ନୂଆଦିଲ୍ଲୀ,୨୭।୧: ପାକିସ୍ତାନକୁ ପୁଣିଥରେ ଜାତିସଂଘରେ ଝଟକା ଲାଗିଛି। ଭାରତୀୟ ରାଷ୍ଟ୍ରଦୂତ ଜାତିସଂଘ ମଞ୍ଚରୁ ପାକିସ୍ତାନକୁ କଟାକ୍ଷ କରିଛନ୍ତି। ଏହି ସମୟରେ ସେ ଅପରେଶନ ସିନ୍ଦୂର, ଜମ୍ମୁ କଶ୍ମୀର, ଆତଙ୍କବାଦ ଏବଂ ୨୭ତମ ସଂଶୋଧନ ବିଷୟରେ ମିଥ୍ୟା ପ୍ରଚାର ପାଇଁ ପାକିସ୍ତାନକୁ କଡ଼ା ସମାଲୋଚନା କରିଥିଲେ।
ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ପାର୍ବଥନେନୀ ହରିଶ ପାକିସ୍ତାନର ପର୍ଦ୍ଦାଫାସ କରି କହିଛନ୍ତି, ‘ପାକିସ୍ତାନର ଏକମାତ୍ର ଏଜେଣ୍ଡା ହେଉଛି ଆମ ଦେଶ (ଭାରତ) ଏବଂ ଆମ ଲୋକଙ୍କୁ କ୍ଷତି ପହଞ୍ଚାଇବା। ପାକିସ୍ତାନ ଅପରେଶନ ସିନ୍ଦୂର ବିଷୟରେ ପୂର୍ବରୁ ମିଥ୍ୟା ଦାବି କରିସାରିଛି।’
ହରିଶ କହିଛନ୍ତି, ‘୯ ମଇ, ୨୦୨୫ ପର୍ଯ୍ୟନ୍ତ ପାକିସ୍ତାନ ଲଗାତାର ଭାରତ ଉପରେ ଆକ୍ରମଣ କରିବାକୁ ଧମକ ଦେଉଥିଲା, କିନ୍ତୁ ୧୦ ମଇରେ ପାକିସ୍ତାନୀ ସେନା ହଠାତ ଭାରତୀୟ ସେନା ସହିତ ଯୋଗାଯୋଗ କରି ଯୁଦ୍ଧବିରତି ଅନୁରୋଧ କରିଥିଲା। ଅପରେଶନ ସିନ୍ଦୂର ସମୟରେ, ଭାରତ ଅନେକ ପାକିସ୍ତାନୀ ଏୟାରବେସ ନଷ୍ଟ କରିଦେଇଥିଲା। ଭଙ୍ଗା ରନୱେ ଏବଂ ପୋଡ଼ିଯାଇଥିବା ହ୍ୟାଙ୍ଗରର ଚିତ୍ର ମଧ୍ୟ ସାର୍ବଜନୀନ କରାଯାଇଥିଲା।’
ହରିଶ ପାକିସ୍ତାନକୁ ଚେତାବନୀ ଦେଇ କହିଛନ୍ତି,
‘ପାକିସ୍ତାନର ପ୍ରତିନିଧିମାନେ ସବୁକିଛି ସ୍ବାଭାବିକ ବୋଲି ଦାବି କରୁଛନ୍ତି, କିନ୍ତୁ ମୁଁ ପୁଣି ଥରେ କହିବାକୁ ଚାହୁଁଛି ଯେ ଯେପର୍ଯ୍ୟନ୍ତ ସେମାନଙ୍କ ଦେଶରେ ଆତଙ୍କବାଦ ରହିଛି, ସେପର୍ଯ୍ୟନ୍ତ କିଛି ସ୍ବାଭାବିକ ହୋଇପାରିବ ନାହିଁ। ପାକିସ୍ତାନ ଭାରତ ବିରୁଦ୍ଧରେ ଆତଙ୍କବାଦକୁ ଅସ୍ତ୍ର ଭାବରେ ବ୍ୟବହାର କରିଆସୁଛି। ଏହାକୁ ସହ୍ୟ କରାଯିବ ନାହିଁ।’
ପାକିସ୍ତାନକୁ ନିନ୍ଦା କରି ହରିଶ କହିଛନ୍ତି ଯେ ଜାତିସଂଘ ପାକିସ୍ତାନ ପାଇଁ ଆତଙ୍କବାଦକୁ ବୈଧ କରିବା ପାଇଁ ଏକ ମଞ୍ଚ ହୋଇପାରିବ ନାହିଁ। ପାକିସ୍ତାନର ଭାରତର ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ କରିବାର କୌଣସି ଅଧିକାର ନାହିଁ। କେନ୍ଦ୍ରଶାସିତ ଅଞ୍ଚଳ ଜମ୍ମୁ ଏବଂ କଶ୍ମୀର ଭାରତର ଏକ ଅଭିନ୍ନ ଏବଂ ଅବିଚ୍ଛେଦ୍ୟ ଅଂଶ ଥିଲା, ଅଛି ଏବଂ ସର୍ବଦା ରହିବ।
ଜାତିସଂଘରେ ଭାରତୀୟ ରାଷ୍ଟ୍ରଦୂତ ପାକିସ୍ତାନର ୨୭ତମ ସମ୍ବିଧାନ ସଂଶୋଧନ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି, ‘ପାକିସ୍ତାନକୁ ତୁରନ୍ତ ଆତ୍ମସମୀକ୍ଷା କରିବାକୁ ପଡିବ। ଏହା ୨୭ତମ ସଂଶୋଧନ ସହିତ ଆରମ୍ଭ ହୋଇପାରେ, ଯାହା ସେନାକୁ ବିଦ୍ରୋହ କରିବା ଏବଂ କିଛି ମନୋନୀତ ଲୋକଙ୍କୁ ଜୀବନବ୍ୟାପୀ କ୍ଷମତାରେ ରହିବା ପାଇଁ ପଥ ପ୍ରଶସ୍ତ କରେ।’
nbsp;
