ନୂଆଦିଲ୍ଲୀ,୨୩।୮(ପି.ଟି.): ଘରୋଇ କ୍ରିକେଟର ଆରମ୍ଭ ନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ମୁହଁ ଖୋଲିଛନ୍ତି। କୋଭିଡ୍-୧୯ ମହାମାରୀର ପ୍ରକୋପ ଜାରି ରହିଥିବା ବେଳେ ପରସ୍ଥିତି ସୁଧୁରିବା ଉପରେ ସବୁକିଛି ନିର୍ଭର କରୁଛି। ପରିସ୍ଥିତିରେ ଉନ୍ନତି ଆସିଲେ ଦେଶରେ ଘରୋଇ କ୍ରିକେଟ ଆରମ୍ଭ ହେବ ବୋଲି ଗାଙ୍ଗୁଲି ସବୁ ରାଜ୍ୟ ଆସୋସିଏଶନକୁ ଆଶ୍ୱାସନା ଦେଇଛନ୍ତି। ତେବେ ଘରୋଇ ସେସନ କେବେ ଆରମ୍ଭ ହେବ ସେ କୌଣସି ନିର୍ଦ୍ଦିଷ୍ଟ ତାରିଖ ନେଇ ସ୍ପଷ୍ଟ କରିନାହାନ୍ତି।
ସାଧାରଣତଃ ଘରୋଇ ସେସନ ଅଗଷ୍ଟରେ ଆରମ୍ଭ ହୋଇଥାଏ। ତେକେ କୋଭିଡ୍-୧୯ ପାଇଁ ଘରୋଇ କ୍ୟାଲେଣ୍ଡରକୁ ଗୁରୁତର ଭାବେ ପ୍ରଭାବିତ କରିଛି। ତେଣୁ ବିସିସିଆଇ ନିର୍ଦ୍ଦିଷ୍ଟ ତାରିଖ ନେଇ କିଛି ସ୍ପଷ୍ଟ କରିନାହିଁ ଓ ଗାଙ୍ଗୁଲି ଏ ନେଇ ଚିଠି ଲେଖି ସବୁ ଆସୋସିଏଶନକୁ ଅବଗତ କରାଇଛନ୍ତି।
ନଭେମ୍ବର ତୃତୀୟ ସପ୍ତାହରେ ସୟଦ ମୁସ୍ତାକ ଅଲି ଟି୨୦ ଟୁର୍ନାମେଣ୍ଟ ସହ ଘରୋଇ ସେସନ ଆରମ୍ଭ ହେବ ବୋଲି ଆଶା କରାଯାଉଛି। ତେବେ ଯେବେ ପରିସ୍ଥିତି ଅନୁକୂଳ ହେବ ସେତେବେଳେ ଘରୋଇ ସେସନ ଆରମ୍ଭ କରିବାକୁ ବିସିସିଆଇ ସବୁ ପ୍ରକାର ପ୍ରୟାସ କରିବ। ଖେଳାଳି, ଘରୋଇ କ୍ରିକେଟ ସହ ଜଡିତ ସବୁ ଲୋକଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ବୋର୍ଡ ପ୍ରାଧାନ୍ୟ ଦେଉଛି। କ୍ରମାଗତ ଭାବେ ବୋର୍ଡ ପରସ୍ଥିତି ଉପରେ ନଜର ରଖିଛି ବୋଲି ଗାଙ୍ଗୁଲି ରାଜ୍ୟ ଆସୋସିଏଶନଗୁଡିକର ସଭାପତି ଓ ସମ୍ପାଦକମାନଙ୍କୁ ଚିଠି ଲେଖି ଉଲ୍ଲେଖ କରିଛନ୍ତି। ଭବିଷ୍ୟତରେ କି ନିଷ୍ପତ୍ତି ନିଆଯିବ ସେ ନେଇ ସବୁ ସଦସ୍ୟଙ୍କୁ ସୂଚନା