ଜୋହାନ୍ସବର୍ଗ,୧୪ା୧୨(ପି.ଟି.): ଗୁରୁବାର ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ ଖେଳାଯିବ। ପ୍ରଥମ ଟି୨୦ ମ୍ୟାଚ୍ ବର୍ଷାରେ ଧୋଇଯାଇଥିବା ବେଳେ ଦ୍ୱିତୀୟ ମ୍ୟାଚ୍ରେ ଭାରତ ପରାଜିତ ହୋଇଥିଲା। ତୃତୀୟ ମ୍ୟାଚ୍ ପାଇଁ ସିରିଜ ବାଜିରେ ରହିଥିବା ବେଳେ ଭାରତ ଏହାର ବୋଲିଂ ଦୁର୍ବଳତା ସୁଧାରିବାକୁ ପ୍ରୟାସ କରିବ। ଜୋହାନ୍ସବର୍ଗରେ ଅନ୍ତିମ ମ୍ୟାଚ୍ ଖେଳାଯିବାକୁ ଥିବାବେଳେ ଅର୍ଶଦୀପ ସିଂ ଓ ମୁକେଶ କୁମାର ନିଜ ଫର୍ମ ସୁଧାରିବାକୁ ଚାହିଁବେ। ମଙ୍ଗଳବାର ଖେଳା ଯାଇଥିବା ମ୍ୟାଚ୍ରେ ଦକ୍ଷିଣ ଆଫ୍ରିକାକୁ ଓଭର ପିଛା ୧୦ ହାରରେ ରନ୍ ସଂଗ୍ରହ କରିବାକୁ ଥିବାବେଳେ ଭାରତୀୟ ବୋଲରମାନେ ଅତ୍ୟନ୍ତ ଦୟନୀୟ ପ୍ରଦର୍ଶନ କରିଥିଲେ। ଖାସ କରି ଅର୍ଶଦୀପ ଓ ମୁକେଶ କୁମାରଙ୍କ ଇକୋନୋମି ଚିନ୍ତାଜନକ ରହିଥିଲା। ଅର୍ଶଦୀପ ୧୫.୫୦ ଓ ମୁକେଶ ୧୧.୩୩ର ଇକୋନୋମିରେ ବୋଲିଂ କରିଥିଲେ। ଯଦିଓ ପୋର୍ଟ ଏଲିଜାବେଥ୍ରେ ବର୍ଷା ଓ କାକର ରନ୍ଚେଜ୍କୁ ଅତ୍ୟନ୍ତ ସହଜ କରି ଦେଇଥିଲା ତଥାପି ମୁକେଶ ଓ ଅର୍ଶଦୀପଙ୍କ ଲାଇନ୍ ଓ ଲେନ୍ଥ ଠିକ୍ ରହି ନ ଥିଲା। ବ୍ୟକ୍ତିଗତ କାରଣରୁ ଦୀପକ ଚହର ବାଦ୍ ପଡିବା ଭାରତୀୟ ଦଳର ସମସ୍ୟାକୁ ଦ୍ୱିଗୁଣିତ କରିଛି। ସମାନ ବୋଲିଂ ଲାଇନ୍ଅପ୍ ସହିତ ଦଳ ଅଷ୍ଟ୍ରେଲିଆ ବିପକ୍ଷରେ ୪-୧ରେ ବିଜୟୀ ହୋଇଥିଲେ ମଧ୍ୟ ଦକ୍ଷିଣ ଆଫ୍ରିକା ସମ୍ମୁଖରେ ଏହା ନିଷ୍ପ୍ରଭ ମନେହୋଇଛି। ବେଙ୍ଗାଲୁରୁରେ ଖେଳାଯାଇଥିବା ଅନ୍ତିମ ମ୍ୟାଚ୍କୁ ଛାଡିଲେ ଅର୍ଶଦୀପଙ୍କ ବୋଲିଂ ବେଶ୍ ଦୁର୍ବଳ ମନେହେଉଛି। ଅନ୍ୟପକ୍ଷରେ ଅଷ୍ଟ୍ରେଲିଆ ବିପକ୍ଷରେ ମୁକେଶଙ୍କ ଇକୋନୋମି ମଧ୍ୟ ୯.୧୨ ରହିଥିଲା।
