ଭଞ୍ଜନଗର,୨୨।୩(ବାବୁଲା ପ୍ରଧାନ): ଗଞ୍ଜାମ ଜିଲାର ଐତିହାସିକ ଭଞ୍ଜନଗର ଠାକୁରାଣୀ ଯାତ୍ରା ପାଇଁ ରବିବାର ଏକ ଗୁରୁତ୍ୱପୂର୍ଣ୍ଣ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ସଭାପତି ରାଜେନ୍ଦ୍ର ବିଷୋୟୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଭଞ୍ଜନଗର ବିଧାୟକ ତଥା ଯାତ୍ରା କମିଟିର ମୁଖ୍ୟ ଉପଦେଷ୍ଟା ପ୍ରଦ୍ୟୁମ୍ନ କୁମାର ନାୟକ ଯୋଗଦେଇ ଯାତ୍ରାକୁ ଅଧିକ ବ୍ୟବସ୍ଥିତ ଓ ଆକର୍ଷଣୀୟ କରିବାକୁ ପରାମର୍ଶ ଦେଇଛନ୍ତି।
ବିଧାୟକ ନାୟକ କହିଛନ୍ତି ଯେ, ଏହା ସାଧାରଣ ଲୋକଙ୍କ ଯାତ୍ରା, ତେଣୁ ସମସ୍ତ କାର୍ଯ୍ୟ କମିଟିର ସଭାପତି, ସମ୍ପାଦକ ଓ ବରିଷ୍ଠ କର୍ମକର୍ତ୍ତାଙ୍କ ସହମତିରେ ହେବ। କୌଣସି ବ୍ୟକ୍ତିଗତ ନିଷ୍ପତ୍ତି ନିଆଯିବ ନାହିଁ। ଯାତ୍ରାରେ ସ୍ବଚ୍ଛତା ବଜାୟ ରଖିବା ପାଇଁ ଯାତ୍ରା ସରିବାର ୩୦ ଦିନ ମଧ୍ୟରେ ସମସ୍ତ ଆୟ-ବ୍ୟୟର ହିସାବ ସର୍ବସାଧାରଣରେ ଉପସ୍ଥାପନ କରାଯିବ ବୋଲି କାର୍ଯ୍ୟକାରୀ ସଭାପତି ବିଷ୍ଣୁ ପ୍ରସାଦ ପ୍ରଧାନ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଭଞ୍ଜନଗର ଠାକୁରାଣୀ ଯାତ୍ରା ପ୍ରତି ୩ ବର୍ଷରେ ଥରେ ଅନୁଷ୍ଠିତ ହୋଇଥାଏ। ଚଳିତ ବର୍ଷ ଏପ୍ରିଲ ୨୬, ୨୦୨୬ ଏହା ଆରମ୍ଭ ହେବାକୁ ଥିବା ବେଳେ ମେ’ ୨୦, ୨୦୨୬ ଏହା ଶେଷ ହେବ। ମେ ୧୯ ତାରିଖରେ ସିଂହବାହିନୀ ଯାତ୍ରା ଅନୁଷ୍ଠିତ ହେବ। ଏହାର ମୋଟ ଅବଧି ୨୫ ଦିନର ରହିବ।
ଏହି ଯାତ୍ରାରେ କବି ସମ୍ରାଟ ଉପେନ୍ଦ୍ର ଭଞ୍ଜଙ୍କ ଇଷ୍ଟଦେବୀ ବ୍ୟାଘ୍ର ଦେବୀଙ୍କୁ କୁଲାଡ଼ରୁ ଶଗଡ଼ରେ ବସାଇ ପ୍ରାୟ ୮ କିଲୋମିଟର ପର୍ଯ୍ୟନ୍ତ ଏକ ବିଶାଳ ଶୋଭାଯାତ୍ରାରେ ଅଣାଯିବ। ଏହାପରେ ଭଞ୍ଜନଗରର ଦେବୀ ଠାକୁରାଣୀଙ୍କୁ ନିମନ୍ତ୍ରଣ କରାଯାଇ ଅସ୍ଥାୟୀ ମଣ୍ଡପକୁ ଅଣାଯିବ। ପାରମ୍ପରିକ ନୃତ୍ୟ ଓ ଆତସବାଜିରେ ସହର ପ୍ରକମ୍ପିତ ହେବ।
ପୂର୍ବରୁ ମୁଖ୍ୟ ରାସ୍ତାରେ ସାଂସ୍କୃତିକ କାର୍ଯ୍ୟକ୍ରମ ଯୋଗୁଁ ଟ୍ରାଫିକ ସମସ୍ୟା ଦେଖାଦେଉଥିଲା। ଏଥର ପୁରୁଣା ଜେଲ ପରିସରରେ ଗାଡ଼ି ପାର୍କିଂ ଏବଂ ସାଂସ୍କୃତିକ କାର୍ଯ୍ୟକ୍ରମ ପାଇଁ ବ୍ୟବସ୍ଥା କରାଯାଇଛି, ଯାହାଦ୍ୱାରା ଯାତାୟାତ ବାଧାପ୍ରାପ୍ତ ହେବ ନାହିଁ। ଏହି ବୈଠକରେ ପୌରପାଳିକା ଅଧ୍ୟକ୍ଷ ତଥା ସାଧାରଣ ସମ୍ପାଦକ ଗୋପବନ୍ଧୁ ମହାପାତ୍ର, ଉପ-ସଭାପତି ବିନୟ କୁମାର ରଥ, ସମ୍ପାଦକ ସୁଧୀର ରଞ୍ଜନ ବେହେରା ଓ ସଂଗଠନ ସମ୍ପାଦକ ସୁଶାନ୍ତ ମହାପାତ୍ର, ମୁରଲୀ ପଣ୍ଡା, ଶାନ୍ତନୁ ଦାସ, ସନ୍ତୋଷ ତିଆଡି ପ୍ରମୁଖ ଉପସ୍ଥିତ ରହି ନିଜର ମତାମତ ରଖିଥିଲେ। ୩ ବର୍ଷ ପରେ ଯାତ୍ରା ହେଉଥିବାରୁ ଅଞ୍ଚଳବାସୀଙ୍କ ମଧ୍ୟରେ ଅଦମ୍ୟ ଉତ୍ସାହ ଦେଖାଦେଇଛି। କିଛି ନୂତନ କର୍ମକର୍ତ୍ତାଙ୍କୁ କମିଟିରେ ସାମିଲ କରାଯାଇଛି ।
