ସେବାକୁ ଜୀବନର ବ୍ରତ ଭାବେ ଗ୍ରହଣ କରିଛନ୍ତି ଆସାମର ଜଣେ ମହିଳା, ଯାହା ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି। ଏହି ମହିଳା ଜଣକ ହେଉଛନ୍ତି ଅନନ୍ୟା ପଲ୍ ଡେଡ୍ମାନି। ସେ ଦୀର୍ଘ ୨୨ ବର୍ଷ ହେଲା ଆଦିବାସୀମାନଙ୍କ ସେବାରେ ଲାଗିଛନ୍ତି। ଆଦିବାସୀ ପିଲାମାନଙ୍କୁ ଶିକ୍ଷାର ମୁଖ୍ୟ ସ୍ରୋତରେ ସାମିଲ କରିବା ସହ ମହିଳାମାନଙ୍କୁ ସଶକ୍ତ କରୁଛନ୍ତି। ସେ ଟ୍ରାଇବାଲ କନେକ୍ଟ ଫାଉଣ୍ଡେଶନ ମାଧ୍ୟମରେ ଏହି କାର୍ଯ୍ୟ ସଞ୍ଚାଳନ କରୁଛନ୍ତି। ଅନନ୍ୟା ଶିକ୍ଷା କେନ୍ଦ୍ର ଖୋଲିଛନ୍ତି ଓ ସେଠାରେ ପିଲାମାନଙ୍କୁ ରଖିବାର ବ୍ୟବସ୍ଥା ମଧ୍ୟ କରିଛନ୍ତି। ପିଲାମାନଙ୍କୁ ପଢ଼ାଇବା ଲାଗି ସେ ସ୍ଥାନୀୟ ଯୁବତୀଯୁବକଙ୍କୁ ନିଯୁକ୍ତ କରୁଛନ୍ତି ା କାରଣ ସେମାନେ ଆଞ୍ଚଳିକ ଭାଷାରେ ସେମାନଙ୍କୁ ପଢ଼ାଇବା ଲାଗି ସହଜ ହେଉଛି। ଅନନ୍ୟା ମଧ୍ୟ କମ୍ୟୁନିଟି କିଚେନ ଖୋଲି ଖାଦ୍ୟ ଦେବାର ବ୍ୟବସ୍ଥା କରିଛନ୍ତି। କେବଳ ଏତିକି ନୁହେଁ, ଘରୋଇ ହିଂସାର ଶିକାର ହୋଇଥିବା ମହିଳାମାନଙ୍କୁ ଥଇଥାନ କରୁଛନ୍ତି। ପଶ୍ଚିମବଙ୍ଗ, କର୍ନାଟକ ଓ ଗୋଆରେ ମଧ୍ୟ ସେ ତାଙ୍କ କାର୍ଯ୍ୟକ୍ରମ ଜାରି ରଖିଛନ୍ତି। କମ୍ୟୁନିଟି ସେଣ୍ଟର ମାଧ୍ୟମରେ ୯୦,୦୦୦ରୁ ଊର୍ଦ୍ଧ୍ୱ ଆଦିବାସୀ ମହିଳାଙ୍କୁ ଋତୁସ୍ରାବ ଓ ଅନ୍ୟାନ୍ୟ ସମସ୍ୟା ଉପରେ ସଚେତନ କରିସାରିଲେଣି।