ଦିଆଯିବ। ତେବେ ଘରୋଇ କ୍ରିକେଟ ଆରମ୍ଭ କରିବାକୁ ପୂର୍ବରୁ ସମସ୍ତଙ୍କ ପରାମର୍ଶ ନିଆଯିବ। ଆଗାମୀ କେତେ ମାସରେ କୋଭିଡ୍-୧୯ ପରିସ୍ଥିତିରେ ସୁଧାର ଆସିବ ଓ ଘରୋଇ କ୍ରିକେଟ ଏକ ସୁରକ୍ଷିତ ପରିବେଶରେ ଆରମ୍ଭ ହେବ ବୋଲି ବିସିସିଆଇ ଆଶା ପ୍ରକାଶ କରିଛି।
ପୁଣି ଭାରତର ଫ୍ୟୁଚର ଟୁର ପ୍ରୋଗ୍ରାମ୍ ନେଇ ମଧ୍ୟ ଗାଙ୍ଗୁଲି ସଦସ୍ୟମାନଙ୍କୁ ସୂଚନା ଦେଇଛନ୍ତି। ଚଳିତ ବର୍ଷ ଶେଷ ଆଡକୁ ଭାରତ ଅଷ୍ଟ୍ରେଲିଆ ଗସ୍ତ କରିବାର କାର୍ଯ୍ୟକ୍ରମ ରହିଛି। ସେହିପରି ୨୦୨୧ ପ୍ରାରମ୍ଭରେ ଇଂଲଣ୍ଡ ଭାରତ ଗସ୍ତରେ ଆସିବାର ମଧ୍ୟ କାର୍ଯ୍ୟକ୍ରମ ରହିଛି। ଭାରତ ମଧ୍ୟ ଆସନ୍ତା ବର୍ଷ ଟି୨୦ ବିଶ୍ୱକପ୍ ଆୟୋଜନ କରିବ। ସେହିପରି ୨୦୨୩ରେ ଭାରତ ଦିନିକିଆ ବିଶ୍ୱକପ୍ ମଧ୍ୟ ଆୟୋଜନ କରିବ ଓ ଫ୍ୟୁଚର ଟୁର ପ୍ରୋଗ୍ରାମ ପାଇଁ ଭାରତ ପ୍ରତିବଦ୍ଧ ରହିବ ବୋଲି ଗାଙ୍ଗୁଲି ସ୍ପଷ୍ଟ କରିଛନ୍ତି। ଆଗାମୀ ଡିସେମ୍ବରରେ ଭାରତୀୟ ଦଳ ଅଷ୍ଟ୍ରେଲିଆ ଗସ୍ତ କରି ସିରିଜ ଖେଳିବ। ଏହାପରେ ଭାରତୀୟ ଦଳ ସ୍ବଦେଶ ପ୍ରତ୍ୟାବର୍ତ୍ତନ କରି ଫେବୃୟାରୀରେ ଇଂଲଣ୍ଡ ବିପକ୍ଷରେ ସିରିଜ ଖେଳିବା ଆରମ୍ଭ କରିବ ଓ ଏପ୍ରିଲ୍ରେ ୨୦୨୧ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆରମ୍ଭ ହେବ। ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଟି୨୦ ବିଶ୍ୱକପ୍ ୨୦୨୧ ଓ ୫୦ ଓଭର ବିଶିଷ୍ଟ ଆଇସିସି କ୍ରିକେଟ ବିଶ୍ୱକପ୍ ୨୦୨୩ରେ ଅୟୋଜନ କରିବାକୁ ଭାରତ ବଦ୍ଧପରିକର ବୋଲି ଗାଙ୍ଗୁଲି କହିଛନ୍ତି। ଅନ୍ୟପକ୍ଷେ ଭାରତୀୟ ମହିଳା ଦଳର ଟୁର ନେଇ ଆଲୋଚନା ଜାରି ରହିଛି। ତେବେ ଏ ସଂକ୍ରାନ୍ତରେ ସେ ବିସ୍ତୃତ ଭାବେ ଅଧିକ କିଛି କହିନାହାନ୍ତି।
