ଅହମଦାବାଦ,୨୬।୮: ସାରା ଦେଶରେ କରୋନା ପ୍ରକୋପ ଜାରି ରହିଛି। ପ୍ରତିଦିନ ଏଠାରେ ହଜାର ହଜାର ସଂଖ୍ୟାରେ ଆକ୍ରାନ୍ତ ଚିହ୍ନଟ ହେଉଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଇବାରେ ଲାଗିଛି। ଇତିମଧ୍ୟରେ ଏକ ଚାଞ୍ଚଲ୍ୟକର ଖବର ସାମ୍ନାକୁ ଆସିଛି। ଭାରତରେ ପ୍ରଥମ ଥର ଜଣେ ବ୍ୟକ୍ତି ଦ୍ୱିତୀୟ ଥର କରୋନାରେ ସଂକ୍ରମିତ ହୋଇଛନ୍ତି। ଏହି ଖବର ସାମ୍ନାକୁ ଆସିବା ପରେ ଲୋକଙ୍କ ମନରେ କୋକୁଆଭୟ ଖେଳିଯାଇଛି। ତେବେ ଏହି ମାମଲା ଦେଶରେ ପ୍ରଥମ ଥର ଦେଖିବାକୁ ମିଳିଛି। ଗୁଜରାଟ ଅହମଦାବାଦରେ ପ୍ରଥମ ଥର ଜଣେ ମହିଳା ସଂକ୍ରମିତ ହେବାର ୪ ମାସ ପରେ ପୁଣି ଥରେ ସଂକ୍ରମିତ ହୋଇଥିବା ଜଣାପଡ଼ିଛି। ସୂଚନାଯୋଗ୍ୟ, ଅହମଦାବାଦରେ ରହୁଥିବା ଜଣେ ୫୪ବର୍ଷୀୟ ମହିଳା ଏପ୍ରିଲ ୧୮ରେ କରୋନାରେ ଆକ୍ରାନ୍ତ ହୋଇଥିବାରୁ ତାଙ୍କୁ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା। ସୁସ୍ଥ ହେବା ପରେ ତାଙ୍କୁ ଡିସ୍ଚାର୍ଜ କରାଯାଇଥିଲା। ତେବେ ୧୨୪ ଦିନ ପରେ ଉକ୍ତ ମହିଳା ପୁଣି ଥରେ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ଏବେ ପୁଣି ତାଙ୍କୁ ଅହମଦାବାଦର କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନା ମୁତାବକ ଉକ୍ତ ମହିଳାଙ୍କ ପୁଅ ଏୟାରଫୋର୍ସରେ ଥିବା ବେଳେ ନିକଟରେ ତାଙ୍କ ପୁଅ, ବୋହୁ ଓ ତାଙ୍କର ୩ବର୍ଷର ପୁଅ ଦିଲ୍ଲୀରୁ ଅହମଦାବାଦ ଆସିଥିଲେ। ଏହାର କିଛି ଦିନ ପରେ ଉକ୍ତ ମହିଳା ଓ ତାଙ୍କ ପୁଅଙ୍କୁ ଜ୍ୱର ହୋଇଥିଲା। କରୋନା ଯାଞ୍ଚ କରିବା ପରେ ଦୁହିଁଙ୍କ ରିପୋର୍ଟ ପଜିଟିଭ୍ ଆସିଥିଲା। ପୁଅଙ୍କୁ ଅହମଦାବାଦ ଡିଫେନ୍ସ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ତାଙ୍କ ମା’ଙ୍କୁ ରତନ ହସ୍ପିଟାଲରେ ଭର୍ତ୍ତି କରାଯାଇଛି। ତେବେ ଉକ୍ତ ମହିଳାଙ୍କ ନମୁନା ରିସର୍ଚ୍ଚ ପାଇଁ ପୁନେ ଲ୍ୟାବକୁ ପଠାଯାଇଛି। ଏଥିସହ ଆଇସିଏମ୍ଆରକୁ ଏନେଇ ସୂଚନା ଦିଆଯାଇଛି।
