ନୂଆଦିଲ୍ଲୀ, ୧୭ା୫ (ପି.ଟି.): ଭାରତର ଷ୍ଟାର ଶୁଟର ମନୁ ଭାକର କ୍ରୋଏସିଆ ରାଜଧାନୀ ଜାଗ୍ରେବସ୍ଥିତ ଏକ ହୋଟେଲ ରୁମ୍ରେ ତାଙ୍କ ବିଏ ପରୀକ୍ଷା ଦେବେ। ଟୋକିଓ ଅଲିମ୍ପିକ୍ସରେ ଭାଗ ନେବାକୁଥିବା ଭାରତୀୟ ଶୁଟିଂ ଟିମ୍ ସହ ଭାକର କ୍ରୋଏସିଆ ଗସ୍ତ କରିଛନ୍ତି। ସେ ତାଙ୍କ ସାଥୀରେ ଶୁଟିଂ ସରଞ୍ଜାମ ସହ ପରୀକ୍ଷା ପାଇଁ ପ୍ରସ୍ତୁତି ଲାଗି ବହିପତ୍ର ମଧ୍ୟ ନେଇଛନ୍ତି। ସେଠାରେ ଟ୍ରେନିଂ ସହ ସେ ବିଭିନ୍ନ ପ୍ରତିଯୋଗିତାରେ ମଧ୍ୟ ଅଂଶଗ୍ରହଣ କରିବେ। ଅଲିମ୍ପିକ୍ସ ପ୍ରସ୍ତୁତି କ୍ଷେତ୍ରରେ ଏହା ବିଶେଷ ସହାୟକ ହେବ। ୧୯ ବର୍ଷୀୟା ଚାମ୍ପିୟନ ଶୁଟର ଭାକର ଦିଲ୍ଲୀ ବିଶ୍ୱବିଦ୍ୟାଳୟର ସମ୍ମାନଜନକ ଲେଡି ଶ୍ରୀରାମ୍ କଲେଜରେ ରାଜନୀତି ବିଜ୍ଞାନର ଜଣେ ଛାତ୍ରୀ। ମେ’ ୧୮ରେ ତାଙ୍କର ବିଏ ଚତୁର୍ଥ ସେମିଷ୍ଟର ପରୀକ୍ଷା ଆରମ୍ଭ ହେବ। ଓସିଜେକ୍ଠାରେ ୟୁରୋପିଆନ ଚାମ୍ପିୟନଶିପ୍ ଏହାର ଦୁଇଦିନ ପରେ ମେ’ ୨୦ରେ ଆରମ୍ଭ ହେବ। ଭାରତ ଏଥିରେ ଏକ ଆମନ୍ତ୍ରିତ ଦଳ ଭାବେ ଅଂଶଗ୍ରହଣ କରିବ। ଏହି ମହାଦେଶୀୟ ଟୁର୍ନାମେଣ୍ଟ ଓ ଭାକରଙ୍କ ପରୀକ୍ଷା ଏକ ସମୟରେ ଅନୁଷ୍ଠିତ ହେଉଥିଲେ ମଧ୍ୟ ତାଙ୍କ ଇଭେଣ୍ଟଗୁଡ଼ିକ ପରୀକ୍ଷା ଦିନ ନାହିଁ। ତାଙ୍କୁ ଉଭୟକୁ ଏକ ସଙ୍ଗେ ତୁଲେଇବାକୁ ପଡ଼ିବ। ଭାକର କହିଛନ୍ତି ପାଠପଢ଼ାକୁ ଯଦିଓ ସେ ଗୁରୁତ୍ୱ ଦିଅନ୍ତି ଶୁଟିଂ ପ୍ରତିଯୋଗିତାକୁ ସେ ଅଗ୍ରାଧିକାର ଦେବେ। ଟୋକିଓ ଅଲିମ୍ପିକ୍ସରେ ଭାକର ଦେଶ ପାଇଁ ପଦକ ଜିତିବେ ବୋଲି ଆଶା