ଜଳନ୍ଧର,୧୭।୧୨: ଭାରତୀୟ ହକି ଅଧିନାୟକ ମନପ୍ରୀତ୍ ସିଂ ଦୀର୍ଘଦିନର ବାନ୍ଧବୀ ମାଲେସିଆର ଇଲି ନଜବା ସିଦ୍ଧିକିଙ୍କୁ ବିବାହ କରିଛନ୍ତି। ଗତ ୯ ବର୍ଷ ହେବ ଦୁହିଁଙ୍କ ମଧ୍ୟରେ ବନ୍ଧୁତା ଥିଲା ଓ ଉଭୟ ଡେଟିଂ କରିଆସୁଥିଲେ। ବୁଧବାର ସ୍ଥାନୀୟ ଗୁରୁ ତେଜ୍ ବାହାଦୁର ନଗରରେ ଏହି ବବାହ ସମ୍ପୂର୍ଣ୍ଣ ରୀତିନୀତି ଅନୁସାରେ ଅନୁଷ୍ଠିତ ହୋଇଛି। ପୂର୍ବରୁ ଟୋକିଓ ଅଲିମ୍ପିକ୍ସ ପରେ ଉଭୟେ ବିବାହ କରିବେ ବୋଲି କହି ଆସୁଥିଲେ। ତେବେ କୋଭିଡ୍-୧୯ କାରଣରୁ ଅଲିମ୍ପିକ୍ସ ଘୁଞ୍ଚିଯାଇଥିଲା। ଫଳରେ ବିବାହ ହୋଇପାରି ନ ଥିଲା ଓ ଏହାକୁ ଘୁଞ୍ଚାଇବାକୁ ପଡିଥିଲା।
ଜଳନ୍ଧରର ମିଠାପୁର ଗାଁରେ ମନପ୍ରୀତ୍ଙ୍କ ଘର। ବିବାହ ପରେ ଇଲିଙ୍କ ନାମ ପରିବର୍ତ୍ତନ କରାଯାଇ ନବପ୍ରୀତ୍ କୌର ରଖାଯାଇଛି। ୨୦୧୨ରେ ମାଲେସିଆରେ ଅନୁଷ୍ଠିତ ସୁଲତାନ ଆଜଲାନ ଶାହ କପ୍ ଖେଳିବା ଅବସରରେ ମନପ୍ରୀତ୍ଙ୍କ ସହ ଇଲିଙ୍କ ପରିଚୟ ହୋଇଥିଲା। ସେତେବେଳେ ମନପ୍ରୀତ୍ ଭାରତୀୟ ଜୁନିୟର ଦଳର ନେତୃତ୍ୱ ନେଉଥିଲେ। ହକି କାରଣରୁ ଧୀରେ ଧୀରେ ସମ୍ପର୍କ ପ୍ରେମ ଓ ପରେ ବିବାହର ରୂପ ନେଇଛି। କରୋନା କାରଣରୁ ବିବାହରେ ସୀମିତ ଲୋକଙ୍କୁ ନିମନ୍ତ୍ରଣ କରାଯାଇଥିଲା ଓ ସୁରକ୍ଷା ତଥା ନିରାପତ୍ତାର ବ୍ୟବସ୍ଥା କରାଯାଇଥିଲା। ମନପ୍ରୀତ୍ ଏପର୍ଯ୍ୟନ୍ତ ଭାରତ ପାଇଁ ୨୪୨ଟି ମ୍ୟାଚ ଖେଳି ୧୯ଟି ଗୋଲ ସ୍କୋର କରିଛନ୍ତି। ଅନ୍ତର୍ଜାତୀୟ ହକିରେ ସେ ଦୃଷ୍ଟାନ୍ତମୂଳକ ସଫଳତା ହାସଲ କରିଛନ୍ତି।
ଗତ ୯ ବର୍ଷ ଧରି ଆମେ ପରସ୍ପରକୁ ଜାଣିଛୁ ଓ ଆମ ମଧ୍ୟରେ ବନ୍ଧୁତା ରହିଆସିଛି। ବିବାହ କରି ବେଶ୍ ଖୁସି ଅଛି। ବାହାଘର ପୂର୍ବରୁ ଇଲି ମୋତେ ସମର୍ଥନ ଦେଇଆସୁଥିଲେ। ପରେ ମଧ୍ୟ ଏହି ସମର୍ଥନ ଜାରି ରହିବ। ଇଲି ଏବେ ଆମା ଗଁା ମିଠାପୁରରେ ମା’ଙ୍କ ପାଖରେ ରହିବେ। ଯଦି ସେ କିଛି ବ୍ୟବସାୟ କରିବାକୁ ଚାହାନ୍ତ ତା’ହେଲେ କରିପାରିବେ ବୋଲି ମନପ୍ରୀତ୍ କହିଛନ୍ତି। ଏବେ ଅଲିମ୍ପିକ୍ସ ପାଇଁ ପ୍ରସ୍ତୁତ କରୁଛି ଓ ଏହା ଉପରେ ମୋର ସମ୍ପୂର୍ଣ୍ଣ ଲକ୍ଷ୍ୟ ରହିବ। ଏବେ ଫିଟ୍ ନେଓ ଉପରେ ଧ୍ୟାନ ଦେଉଛି। ଅଲିମ୍ପିକ୍ସ ପୂର୍ବରୁ ଏକାଧିକ ଟୁର୍ନାମେଣ୍ଟ ଆୟୋଜନ ହେବ ଓ ଏଥିରେ ଫିଟ୍ନେସ୍ର ପ୍ରମାଣ ମିଳିବ। ଏବେ ଦଳ ଡିଫେନ୍ସ ଓ ଆଟାକ ଉପରେ ଅଧିକ ଧ୍ୟାନ ଦେଉଛି। ଅଲିମ୍ପିକ୍ସରେ ଭାରତ ଭଲ ପ୍ରଦର୍ଶନ କରିବ ବୋଲି ସେ ଅଶାପ୍ରକାଶ କରିଛନ୍ତି।
