ବାଲେଶ୍ୱର/ବସ୍ତା, ୮।୭( ହରିଶଙ୍କର ପାଢ଼ୀ/ବାଞ୍ଛାନିଧି ଦେ) : ବସ୍ତା ଥାନା ଅର୍ନ୍ତଗତ ୧୬ ନମ୍ବର ଜାତୀୟ ରାଜପଥର ବସ୍ତା ବାଇପାସ ନିକଟ କୁଣ୍ଡପୂର ଛକ ନିକଟରେ ବଡ଼ ଦୁର୍ଘଟଣା ଘଟିଛି। ଆଗରେ ଛିଡ଼ା ହୋଇଥିବା କଣ୍ଟେନର ପଛରୁ ଧକ୍କା ଦେଲା ମିନିବସ୍ । ଫଳରେ ସମସ୍ତ ୧୬ ଜଣ ଯାତ୍ରୀ ଗୁରୁତର ହୋଇଥିବା ଜଣାଯାଇଛି। ମିଳିଥିବା ସୂଚନା ଅନୁସାରେ, ବୁଧବାର ଭୋର ସମୟରେ କୁଣ୍ଡପୁର ଛକ ନିକଟରେ ଏକ କଣ୍ଟେନର ଅଟକିଥିଲା। ସେହିସମୟରେ ପୁରୀରୁ ଜଗା ଦର୍ଶନ ସାରି ପଶ୍ଚିମବଙ୍ଗର ୧୬ ଜଣକୁ ନେଇ ଫେରୁଥିବା ଓଡ଼ି୦୧ଜେଡ୬୮୦୪ ଏକ ମିନିବସ୍ ଧକ୍କା ଦେଇଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ ସମସ୍ତ ୧୬ ଜଣ ଗୁରୁତର ହୋଇଥିଲେ। ଖବରପାଇ ଆମ୍ବୁଲାନ୍ସ, ବସ୍ତା ଦମକଳବାହିନୀ ପୋଲିସ ଉପସ୍ଥିତିରେ ସମସ୍ତଙ୍କୁ ଉଦ୍ଧାର କରିଥିଲେ। ୨ ଜଣ ଅତି ଗୁରୁତରଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ ହୋଇଥିବା ବେଳେ ଅନ୍ୟ ୧୪ ଜଣଙ୍କୁ ବସ୍ତା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ତେବେ ଡ୍ରାଇଭରର ଅସାବଧାନତା ଯୋଗୁ ବା ଡ୍ରାଇଭରକୁ ନିଦ ଲାଗିଯାଇଥିବାରୁ ଏଭଳି ଘଟଣା ଘଟିଥାଇପାରେ ବୋଲି ପ୍ରାରମ୍ଭିକ ତଦନ୍ତରୁ ଜଣଯାଇଛି। ଏହାସହ ଟ୍ରକ୍ର ପଛ ପଟେ କୌଣସି ଲାଲ ଲାଇଟ ନଥିବା ମଧ୍ୟ କୁହାଯାଉଛି। ୧୪ ଜଣ ଯାତ୍ରୀଙ୍କ ମଧ୍ୟରୁ ୫ ଜଣ ପିଲା ୪ ଜଣ ମହିଳା ଅନ୍ୟ ପୁରୁଷ ଯାତ୍ରୀ ଅଛନ୍ତି। ତେବେ ବାରମ୍ବାର ୧୬ ନମ୍ବର ଜାତୀୟ ରାଜପଥରେ ଦୁର୍ଘଟଣା ବଢ଼ି ଚାଲିଥିଲେ ମଧ୍ୟ ପ୍ରଶାସନ ତରଫରୁ ରାସ୍ତା ପାର୍ଶ୍ୱରେ ଖୋଲି ଉଠିଥିବା ଢାବା ପାଖରେ ରାସ୍ତା ଅବରୋଧ କରି ଠିଆ ହୋଇଥିବା ଗାଡିଗୁଡ଼ିକ ଉପରେ କୌଣସି ପଦକ୍ଷେପ ନେଉନଥିବା ଜଣାଯାଇଛି ।
