ନୂଆଦିଲ୍ଲୀ,୧ା୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନେପାଳର ପ୍ରଧାନମନ୍ତ୍ରୀ ପୁଷ୍ପ କମଲ ଦହଲ (ପ୍ରଚଣ୍ଡ)ଙ୍କ ସହ ମିଳିତ ସାମ୍ବାଦିକ ସମ୍ମିଳନୀରେ ମନେ ପକାଇ ଦେଇଛନ୍ତି ଯେ, ୯ ବର୍ଷ ପୂର୍ବେ ଅର୍ଥାତ୍ ୨୦୧୪ରେ କାର୍ଯ୍ୟଭାର ଗ୍ରହଣ କରିବାର ତିନିମାସ ମଧ୍ୟରେ ସେ ନେପାଳ ଗସ୍ତରେ ଯାଇଥିଲେ। ସେତେବେଳେ ଭାରତ-ନେପାଳ ସମ୍ପର୍କ ପାଇଁ ଏକ ‘HIT’ (ହାଇଓ୍ବେ , ଆଇ-ଓ୍ବେ, ଏବଂ ଟ୍ରାନ୍ସ-ଓ୍ବେ) ସୂତ୍ର ଦିଆଯାଇଥିଲା। ପ୍ରଧାନମନ୍ତ୍ରୀ କହିଛନ୍ତି, ଭବିଷ୍ୟତରେ ଆମର ସହଭାଗିତାକୁ ସୁପରହିଟ୍ କରିବା ପାଇଁ ଆଜି ନୋପାଳ ପ୍ରଧାନମନ୍ତ୍ରୀ ଏବଂ ମୁଁ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛୁ। ଆଜି ଗମନାଗମନ ଚୁକ୍ତି ହୋଇଛି।
ପ୍ରଧାନମନ୍ତ୍ରୀ ଗୁରୁବାର ନେପାଳର ପ୍ରଧାନମନ୍ତ୍ରୀଙ୍କ ସହ ଏକ ପ୍ରତିନିଧିସ୍ତରୀୟ ବୈଠକ କରିଛନ୍ତି। ଏହି ସମୟରେ ଅର୍ଥନୀତି, ଶକ୍ତି, ଭିତ୍ତିଭୂମି, ଶିକ୍ଷା କ୍ଷେତ୍ର ଏବଂ ଦୁଇ ଦେଶ ମଧ୍ୟରେ ଲୋକ-ସମ୍ପର୍କକୁ ମଜବୁତ କରିବା ଉପରେ ଆଲୋଚନା କରାଯାଇଥିଲା। ମୋଦି କହିଛନ୍ତି, ଆଜି ଭାରତ ଏବଂ ନେପାଳ ମଧ୍ୟରେ ‘ଦୀର୍ଘକାଳୀନ ଶକ୍ତି ବାଣିଜ୍ୟ ଚୁକ୍ତି’ ହୋଇଛି। ଏଥିରେ ଆମେ ଆସନ୍ତା ୧୦ ବର୍ଷ ମଧ୍ୟରେ ନେପାଳରୁ ୧୦ ହଜାର ମେଗାଓ୍ବାଟ ଶକ୍ତି ଆମଦାନୀ କରିବାକୁ ଏକ ଲକ୍ଷ୍ୟ ସ୍ଥିର କରିଛୁ।
