ସିଡନୀ,୬।୧୨: ଦିନିକିଆ ପ୍ରତିଶୋଧ ଟି-୨୦ରେ ନେଲା ଟିମ ଇଣ୍ଡିଆ। ହାର୍ଦ୍ଦିକ ପାଣ୍ଡ୍ୟାଙ୍କ ବିସ୍ଫୋରକ ବ୍ୟାଟିଂ ସାଙ୍ଗକୁ ଶିଖର ଧୱନ ଓ କ୍ୟାପଟେନ ବିରାଟ କୋହଲିଙ୍କ ଦମଦାର ଇନିଂସ ବଳରେ ଟିମ ଇଣ୍ଡିଆ ଏଠାରେ ଖେଳାଯାଇଥିବା ୨ୟ ଟି-୨୦ ମ୍ୟାଚରେ ଅଷ୍ଟ୍ରେଲିଆକୁ ୬ ୱିକେଟରେ ପରାସ୍ତ କରିଛି। ଏହି ବିଜୟ ସହ ଟିମ ଇଣ୍ତିଆ ଟି-୨୦ ସିରିଜକୁ ୨-୦ରେ ଜିତି ନେଇଛି। ଅଷ୍ଟ୍ରେଲିଆ ଗସ୍ତରେ ଟିମ ଇଣ୍ଡିଆ ପ୍ରଥମ ଦୁଇଟି ଏକଦିବସୀୟ ମ୍ୟାଚ୍ ହାରିବା ପରେ ସମାଲୋଚକମାନେ ବିଭିନ୍ନ ପ୍ରକାରର ମନ୍ତବ୍ୟ ଦେବାକୁ ଆରମ୍ଭ କରିଥିଲେ। କେହି କେହି ବିରାଟ କୋହଲିଙ୍କ ଅଧିନାୟକତ୍ୱ ଉପରେ ପ୍ରଶ୍ନ କରିଥିଲେ। ଭାରତୀୟ ଦଳ ରୋହିତ ଶର୍ମାଙ୍କ ଉପରେ ଅତ୍ୟଧିକ ନିର୍ଭରଶୀଳ ହୋଇଛି। ବିରାଟ ଏବଂ ରୋହିତଙ୍କ ମଧ୍ୟରେ କଳହର ଖବର ମଧ୍ୟ ସାମ୍ନାକୁ ଆସିଥିଲା। ଏବେ ଅଷ୍ଟ୍ରେଲିଆ ବିପକ୍ଷରେ ହ୍ୟାଟ୍ରିକ ବିଜୟ ପରେ ବିରାଟ କୋହଲି ତାଙ୍କର ସବୁଠାରୁ ବିଶ୍ୱସ୍ତ ସାଥୀ ରୋହିତ ଶର୍ମାଙ୍କୁ ଏକ ସ୍ବତନ୍ତ୍ର ଢଙ୍ଗରେ ମନେ ରଖିଥିଲେ। ବିଜୟ ପରେ ଅଧିନାୟକ ବିରାଟ କୋହଲି କହିଛନ୍ତି, ଏହା ଏକ ବଡ଼ ବିଜୟ। ଏକ ଦଳ ଭାବରେ ଆମେ ଟି -୨୦ମ୍ୟାଚରେ ଭଲ ପ୍ରଦର୍ଶନ କରିଛୁ। ବିଶେଷ କଥା ହେଉଛି ଏହି ମ୍ୟାଚ୍ଗୁଡିକରେ ଆମେ ରୋହିତ ଶର୍ମା ଏବଂ ଜସପ୍ରୀତ ବୁମ୍ରାଙ୍କ ବିନା ଖେଳିଥିଲୁ ଏବଂ ଏହା ସତ୍ତ୍ୱେ ଆମେ ଜିତିଛୁ। ଏଭଳି ପରିସ୍ଥିତିରେ ଏହି ବିଜୟ ଆହୁରି ଗୁରୁତ୍ୱପୂର୍ଣ୍ଣ ହୋଇଯାଇଛି। ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ତୃତୀୟ ଟି-୨୦ ମ୍ୟାଚ ମଙ୍ଗଳବାର ସିଡନୀରେ ଖେଳାଯିବ।
