ନୂଆଦିଲ୍ଲୀ,୩୧।୩: ଲୋକ ସଭା ନିର୍ବାଚନ ପାଇଁ ଭାଜପା ଶନିବାର ଅଷ୍ଟମ ପର୍ଯ୍ୟାୟରେ ୧୧ ପ୍ରାର୍ଥୀଙ୍କ ତାଲିକା ଘୋଷଣା କରିଥିବାବେଳେ ଅଭିନେତା ତଥା ବର୍ତ୍ତମାନର ଏମ୍ପି ସନ୍ନି ଦେଓଲ ଗୁର୍ଦାସପୁର ଆସନରୁ ବାଦ୍ ପଡ଼ିଛନ୍ତି। ପୂର୍ବତନ କୂଟନୀତିଜ୍ଞ ତରନଜିତ ସାନ୍ଧୁଙ୍କୁ ଦଳ ଅମୃତସରରୁ ପ୍ରାର୍ଥୀ କରିଛି। ପଞ୍ଜାବର ୧୩ ଆସନ ମଧ୍ୟରୁ ଶନିବାର ଭାଜପା ୬ଟିରେ ପ୍ରାର୍ଥୀ ଦେଇଛି। ବର୍ତ୍ତମାନ ଦିଲ୍ଲୀ ନର୍ଥଓ୍ବେଷ୍ଟ ଆସନରୁ ଭାଜପା ଏମ୍ପି ଥିବା ହଂସରାଜ ହଂସଙ୍କୁ ଫରିଦାବାଦ ଆସନରୁ ପ୍ରାର୍ଥୀ କରାଯାଇଛି। ରଭନୀତ ସିଂ ବିଟ୍ଟୁଙ୍କୁ ଲୁଧିଆନା ଆସନରୁ ଏବଂ ପଞ୍ଜାବର ପୂର୍ବତନ ମୁଖ୍ୟନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂଙ୍କ ସ୍ତ୍ରୀ ପ୍ରେନିତ କୌରଙ୍କୁ ପଟିଆଲା ଆସନରୁ ପ୍ରାର୍ଥୀ କରାଯାଇଛି। ଭାଜପାରେ ଯୋଗଦେଇଥିବା ଆମ୍ ଆଦ୍ମୀ ପାର୍ଟି ନେତା ସୁଶୀଲ କୁମାର ରିଙ୍କୁ ଜଳନ୍ଧରରୁ ଲଢ଼ିବାକୁ ଯାଉଛନ୍ତି। ଅଷ୍ଟମ ପର୍ଯ୍ୟାୟରେ ଓଡ଼ିଶାରୁ ୩ ଜଣଙ୍କୁ ପ୍ରାର୍ଥୀ କରାଯାଇଛି। ଭର୍ତ୍ତୃହରି ମହତାବ କଟକରୁ ପ୍ରାର୍ଥୀ ହୋଇଥିବାବେଳେ ରବୀନ୍ଦ୍ର ନାରାୟଣ ବେହେରା ଯାଜପୁରରୁ ଏବଂ ସୁକାନ୍ତ କୁମାର ପାଣିଗ୍ରାହୀ କନ୍ଧମାଳରୁ ପ୍ରାର୍ଥୀ ହୋଇଛନ୍ତି। ସେହିପରି ପଶ୍ଚିମବଙ୍ଗର ୨ ଆସନ ପାଇଁ ଭାଜପା ଶନିବାର ପ୍ରାର୍ଥୀ ଘୋଷଣା କରିଛି।
