ଜୀବନରେ ସାଂଘାତିକ ରୋଗର ଝଟ୍କା ପାଇବା ପରେ ସେଥିରୁ ବଞ୍ଚିଯାଇଥିବା ବହୁ ବ୍ୟକ୍ତିଙ୍କ ସେବାରେ ଜଡ଼ିତ ରହିବାର ଅନେକ ଦୃଷ୍ଟାନ୍ତ ଦେଖିବାକୁ ମିଳେ। ସେମାନଙ୍କ ମଧ୍ୟରେ ଦିଲ୍ଲୀର ଅଲାଗଡଥାନମ ନଟରାଜନ ଅନ୍ୟତମ। ନଟରାଜନ କ୍ୟାନ୍ସରରେ ପୀଡ଼ିତ ହୋଇ ଜୀବନ ସହ ସଂଗ୍ରାମ କରୁଥିଲେ। ଏଥିରୁ ମୁକୁଳିବା ପରେ ହଜାର ହଜାର ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଉଛନ୍ତି। କ୍ୟାନ୍ସର ଚିହ୍ନଟ ହେବାପରେ ଲଣ୍ଡନରୁ ଫେରି ନଟରାଜନ ଦିଲ୍ଲୀର ପାନୀୟ ଜଳ ସମସ୍ୟା ଦେଖିବାକୁ ପାଇଥିଲେ। କ୍ୟାନ୍ସରରୁ ମୁକ୍ତି ପାଇବା ପରେ ସେ ଅନାଥଙ୍କ ସେବାରେ ଲାଗିଗଲେ ଓ ତାହା ଏବେ ବି ଜାରି ରଖିଛନ୍ତି। କିନ୍ତୁ ଦିଲ୍ଲୀର ପାଣି ସମସ୍ୟା ଦେଖି ସେ ପ୍ରଥମେ ପଡୋଶୀଙ୍କ ଘରେ ମାଠିଆ ରଖି ସେମାନଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ବ୍ୟବସ୍ଥା କରିଥିଲେ। ପରେ ଘର ସାମ୍ନାରେ ଏକ ଓ୍ବାଟର କୁଲର ବସାଇଲେ। ଏବେ ଦିଲ୍ଲୀର ବହୁ ଅଞ୍ଚଳରେ ମାଠିଆ ରଖିଛନ୍ତି। ମାଠିଆଗୁଡ଼ିକୁ ସୁରକ୍ଷିତ ସ୍ଥାନରେ ରଖାଯାଇଛି ଓ ନଟରାଜନ ଗାଡ଼ିରେ ପାଣି ନେଇ ସେଥିରେ ଭର୍ତ୍ତି କରୁଛନ୍ତି। ସେଗୁଡ଼ିକୁ ନିିୟମିତ ସଫା କରିବାର ବ୍ୟବସ୍ଥା ମଧ୍ୟ କରିଛନ୍ତି। ଏହି ସେବାରେ ଖୁସି ରହିଛନ୍ତି ବୋଲି କହନ୍ତି ୭୩ ବର୍ଷୀୟ ନଟରାଜନ।
