ସିଲ୍ହେଟ୍,୨ା୫:ବାଂଲାଦେଶ ବିପକ୍ଷ ତୃତୀୟ ଅନ୍ତର୍ଜାତୀୟ ଦିନିକିଆ କ୍ରିକେଟ ମ୍ୟାଚରେ ଭାରତ ୭ଉଇକେଟରେ ବିଜୟ ହାସଲ କରିଛି। ଏଥିସହିତ ଦୁଇ ଦଳ ମଧ୍ୟରେ ଚାଲିଥିବା ୫ ମ୍ୟାଚ ବିଶିଷ୍ଟ ଅନ୍ତର୍ଜାତୀୟ ଟି୨୦ କ୍ରିକେଟ ସିରିଜରେ ଭାରତ ୩-୦ରେ ଅଗ୍ରଣୀ ସହ ଆଗୁଆ ସିରିଜ କବ୍ଜା କରିନେଇଛି।
ସ୍ଥାନୀୟ ସିଲ୍ହେଟ ଅନ୍ତର୍ଜାତୀୟ ଷ୍ଟାଡିୟମରେ ଗୁରୁବାର ଖେଳାଯାଇଥିବା ମ୍ୟାଚରେ ଅଧିନାୟିକା ହରମନପ୍ରୀତ କୌର ଟସ୍ ଜିତି ପ୍ରଥମେ ବୋଲିଂ ନେବା ପରେ ବାଂଲାଦେଶ ସ୍କୋରକୁ ଭାରତ ୧୧୭/୮ରେ ସୀମିତ କରିଦେଇଥିଲା। ପରେ ଓପନର ସ୍ମୃତି ମନ୍ଧାନା ଓ ଶେଫାଳି ବର୍ମା ୧୨.୧ ଓଭରରେ ୯୧ ରନ ଯୋଗ କରି ଭାରତକୁ ବିଜୟ ନିକଟତର କରିଦେଇଥିଲେ। ଶେଫାଳି ୩୮ ବଲ୍ରେ ୮ ଚୌକା ସହ ୫୧ ରନ କରିଥିବା ବେଳେ ମନ୍ଧାନା ୪୨ ବଲ୍ ସାମ୍ନା କରି ୫ ଚୌକା ଓ ଗୋଟିଏ ଛକା ସହ ୪୭ ରନ କରିଥିଲେ। ଶେଫାଳିଙ୍କୁ ରିତୁ ମୋନି କଟ୍ ଆଣ୍ଡ ବୋଲ୍ଡ କରିଦେଇଥିବା ବେଳେ ନାହିଦା ଅକତରଙ୍କ ବୋଲିଂରେ ଫାହିମା ଖାତୁନଙ୍କ ଦ୍ୱାରା କ୍ୟାଚ ଆଉଟ ହୋଇଯାଇଥିଲେ ମନ୍ଧାନା । ଦୟାଲାନ ହେମଲତା ୯ ରନ କରି ରାବେୟା ଖାନ୍ଙ୍କ ଦ୍ୱାରା ଏଲ୍ବିଡବ୍ଲ୍ୟୁ ହୋଇଯାଇଥିଲେ। ଅଧିନାୟିକା ହରମନପ୍ରୀତ କୌର ଓ ଉଇକେଟକିପର ରିଚା ଘୋଷ ଯଥାକ୍ରମେ ୬ ଓ ୮ରନ କରି ଅପରାଜିତ ରହିଥିଲେ।
ପୂର୍ବରୁ ପ୍ରଥମେ ବ୍ୟାଟିଂ କରିଥିବା ବାଂଲାଦେଶର ଆରମ୍ଭ ଉତ୍ସାହଜନକ ଥିଲା। ଦଳ ୬ ପାଓ୍ବାରପ୍ଲେ ଓଭରରେ ବିନା କୌଣସି ଉଇକେଟରେ ୪୪ ରନ କରିଥିଲା। ଓପନର ତଥା ଟପ୍ ସ୍କୋରର ଦିଲାରା ଅକତର (୨୫ ବଲ୍ରୁ ୩୯ରନ)ଙ୍କ ଉଇକେଟ ପତନ ପରେ ଭାରତୀୟ ବୋଲରମାନେ ଘରୋଇ ଦଳର ବ୍ୟାଟିଂରେ ଅଙ୍କୁଶ ଲଗାଇଥିଲେ। ଅନ୍ୟମାନଙ୍କ ମଧ୍ୟରେ ଅଧିନାୟିକା ତଥା ଉଇକେଟକିପର ନିଗାର ସୁଲ୍ତାନା ୨୮ ଓ ଶୋଭାନା ମୋସ୍ତାରି ୧୫ ରନ କରିଥିବା ବେଳେ ଅନ୍ୟ କୌଣସି ବ୍ୟାଟର ଦୁଇ ଅଙ୍କ ସ୍ପର୍ଶ କରିପାରିି ନ ଥିଲେ।
