ଥୁଆମୂଳ ରାମପୁର,୧।୪(ଦୁର୍ଗା କୀର୍ତ୍ତି): ରାଜ୍ୟ ସରକାରଙ୍କ ଜଳସେଚନ ପ୍ରକଳ୍ପ ଦ୍ବାରା କୃଷିର ଉନ୍ନତି ଆଣିବା ପାଇଁ କୋଟି କୋଟି ଟଙ୍କା ବ୍ୟୟବରାଦରେ ବିଭିନ୍ନ ସ୍ଥାନରେ କ୍ଷୁଦ୍ର ଜଳସେଚନ ପ୍ରକଳ୍ପ ଜରିଆରେ ପ୍ରକଳ୍ପ ଗୁଡିକ ର୍ନିମାଣ କରାଯାଉଛି। କିନ୍ତୁ କିଛି ସ୍ଥାନରେ ଅର୍ଦ୍ଧ ର୍ନିମାଣ ହୋଇ ପଡିରହିଛି ତୋ କେଉଁଠି ର୍ନିମାଣର କିଛି ଦିନ ମଧ୍ୟରେ ଭୂଷୁଡି ପଡିଥିବାବେଳେ ଆଉ କେଉଁ ସ୍ଥାନରେ ପ୍ରକଳ୍ପ ର୍ନିମାଣ କାର୍ଯ୍ୟ ଶେଷ କରାଯାଇଛି ହେଲେ ପାଇପ ସଂଯୋଗ କରାଯାଇନାହିଁ। ଏହା ଫଳରେ ଚାଷୀମାନେ ନାହିଁନଥିବା ଅସୁବିଧା ଭୋଗୁଥିବା ଦେଖିବାକୁ ମିଳୁଛି।
ଏପରି ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲା ଥୁଆମୁଳ ରାମପୁର ବ୍ଳକ ଅନ୍ତର୍ଗତ ଡୁମେରପଦର ଗ୍ରାମପଞ୍ଚାୟତ ଅଧିନରେ ଥିବା ବାରକାଉଡି ଗ୍ରାମର ନୂଆପଡା ନିକଟରେ ଥିବା ବିଚଲ ଚଞ୍ଚରା ନଦୀ ନାମକ ନଦୀରେ ର୍ନିମାଣ କରାଯାଇଛି ଏକ କ୍ଷୁଦ୍ର ଜଳ ସେଚନ ପ୍ରକଳ୍ପ। ଓଡିଶା ସରକାରଙ୍କ ଜଳସେଚନ ବିଭାଗ କଳାହାଣ୍ଡି, କ୍ଷୁଦ୍ର ଜଳସେଚନ ବିଭାଜନ ଭବାନୀପାଟଣା ଦ୍ୱାରା ବିଷମଗିରି ଗ୍ରାମାଞ୍ଚଳରେ ଭିତ୍ତିଭୂମି ଉନ୍ନତି କଲ୍ୟାଣ ପାଣ୍ଠି ଆନୁକୂଲ୍ୟରେ ର୍ନିମାଣ ହୋଇଥିବା କ୍ଷୁଦ୍ର ଜଳସେଚନ ପ୍ରକଳ୍ପ ଅଧାପନ୍ତରିଆ ଭାବରେ ଦୀର୍ଘ ବର୍ଷରୁ ପଡିରହିଛି। ରାୟଗଡ଼ା କାଶୀପୁର ବ୍ଳକ ଓ କଳାହାଣ୍ଡି ଜିଲା ଥୁଆମୁଳ ରାମପୁର ବ୍ଳକର ସୀମାନ୍ତରେ ରହିଥିବା ବିଚଲ ଚଞ୍ଚରା ନଦୀ ଠାରେ ଏକ କ୍ଷୁଦ୍ର ଜଳସେଚନ ପ୍ରକଳ୍ପ ନିର୍ମାଣ ପାଇଁ ଏକ ଚୂକ୍ତିଭିତ୍ତିକ ମଧ୍ୟରେ ହାରାହାରି ୨ କୋଟି ଟଙ୍କା ବ୍ୟୟବରାଦରେ ଆର୍ଥିକ ବର୍ଷ ୨୦୧୮/୧୯ ରେ ଏହି ପ୍ରକଳ୍ପ ନିର୍ମାଣ କାର୍ଯ୍ୟ ଆରମ୍ଭ କରାଯାଇଥିଲା। ଦୁଃଖ ଓ ପରିତାପର ବିଷୟ ଏହା ଯେ ଅଞ୍ଚଳର ଚାଷୀମାନେ ଏହି ପ୍ରକଳ୍ପ ନିର୍ମାଣ ଶେଷ ହୋଇଥିଲେ ସେମାନେ ଚାଷ କରି ନିଜେ ସ୍ବାବଲମ୍ବୀ ହୋଇ ପାରିବା ବଦଳରେ ସେ ଆଶା ବର୍ତ୍ତମାନ ଫସର ଫାଟି ଯାଇଛି ବୋଲି ଚାଷୀମାନେ ପ୍ରକାଶ କରିଛନ୍ତି।
ଏନେଇ ବାରକାଉଡ଼ିର
ଚାଷୀ ଗୁଣ୍ଡୁ ମାଝୀ କୁହନ୍ତି ଆମ ଚାଷୀ ମାନଙ୍କ ଚାଷ କ୍ଷେତ୍ରରେ ସୁବିଧା ପାଇଁ ଏକ କ୍ଷୁଦ୍ର ଡ୍ୟାମ ର୍ନିମାଣ କରି ପାଇପ ଯୋଗେ ଆମ ଜମି ମାନଙ୍କରେ ପାଣି ଆସିବ ବୋଲି ଆମେ ସ୍ବପ୍ନ ଦେଖିଥିଲୁ ହେଲେ ଏହି ଡ୍ୟାମ ର୍ନିମାଣ ଦିନ ଠାରୁ ଆଜି ପର୍ଯ୍ୟନ୍ତ ଆମେ ପାଣି ପାଇ ପାରିଲୁ ନାହିଁ । ଯଦି ପାଣି ପାଇଥାନ୍ତୁ ତେବେ ଆମେ ଚାଷ କରି ସେଥିରୁ ଦୁଇ ପଇସା ରୋଜଗାର କରି ନିଜ ପରିବାରର ପ୍ରତିପୋଷଣ କରିପାରନ୍ତେ ହେଲେ ତାହା ହୋଇ ପାରିଲା ନାହିଁ l ଆମକୁ ଆଉ ଆଗ ଭଳି ଚାଷ କରିବା ପାଇଁ ମନ ଲାଗୁନାହିଁ, ଯେଉଁ ଚାଷୀ ପାଖରେ ପଇସା ଅଛି ସେ ପାଣି ଉଠାଇବା ମୋଟର ଏବଂ ଅନ୍ୟାନ୍ୟ ଚାଷ କ୍ଷେତ୍ରରେ କାମ କରିବା ଉପକରଣ କିଣି ଚାଷ ରେ ନିୟୋଜିତ କରୁଛନ୍ତି l ସରକାର ଆମ ଚାଷୀମାନଙ୍କ ପାଇଁ ଅନେକ ଯୋଜନା କରୁଛନ୍ତି ସତ ହେଲେ ତାହା ଆମ ମାନଙ୍କ ପାଇଁ ନୁହଁ କେବଳ ବଡ଼ ବଡ଼ ଠିକାଦାର ଏବଂ ଅଫିସର୍ ବାବୁ ମାନଙ୍କ ପାଇଁ , ସେଥିରୁ ଯାହା ବଞ୍ଚେ ଆମ ପାଖକୁ ପହଞ୍ଚିବା ସମୟରେ ସବୁ ସରିଯାଇଥାଏ l
