କୋଲକାତା,୧୦।୧୨(ପି.ଟି.): ଇଣ୍ଡିଆନ ଫୁଟବଲ ଆସୋସିଏଶନ (ଆଇଏଫ୍ଏ) ଆନୁକୂଲ୍ୟରେ ଏଠାରେ ଚାଲିଥିବା ଆଇଏଫ୍ଏ ଶିଲ୍ଡର ୧୨୩ତମ ସଂସ୍କରଣରେ ବୁଧବାର ରିୟଲ କଶ୍ମୀର ଓ ୟୁନାଇଟେଡ ଏଫ୍ସି ସେମିଫାଇନାଲରେ ପ୍ରବେଶ କରିଛନ୍ତି। ରବିବାର ୨-୧ ଗୋଲରେ ପିୟରଲେସ୍ ଏଫ୍ସିକୁ ହରାଇବା ପରେ ରିୟଲ କଶ୍ମୀର ୩-୦ ଗୋଲରେ ଆର୍ଯ୍ୟନ କ୍ଲବକୁ ହରାଇବା ସହିତ ସେମିକୁ ଉଠିଛି। ରିୟଲ କଶ୍ମୀର ତରଫରୁ ମାସନ ରବର୍ଟସନ ୭୨, ଡାନିସ ଫାରୁକ ୮୨ ଓ ଲୁକ୍ମ୍ୟାନ ଇଞ୍ଜୁରି ଟାଇମର ତୃତୀୟ ମିନିଟ୍ରେ ଗୋଲ ସ୍କୋର କରିଥିଲେ। ତେବେ ଆର୍ଯ୍ୟନ ତରଫରୁ ଗୋଟିଏ ହେଲେ ବି ଗୋଲ ସ୍କୋର କରାଯାଇପାରି ନ ଥିଲା।
ସେହିପରି ୟୁନାଇଟେଡ ଏଫ୍ସି ତା’ର ପ୍ରଥମ ମ୍ୟାଚରେ ଗୋଗୁଳମ କେରଳକୁ ହରାଇବା ପରେ ବିବିଏସ୍ ସ୍ପୋର୍ଟିଂ କ୍ଲବ୍କୁ ୨-୧ ଗୋଲରେ ପରାସ୍ତ କରିଛି। ସେହିପରି ବିବିଏସ୍ ବିପକ୍ଷରେ ୟୁନାଇଟେଡ ତରଫରୁ ସୌରଭ ଦାସଗୁପ୍ତା ୨୦, ଜଗନ୍ନାଥ ଓରାଓ ୩୧ତମ ମିନିଟ୍ ଗୋଲ ଦେଇଥିଲେ। ଅନ୍ୟପଟେ ବିବିଏସ୍ ତରଫରୁ ସାଫିକ୍ ଅଲି ଗେନ୍ ୪୯ତମ ମିନିଟ୍ରେ ଗୋଟିଏ ଗୋଲ ସ୍କୋର କରିଥିଲେ।