କରାଯାଉଛି। ୟୁଥ୍ ଅଲିମ୍ପିକ୍ସ, ଆଇଏସ୍ଏସ୍ଏଫ୍ ବିଶ୍ୱକପ୍ ଓ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ବିଜୟିନୀ ଭାକର କହିଛନ୍ତି ୨୦୨୧ ହେଉଛି ଅଲିମ୍ପିକ୍ସ ବର୍ଷ। ଶ୍ରେଷ୍ଠ ପ୍ରଦର୍ଶନ ସହ ଦେଶକୁ ଗୌରବାନ୍ବିତ କରିବା ତାଙ୍କର ମୂଳ ଲକ୍ଷ୍ୟ। ଭାକରଙ୍କ ପିତା ରାମକିଷନ ଭାକର ମର୍ଚ୍ଚାଣ୍ଟ ନେଭିରେ ଜଣେ ଚିଫ୍ ଇଞ୍ଜିିନିୟର। କ୍ରୀଡ଼ାରେ ଝିଅର କ୍ୟାରିୟର ଗଢ଼ିତୋଳିବାରେ ତାଙ୍କର ବିଶେଷ ଭୂମିକା ରହିଛି। ଭାକର ତାଙ୍କ ଲିଖିତ ପରୀକ୍ଷାର ପ୍ରଶ୍ନୋତ୍ତର ମୋବାଇଲ ସ୍କାନର ଜରିଆରେ ପଠାଇବେ। ଜୁଲାଇ ୨୩ରୁ ଅଗଷ୍ଟ ୮ ପର୍ଯ୍ୟନ୍ତ ହେବାକୁଥିବା ଟୋକିିଓ ଅଲିମ୍ପିକ୍ସର ତିନୋଟି ଇଭେଣ୍ଟ ପାଇଁ ସେ ମନୋନୀତ ହୋଇଛନ୍ତି। ସେ ଅଭିଜ୍ଞ ରାହି ସାର୍ନୋବତ୍ଙ୍କ ସହ ମହିଳା ୨୫ ମିଟର ପିସ୍ତଲ ଏବଂ ଯଶସ୍ବିନୀ ସିଂ ଦେଶଓ୍ବାଲଙ୍କ ସହ ୧୦ ମିଟର ଏୟାର ପିସ୍ତଲ ଇଭେଣ୍ଟରେ ଭାଗ ନେବେ। ଭାକର ଆହୁରି ମଧ୍ୟ ସୌରଭ ଚୌଧାରୀଙ୍କ ସହ ୧୦ ମିଟର ପିସ୍ତଲ ମିକ୍ସଡ ଟିମ୍ ଇଭେଣ୍ଟରେ ଭାଗ ନେବେ। ମହାଦେଶୀୟ ଇଭେଣ୍ଟ ପରେ ଭାରତୀୟ ଶୁଟରମାନେ ଜୁନ୍ ୨୨ରୁ ଜୁଲାଇ ୩ ପର୍ଯ୍ୟନ୍ତ ସମାନ ସହର ଓସିଜେକ୍ଠାରେ ଆଇଏସ୍ଏସ୍ଏଫ୍ ବିଶ୍ୱକପ୍ରେ ଭାଗ ନେବେ। ସୂଚନାଯୋଗ୍ୟ, ଗତ ମଙ୍ଗଳବାର ଏକ ସ୍ବତନ୍ତ୍ର ବିମାନ ଯୋଗେ ଅଲିମ୍ପିକ ଯୋଗ୍ୟତା ହାସଲ କରିଥିବା ୧୩ ଶୁଟର, ୭ କୋଚ୍, ୫ ଫିଜିଓ ଏବଂ ୨ ଜଣ ଭିଡିଓ କର୍ମଚାରୀ ଜାଗ୍ରେବ ସହରରେ ପହଞ୍ଚତ୍ଛନ୍ତି।
