ମୁମ୍ବାଇ,୧୬।୨ : ମହାରାଷ୍ଟ୍ରର ଲାଟୁର ସହରରେ ମାଟି ତଳୁ କିଛି ରହସ୍ୟମୟ ଶବ୍ଦ ଶୁଣିବାକୁ ମିଳୁଛି। ଯେଉଁଥିପାଇଁ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ଲୋକେ ଭୂକମ୍ପ ଆତଙ୍କ ନେଇ ଲୋକେ ଆତଙ୍କିତ ହେବାରେ ଲାଗିଛନ୍ତି। ଯଦିଓ ଅଧିକାରୀମାନେ କହିଛନ୍ତି ଯେ କୌଣସି ଭୂକମ୍ପ କ୍ରିୟାର କିଛି ରିପୋର୍ଟ ନାହିଁ।
ବୁଧବାର ସହରର ବିବେକାନନ୍ଦ ଚକ ଅଞ୍ଚଳରେ ପୂର୍ବାହ୍ନ ପ୍ରାୟ ସାଢ଼େ ୧୦ରୁ ୧୧ଠା ୪୫ ମଧ୍ୟରେ ମାଟି ତଳୁ ରହସ୍ୟମୟ ଶବ୍ଦ ଶୁଣା ଯାଇଥିଲା। ଲୋକମାନେ ଅନୁଭବ କରିଥିଲେ ଯେ ଏହା ଭୂକମ୍ପ କାର୍ଯ୍ୟକଳାପର ଶବ୍ଦ ହୋଇପାରେ ଏବଂ ଏହା ପରେ ଏକ ଭୂକମ୍ପ ହୋଇପାରେ। ଏହା ପରେ ଏନେଇ ଜିଲା ପ୍ରଶାସନ ପକ୍ଷରୁ ବିପର୍ଯ୍ୟୟ ପରିଚାଳନା ଦଳକୁ ସତର୍କ କରା ଯାଇଛି।
ଜିଲା ପ୍ରଶାସନ ଲାଟୁର ସହର ତଥା ଅରଦ ଶାହାଜାନି ଏବଂ ଆଶିଭ ଜିଲାର ଭୂକମ୍ପ ମନିଟରିଂ ସେଣ୍ଟରରୁ ସୂଚନା ନେଇଛି, କିନ୍ତୁ ଭୂକମ୍ପ ହେବାର ସମ୍ଭାବନା କୌଣସି ସ୍ଥାନରୁ ଜଣାପଡ଼ି ନାହିଁ।
୧୯୯୩ ମସିହାରେ ଲାଟୁର କିଲାରି ଗ୍ରାମ ଏବଂ ଏହାର ଆଖପାଖ ଅଞ୍ଚଳରେ ଏକ ଭୂକମ୍ପ ଘଟିଥିଲା ଯେଉଁଥିରେ ପ୍ରାୟ ୧୦ ହଜାର ଲୋକଙ୍କ ମୃତ୍ୟୁ ଘଟିଥିଲା। ଏହାର ତୀବ୍ରତା ୬.୨ ଥିଲା। ଏହି ଅଞ୍ଚଳର ଦଶଟି ଗାଁ ଧ୍ୱଂସ ହୋଇଯାଇଥିଲା । ବିପର୍ଯ୍ୟୟ ପରିଚାଳନା ଅଧିକାରୀ ସାକିବ ଉସମାନି କହିଛନ୍ତି ଯେ ମରାଠୱାଡା ଅଞ୍ଚଳରେ ସମୟ ସମୟରେ ରହସ୍ୟମୟ ଶବ୍ଦ ମାଟି ତଳୁ ଶୁଣାଯାଇଥାଏ।
ସେପ୍ଟେମ୍ବର ୨୦୨୨ ରେ କିଲାରୀ ଏବଂ ହାସୋରୀ ଗ୍ରାମରେ ମଧ୍ୟ ସମାନ ଶବ୍ଦ ଶୁଣାଯାଇଥିଲା। ଏହା ପରେ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ଜିଓମ୍ୟାଗ୍ନେଟିଜମର ବିଶେଷଜ୍ଞମାନେ ମଧ୍ୟ ଗାଁ ପରିଦର୍ଶନ କରିଥିଲେ। ନିକଟରେ ଫେବୃଆରୀ ୪ ରେ ଜିଲାର ନୀଲାଙ୍ଗା ତହସିଲର ନିତୁର ଡାଙ୍ଗୱାଡି ଅଞ୍ଚଳରେ ସମାନ ରହସ୍ୟମୟ ଶବ୍ଦ ଶୁଣିବାକୁ ମିଳିଥିଲା। ବିଶେଷ କଥା ହେଉଛି ଲାଟୁର ସହର କୌଣସି ପୃଥିବୀ ପ୍ଲେଟର ସୀମାରେ ଅବସ୍ଥିତ ନୁହେଁ। ଏଭଳି ପରିସ୍ଥିତିରେ ବୈଜ୍ଞାନିକମାନେ ମଧ୍ୟ ଏଠାରେ ମାଟିତଳୁ ଆସୁଥିବା ଶବ୍ଦ ବିଷୟରେ ସ୍ପଷ୍ଟ ଭାବରେ କିଛି କହିବାକୁ ସକ୍ଷମ ହେଉ ନାହାନ୍ତି।
