ବରଗଡ଼,୨।୫(ପ୍ରେମାନନ୍ଦ ଖମାରୀ): ସାଧାରଣ ନିର୍ବାଚନ ନେଇ ପ୍ରାର୍ଥୀମାନେ ଚିରାଚରିତ ଢଙ୍ଗରେ ପ୍ରାର୍ଥିପତ୍ର ତଥା ନାମାଙ୍କନ ଦାଖଲ କରୁଛନ୍ତି । କିଏ ବିଶାଳ ଶୋଭାଯାତ୍ରା ତ’ ଆଉ କେହି ନିରାଡମ୍ବର ଭାବେ ନିର୍ବାଚନ ଅଧିକାରୀଙ୍କ ପାଖକୁ ପ୍ରାର୍ଥିପତ୍ର ଧରି ଓକିଲଙ୍କ ସହିତ ପହଞ୍ଚୁଛନ୍ତି। ତେବେ ବରଗଡ଼ ବିଧାନସଭା ଆସନରୁ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ମଇଦାନକୁ ଓହ୍ଲାଇଥିବା ପାଣ୍ଡବ କର୍ଣ୍ଣଙ୍କ ନାମାଙ୍କନ ଦାଖଲ ନିଆରା ଥିଲା ।
ସେ ସୋମବାର ଏକ ସେଟ ନାମାଙ୍କନ ଦାଖଲ କରି ସାରିଥିବା ବେଳେ ଗୁରୁବାର ଦ୍ବିତୀୟ ସେଟ ନାମାଙ୍କନ ଦାଖଲ କରିଥିଲେ। ତେବେ ଜଣେ ରକ୍ତଦାତା ଏବଂ ସମାଜସେବୀଭାବେ ଜଣାଶୁଣା ପାଣ୍ଡବ ନାମାଙ୍କନ ଦାଖଲ ପୂର୍ବରୁ ପୂଜାର୍ଚ୍ଚନା କରିବା ସହିତ ବରଗଡ ରକ୍ତ ଭଣ୍ଡାରକୁ ଯାଇଥିଲେ। ସେଠାରେ ଗୋଟିଏ ୟୁନିଟ ରକ୍ତଦାନ କରି ପରେ ବରଗଡ ଉପଜିଲାପାଳଙ୍କ ଅଫିସରେ ପହଞ୍ଚି ଥିଲେ। ପରେ ଉପଜିଲାପାଳ କୁମାର ନାଗଭୂଷଣଙ୍କୁ ତାଙ୍କ ଦ୍ବିତୀୟ ସେଟ ନାମାଙ୍କନ ଦାଖଲ କରିଥିଲେ। ପାଣ୍ଡବଙ୍କ ଏଭଳି ନାମାଙ୍କନ ଦାଖଲ ବର୍ତ୍ତମାନ ଚର୍ଚ୍ଚାର ବିଷୟ ହୋଇଛି। ଉଲ୍ଲେଖଯୋଗ୍ୟ, ପାଣ୍ଡବ ଜଣେ କଂଗ୍ରେସ ନେତା ଏବଂ ଦଳ ତାଙ୍କୁ ପ୍ରାର୍ଥୀ ନ କରିବାରୁ ସ୍ବାଧୀନ ପ୍ରାର୍ଥୀଭାବେ ନିର୍ବାଚନ ମଇଦାନକୁ ଓହ୍ଲାଇଛନ୍ତି।
