ଜଳବାୟୁ ପରିବର୍ତ୍ତନର ପ୍ରଭାବ ଏବଂ ଅନୁକୂଳ ବାସସ୍ଥାନର ଅଭାବ ଯୋଗୁ ଅନେକ ପ୍ରାଣୀ ଏବେ ବିଲୁପ୍ତିର ଦ୍ୱାରଦେଶରେ। ଏମାନଙ୍କ ମଧ୍ୟରେ ରହିଛି କୃଷ୍ଣସାର ମୃଗ। ଏହିକ୍ରମରେ ଛତିଶଗଡ଼ର ବାଲଦାବଜାର ଜିଲା ଅନ୍ତର୍ଗତ ବରଓ୍ବାଁପଡ଼ା ଅଭୟାରଣ୍ୟରୁ ୧୯୭୦ ଦଶକରେ ଏହି ପ୍ରଜାତିର ମୃଗ ଲୋପ ପାଇଯାଇଥିଲା। ବ୍ୟାପକ ଶିକାର ଓ ଅଭୟାରଣ୍ୟରେ ଜବରଦଖଲ ଏବଂ ସେମାନଙ୍କ ଚାରଣଭୂମିକୁ ନଷ୍ଟ କରିବା ଯୋଗୁ ଏହା ଘଟିଥିଲା। ତେବେ ଦୀର୍ଘ ୫୦ ବର୍ଷ ପରେ ପୁନର୍ବାର କୃଷ୍ଣସାର ମୃଗ ଅଭୟାରଣ୍ୟକୁ ଫେରିଛନ୍ତି। ଏହା ଛତିଶଗଡ଼ ଜଙ୍ଗଲ ବିଭାଗର ପଦକ୍ଷେପ ଯୋଗୁ ସମ୍ଭବ ହୋଇପାରିଛି। କୃଷସାର ମୃଗ ଅଭୟାରଣ୍ୟରେ ବଂଶବୃଦ୍ଧି କରି କେମିତି ସୁରକ୍ଷିତ ଭାବେ ରହିପାରିବେ ସେଥିପାଇଁ ୨୦୨୧ରୁ ୨୦୨୬ ପର୍ଯ୍ୟନ୍ତ ଏକ ଯୋଜନା କରାଯାଇଛି। ଏହି ଯୋଜନା ପୂରିବାକୁ ଆଉ ବର୍ଷେ ବାକି ରହିଥିବାବେଳେ ଯୋଜନାରେ ବଡ଼ ସଫଳତା ମିଳିଛି। ବାହାରୁ ୧୫୦ରୁ ଊର୍ଦ୍ଧ୍ୱ କୃଷ୍ଣସାର ମୃଗ ଅଣାଯାଇଥିଲା। ଏବେ ଏମାନଙ୍କ ବଂଶବୃଦ୍ଧି ଘଟି ୨୦୦ ପାଖାପାଖି ହୋଇଛି। ମୃଗଙ୍କ ବାସସ୍ଥାନର ସୁରକ୍ଷା, ଚାରଣଭୂମିର ପୁନରୁଦ୍ଧାର ଏବଂ ପରିବେଶଗତ ସମନ୍ବୟ ପଦକ୍ଷେପ ଯୋଗୁ ଏଭଳି ସଫଳତା ମିଳିଛି।
