ନୂଆଦିଲ୍ଲୀ,୧୩।୯: ବିରୋଧୀ ମେଣ୍ଟ ‘ଇଣ୍ଡିଆ’ର ୧୪ ଜଣିଆ ସମନ୍ବୟ କମିଟିର ପ୍ରଥମ ବୈଠକ ଆଜି ଏନସିପି ମୁଖ୍ୟ ଶରଦ ପାୱାରଙ୍କ ବାସଭବନରେ ଅନୁଷ୍ଠିତ ହୋଇଯାଇଛି। ବୈଠକ ପରେ କଂଗ୍ରେସ ସାଧାରଣ ସମ୍ପାଦକ କେ.ସି ଭେନୁଗୋପାଲ କହିଛନ୍ତି ଯେ, ଆସନ ବାଣ୍ଟିବା ପାଇଁ ପ୍ରକ୍ରିୟା ଆରମ୍ଭ କରିବାକୁ ସମନ୍ବୟ କମିଟି ନିଷ୍ପତ୍ତି ନେଇଛି। ଏନେଇ ସହଯୋଗୀମାନେ ଆଲୋଚନା କରିବେ ଏବଂ ଯଥାଶୀଘ୍ର ନିଷ୍ପତ୍ତି ନେବେ। ଅକ୍ଟୋବରର ପ୍ରଥମ ସପ୍ତାହରେ ଭୋପାଳରେ ମିଳିତ ମେଣ୍ଟର ପ୍ରଥମ ସାଧାରଣ ସଭା ଅନୁଷ୍ଠିତ ହେବ।
ବୈଠକ ପୂର୍ବରୁ କମିଟି ସଦସ୍ୟ ତଥା ଏଏପି ଏମ୍ପି ରାଘବ ଚଢା କହିଥିଲେ ଯେ, ଲୋକଙ୍କ ନିକଟରେ ପହଞ୍ଚିବା, ମିଳିତ ସମାବେଶ ଯୋଜନା କରିବା ଏବଂ ଦେଶର ଘରେ ଘରେ ଅଭିଯାନ ଚଳାଇବା ଭଳି ପ୍ରସଙ୍ଗ ଉପରେ ଆଲୋଚନା କରାଯିବ। ଏହି ସହଯୋଗୀ ଦଳକୁ ସଫଳ କରିବା ପାଇଁ ପ୍ରତ୍ୟେକ ରାଜନୈତିକ ଦଳକୁ ତିନୋଟି ଜିନିଷ ମହତ୍ୱାକାଂକ୍ଷା, ମତଭେଦ ଏବଂ ମନଭେଦ ତ୍ୟାଗ କରିବାକୁ ପଡ଼ିବ।
