ଭୁବନେଶ୍ୱର,୨।୧୨(ବ୍ୟୁରୋ): ସାମ୍ଭାବ୍ୟ ବାତ୍ୟା ‘ଜଓ୍ବାଦ’କୁ ନେଇ ଭାରତୀୟ ପାଣିପାଗ ବିଭାଗ (ଆଇଏମ୍ଡି) ପୂର୍ବାନୁମାନ କରି ସାରିଛି। ଫଳରେ ରାଜ୍ୟ ସରକାର ବାତ୍ୟା ମୁକାବିଳା ନେଇ ପ୍ରସ୍ତୁିତ ଆରମ୍ଭ କରିଛନ୍ତି। ଏପରିକି ୨୪ ଘଣ୍ଟିଆ ବିଦ୍ୟୁତ୍ ଯୋଗାଣ ନିଶ୍ଚିତ କରିବା ଲାଗି ଟିପି ସଦର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ୍ ଲିମିଟେଡ୍ (ଚିପିଏସ୍ଓଡିଏଲ୍)ର ବିଜ୍ନେସ୍ କଣ୍ଚିନ୍ୟୁଇଟି ଆଣ୍ଡ୍ ଡିଜାଷ୍ଟର ମ୍ୟାନେଜମେଣ୍ଟ (ବିସିଡିଏମ୍) ପ୍ରସ୍ତୁତ ରହିଛି।
ବାତ୍ୟାର ପ୍ରତିକ୍ରିୟା ଯାଞ୍ଚ କରିବା ଲାଗି ଏକ ମକ୍ ଡ୍ରିଲ୍ ଆୟୋଜନ କରାଯାଇଛି। ଟିପିଏସ୍ଓଡିଏଲ୍ ପକ୍ଷରୁ ୨୪ ଘଣ୍ଟିଆ ବିଦ୍ୟୁତ୍ ଯୋଗାଣ ନିଶ୍ଚିତ କରିବା ଲାଗି ଏକ ଟିମ୍ ଗଠନ କରାଯାଇଛି। ବିଦ୍ୟୁତ୍ ଯୋଗାଣରେ ବାତ୍ୟା ବାଧା ଦେଲେ ସଙ୍ଗେସଙ୍ଗେ କାମ ହେବ। କୌଣସି ଜରୁରୀ ପରିସ୍ଥିତିରେ ଗ୍ରାହକ ପାୱାର୍ ସିଷ୍ଟମ୍ କଣ୍ଟ୍ରୋଲ୍ ସେଣ୍ଟର୍ (ପିଏସସିସି)କୁ ୯୪୩୭୪ ୮୪୮୬୮ରେ କିମ୍ବା ୨୪ ଘଣ୍ଚିଆ କଲ୍ ସେଣ୍ଟର ନମ୍ବର ୧୮୦୦୩୪୫୬୭୯କୁ ଫୋନ କରି ସମସ୍ୟା ଜଣାଇପାରିବେ ବୋଲି ଚିପିଏସ୍ଓଡିଏଲ୍ ପକ୍ଷରୁ କୁହାଯାଇଛି।
ଟିପିଏସ୍ଓଡିଏଲ୍ ସିଇଓ ଅରବିନ୍ଦ୍ ସିଂହ କହିଛନ୍ତି, କଠିନ ପରିସ୍ଥତିରେ ନିରବଚ୍ଛିନ୍ନ ବିଦ୍ୟୁତ୍ ଯୋଗାଣକୁ ନିଶ୍ଚିତ କରିବା ଲାଗି ଆବଶ୍ୟକ ପଦକ୍ଷେପ ନିଆଯିବ। ସାମୁଦ୍ରିକ ବାତ୍ୟା ଜୱାଦ୍ ସମୟରେ ଯେକୌଣସି ପ୍ରକାରର ଦୁର୍ଘଟଣାରୁ ବର୍ତ୍ତିବା ଲାଗି ଆବଶ୍ୟକ ସୁରକ୍ଷା ପଦକ୍ଷେପ ପାଳନ କରିବାକୁ ସାଧାରଣଙ୍କୁ ସେ ନିବେଦନ କରିଛନ୍ତି।