ଟି୨୦ ବିଶ୍ୱକପ୍ ପୂର୍ବରୁ ମାତ୍ର ୪ଟି ଟି୨୦ ମ୍ୟାଚ୍ ରହିଥିବା ବେଳେ ଭାରତୀୟ ଖେଳାଳି ଏହାର ଫାଇଦା ଉଠାଇ ଦଳରେ ନିଜ ସ୍ଥାନ ମଜଭୁତ କରିବାକୁ ଚାହିଁବେ। ଦୀର୍ଘ ୧୬ ମାସ ପରେ ଟି୨୦ ଦଳକୁ ପ୍ରତ୍ୟାବର୍ତ୍ତନ କରିଥିବା ରବୀନ୍ଦ୍ର ଜାଡେଜା ମଧ୍ୟ ପ୍ରଭାବିତ କରିବାରେ ଅସଫଳ ରହିଛନ୍ତି। ତେବେ ଅନ୍ତିମ ମ୍ୟାଚ୍ରେ ଭାରତୀୟ ଉପଅଧିନାୟକ ମିଳିଥିବା ସୁଯୋଗର ସଦ୍ବ୍ୟବହାର କରିବାକୁ ଚାହିଁବେ। ଅପରାଜିତ ଅର୍ଦ୍ଧଶତକ ହାସଲ କରିଥିବା ରିଙ୍କୁ ସିଂ ଅନ୍ତିମ ମ୍ୟାଚ୍ରେ ଦଳର ବିଜୟରେ ଯୋଗଦାନ କରିବାକୁ ଚାହିଁବେ। ପଦାର୍ପଣ ପରଠାରୁ ହିଁ ରିଙ୍କୁ ଚମତ୍କାର ବ୍ୟାଟିଂ କରିଛନ୍ତି। ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ନିଜର ଚମତ୍କାର ଫର୍ମ ବଜାୟ ରଖି ଆଉ ଏକ ଅର୍ଦ୍ଧଶତକ ହାସଲ କରିଥିଲେ। ତେବେ ଯଦି ଋତୁରାଜ ଗାଏକ୍ୱାଡ ପ୍ରତ୍ୟାବର୍ତ୍ତନ କରନ୍ତି ତେବେ କିଏ ବାଦ୍ ପଡିବେ ତାହାକୁ ନେଇ ବଡ ପ୍ରଶ୍ନବାଚୀ ସୃଷ୍ଟି ହୋଇଛି। ଦ୍ୱିତୀୟ ମ୍ୟାଚ୍ରେ ଉଭୟ ଗିଲ୍ ଓ ଜୟସ୍ବାଲ ଦକ୍ଷିଣ ଆଫ୍ରିକୀୟ ପରିବେଶର ବାଉନ୍ସକୁ ମୁକାବିଲା କରିବାରେ ବିଫଳ ହୋଇଥିଲେ। ତେବେ ପାରମ୍ପରିକ ଭାବରେ ଜୋହାନ୍ସବର୍ଗର ରେକର୍ଡ ଭାରତ ସପକ୍ଷରେ ରହିଛି। ଟି୨୦ର ଏହି ଭେନ୍ୟୁରେ ଉଭୟ ଦଳ ୪ ଥର ସାମ୍ନାସାମି୍ନ ହୋଇଥିବାବେଳେ ଭାରତ ୩ ଥର ବିଜୟୀ ହୋଇଛି। ଦକ୍ଷିଣ ଆଫ୍ରିକା ବ୍ୟାଟିଂ ଠିକ୍ଠାକ୍ ରହିଥିବା ବେଳେ ଏହାର ବୋଲିଂ ବେଶ୍ ଦୁର୍ବଳ ରହିଛି। ଅନ୍ତିମ ମ୍ୟାଚ୍ରେ ଏହି ଦୁର୍ବଳତା ସୁଧାରିବାକୁ ଦଳ ପ୍ରୟାସ କରିବ।
