ସେବାର ପ୍ରତୀକ ସାଜିଛନ୍ତି ଶିବମ୍ ସୋନି। ମଧ୍ୟପ୍ରଦେଶର ଯୁବକ ଶିବମ୍ ପ୍ରତିଦିନ ଗରିବ ଲୋକଙ୍କୁ ୧୦ ଟଙ୍କାରେ ଖାଦ୍ୟ ଦେଉଛନ୍ତି। ଏପରି କି ଅନେକ ଦିନ ଧରି ମାଗଣାରେ ବି ଖାଦ୍ୟ ଯୋଗାଉଛନ୍ତି। ଏ ବାବଦରେ ସେ ସବୁ ଖର୍ଚ୍ଚ ନିଜ ରୋଜଗାର ଓ ଅନ୍ୟମାନଙ୍କଠାରୁ ଯୋଗାଡ଼ କରି ଭରଣା କରୁଛନ୍ତି। ତାଙ୍କର ଏଭଳି କାର୍ଯ୍ୟକୁ ଆନନ୍ଦ ମହିନ୍ଦ୍ରା ପ୍ରଶଂସା କରି ସାହାଯ୍ୟ ଯୋଗାଇଦେବା ଲାଗି ଆଗ୍ରହ ପ୍ରକାଶ କରିଛନ୍ତି। ଶିବମ୍ ତାଙ୍କ ନିଜ ଜୀବନର ଅନୁଭବକୁ ଆଧାର କରି ଏଭଳି ଖାଦ୍ୟ ଦେବାର ନିଷ୍ପତ୍ତି ନେଇଥିତ୍ଲେ। ତାଙ୍କ ଜୀବନ ବହୁ କଷ୍ଟରେ କଟିଛି। ଅର୍ଥାଭାବରୁ ଇଞ୍ଜିନିୟରିଂ ପଢ଼ା ବନ୍ଦ କରିବା ପରେ ସେ ୨୦୧୮ରେ ଏକ ରେସ୍ତୋରାଁ ଆରମ୍ଭ କରିଥିଲେ। ପରେ ସୋରିଆସିସ୍ ରୋଗରେ ପୀଡ଼ିତ ହୋଇ ତାହାକୁ ବନ୍ଦ କରିଦେଲେ ଓ ଋଣ ଶୁଝିବାରେ ସବୁ ହରାଇ ଇନ୍ଦୋର ଚାଲିଯାଇଥିଲେ। ସେଠାରେ ଷ୍ଟେଶନରେ ଶୋଉଥିଲେ ଓ ଲଙ୍ଗରରେ ଖାଉଥିଲେ। ଏପରି କି ବହୁ ସମୟ ଖାଲିପେଟରେ ରହୁଥିଲେ। ସେହି ସମୟରେ ହିଁ ଜଣେ ଭୋକିଲାର ଭୋକଜ୍ୱଳାକୁ ଅନୁଭବ କରିଥିଲେ ଓ ଅନ୍ୟମାନଙ୍କୁ ଖାଦ୍ୟ ଦେବା ଲାଗି ସିକ୍ୟୁରିଟି ଗାର୍ଡ ଚାକିରି ଆରମ୍ଭ କଲେ। ସେହି ରୋଜଗାରରେ ଅସହାୟଙ୍କୁ ଖାଇବାକୁ ଦେବା ଆରମ୍ଭ କରିଥିଲେ, ଯାହାକୁ ସେ ଏବେ ମଧ୍ୟ ଜାରି ରଖିଛନ୍ତି।
