ନୂଆଦିଲ୍ଲୀ,୧୨।୧୧:ଭାରତ ଏବଂ ପଡୋଶୀ ବାଂଲାଦେଶ ମଧ୍ୟରେ ସମ୍ପର୍କ ଆହୁରି ମଜଭୁତ କରିବା ପାଇଁ ପ୍ରୟାସ ଚାଲିଛି। ଏହି କ୍ରମରେ ଭାରତୀୟ ସେନା ପକ୍ଷରୁ ବାଂଲାଦେଶ ସେନାକୁ ପ୍ରଶିକ୍ଷିତ ୨୦ଟି ସୈନ୍ୟ ଘୋଡା ଏବଂ ବାରୁଦ ସୁଡଙ୍ଗ ସନ୍ଧାନକାରୀ ୧୦ କୁକୁର ଉପହାର ସ୍ବରୂପ ଦିଆଯାଇଛି। ଏହି କୁକୁରଗୁଡିକୁ ଭାରତୀୟ ସେନାର ରିମାଉଣ୍ଟ ଆଣ୍ଡ ଭେଟେନାରୀ କ୍ରପ୍ସରେ ପ୍ରଶିକ୍ଷଣ ଦିଆଯାଇଛି। ଏହାସହ ସେମାନଙ୍କୁ ସମ୍ଭାଳିବା ପାଇଁ ବାଂଲାଦେଶ ସେନାଙ୍କୁ ମଧ୍ୟ ଶିକ୍ଷା ଦିଆଯାଇଛି। ଘୋଡା ଏବଂ କୁକୁର ପ୍ରଦାନ କାର୍ଯ୍ୟକ୍ରମ ଭାରତ-ବାଂଲାଦେଶ ସୀମାରେ ଥିବା ପେଟ୍ରାପୋଲ-ବେନାପୋଲ ଯାଞ୍ଚ ଚୌକିରେ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମରେ ଢାକାସ୍ଥିତ ଭାରତୀୟ ଉଚ୍ଚାୟୁକ୍ତ ବ୍ରିଗେଡିୟର ଜେଏସ ଚିମା ଉପସ୍ଥିତ ଥିଲେ। ଭାରତୀୟ ସେନାର ପ୍ରତିନିଧିମଣ୍ଡଳ ନେତୃତ୍ୱ ମେଜର ଜେନେରାଲ ନିରିନ୍ଦର ସିଂ ନେଇଥିବାବେଳେ ବାଂଲାଦେଶର ପ୍ରତିନିଧିମଣ୍ଡଳ ନେତୃତ୍ୱ ମେଜର ଜେନେରାଲ ମହମ୍ମଦ ହୁମାୟୁଂ କବିର ନେଇଥିଲେ।
