ଶୂନ୍ୟସ୍ଥାନ ପୂରଣ କରିବା କଷ୍ଟକର ବୋଲି ସେ କହିଛନ୍ତି।
