ନୂଆଦିଲ୍ଲୀ,୧୮।୯:ଦେଶରେ କରୋନା ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଉଛି। ବର୍ତ୍ତମାନ ପର୍ଯ୍ୟନ୍ତ ୫୨,୧୪,୬୭୮ ଜଣ କରୋନା ସଂକ୍ରମିତ ହୋଇଥିବାବେଳେ ୮୪,୩୭୨ ଜଣଙ୍କର ମୃତ୍ୟୁ ହୋଇଛି। କରୋନା ସଂକ୍ରମିତ ମଧ୍ୟରେ ଇଣ୍ଡିଆନ ମେଡିକାଲ ଆସୋସିଏଶନ (ଆଇଏମଏ) କରୋନା ରୋଗୀଙ୍କ ଚିକିତ୍ସା ସମୟରେ ମୃତ୍ୟୁବରଣ କରିଥିବା ଡାକ୍ତରଙ୍କ ପାଇଁ ସ୍ବର ଉତ୍ତୋଳନ କରିଛି। କରୋନା ଯୋଗୁ ମୃତ୍ୟୁ ଘଟିଥିବା ଡାକ୍ତରଙ୍କ ମୃତ୍ୟୁ ବିଷୟରେ ସ୍ବାସ୍ଥ୍ୟମନ୍ତ୍ରୀ ଡକ୍ଟର ହର୍ଷ ବର୍ଦ୍ଧନ ସଂସଦରେ କୌଣସି ଉଲ୍ଲେଖ କରିନାହାଁନ୍ତି। ଏହାକୁ ନେଇ ଆଇଏମଏ ଅସନ୍ତୋଷ ବ୍ୟକ୍ତ କରିଛି। ଏହି ସଂକ୍ରମଣ ହେତୁ ପ୍ରାଣ ହରାଇଥିବା ୩୮୨ ଡାକ୍ତରଙ୍କ ତାଲିକା ଆଇଏମଏ ଜାରି କରିଛି। ମୃତ ଡାକ୍ତରଙ୍କୁ ଶହୀଦ ମାନ୍ୟତା ଦେବାକୁ ସରକାରଙ୍କ ନିକଟରେ ଆଇଏମଏ ଦାବି କରିଛି। ନିକଟରେ ସ୍ବାସ୍ଥ୍ୟ ରାଷ୍ଟ୍ରମନ୍ତ୍ରୀ ଅଶ୍ୱିନୀ କୁମାର ଚୌବେ ଗୃହରେ କହିଥିଲେ ଯେ ଜନସ୍ବାସ୍ଥ୍ୟ କେନ୍ଦ୍ର ଏବଂ ଡାକ୍ତରଖାନା ରାଜ୍ୟ ଅଧୀନରେ ଆସୁଛି ତେଣୁ କେନ୍ଦ୍ର ସରକାରଙ୍କ ନିକଟରେ ବୀମା କ୍ଷତିପୂରଣର କୌଣସି ତଥ୍ୟ ଉପଲବ୍ଧ ନାହିଁ। ମନ୍ତ୍ରୀଙ୍କ ଏଭଳି ବିବୃତ୍ତିରେ ଆଇଏମ୍ଏ ଆପତ୍ତି ଉଠାଇଛି। ଆଇଏମଏ ଅସନ୍ତୋଷ ବ୍ୟକ୍ତ କରି କହିଛି ଯେ ସଂସଦରେ ଏପରି ବିବୃତ୍ତି ଜାତୀୟ ହିରୋମାନଙ୍କୁ ଅପମାନ ଦେବା ସଦୃଶ। ଏଭଳି ସମୟରେ ଲୋକଙ୍କ ପାଇଁ କାମ କରୁଥିବା ରାଷ୍ଟ୍ର ନାୟକଙ୍କ ପାଇଁ ତ୍ୟାଗ ଏବଂ କର୍ତ୍ତବ୍ୟରୁ ପଛଘୁଞ୍ଚା ଦେବା ଭଳି ହୋଇଛି। ସୂଚନାଯୋଗ୍ୟ, ଆଇଏମଏ ପକ୍ଷରୁ ଜାରି କରାଯାଇଥିବା ତାଲିକା ଅନୁସାରେ, ଏ ପର୍ଯ୍ୟନ୍ତ କରୋନାରେ ୨୨୩୮ ଡାକ୍ତର ସଂକ୍ରମିତ ହୋଇଛନ୍ତି ଏବଂ ୩୮୨ଜଣଙ୍କର ମୃତ୍ୟୁ ହୋଇଛି। ଆଇଏମଏ କହିଛି ଯେ ଯଦି ସରକାର କରୋନା ସଂକ୍ରମିତ ଏବଂ ଏଥିରେ ମୃତ ଡାକ୍ତର ଏବଂ ଏବ ସ୍ବାସ୍ଥ୍ୟ କର୍ମୀଙ୍କ ତଥ୍ୟ ଦେଇ ପାରିବେ ନାହିଁ, ତେବେ ମହାମାରୀ ଅଧିନିୟମ, ୧୮୯୭ ଏବଂ ବିପର୍ଯ୍ୟୟ ପରିଚାଳନା ଆଇନ କାର୍ଯ୍ୟକାରୀ କରିବାର କୌଣସି ନୈତିକ ଅଧିକାର ନାହିଁ ବୋଲି ଆଇଏମଏ କହିଛି।
