ନୂଆଦିଲ୍ଲୀ,୨୧।୨ : କୋଇଲା ଲେଭି ମନିଲଣ୍ଡରିଂ ମାମଲାର ତଦନ୍ତ କରୁଥିବା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ସୋମବାର ଛତିଶଗଡ଼ର କେତେଜଣ କଂଗ୍ରେସ ନେତାଙ୍କ ଘରେ ଚଢ଼ାଉ କରିଛି। ଛତିଶଗଡ଼ ରାଜଧାନୀ ରାୟପୁରରେ ଆସନ୍ତା ୨୪ରୁ କଂଗ୍ରେସର ୩ ଦିନିଆ ମହାସମ୍ମିଳନୀ ଅନୁଷ୍ଠିତ ହେବାକୁ ଯାଉଥିବାବେଳେ ଏହାର ୩ ଦିନ ପୂର୍ବରୁ ଇଡି ଚଢ଼ାଉକୁ ନେଇ ଦଳ ତୀବ୍ର ପ୍ରତିକ୍ରିୟା ପ୍ରକାଶ କରିଛି। କେନ୍ଦ୍ର ସରକାର ପ୍ରତିଶୋଧ ଓ ଉତ୍ପୀଡ଼ନର ତୃତୀୟ ଗ୍ରେଡ୍ ରାଜନୀତି କରୁଥିବା କଂଗ୍ରେସ ଅଭିଯୋଗ କରିଛି। ଏହା ଅମୃତ କାଳ ନୁହେଁ ଅଘୋଷିତ ଏମର୍ଜେନ୍ସି ବୋଲି କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ଏକ ଖବରଦାତା ସମ୍ମିଳନୀରେ କହିଛନ୍ତି। ସେ ପ୍ରବର୍ତ୍ତନ ନିର୍ଦ୍ଦେଶାଳୟକୁ ଗଣତନ୍ତ୍ରର ସଂହାରକାରୀ ବୋଲି ଅଭିହିତ କରିଛନ୍ତି।
କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଇଡି କାର୍ଯ୍ୟାନୁଷ୍ଠାନକୁ ନିନ୍ଦା କରିଛନ୍ତି। ଗତ ୯ ବର୍ଷ ମଧ୍ୟରେ ଇଡି କରିଥିବା ଚଢ଼ାଉ ମଧ୍ୟରୁ ୯୫ ପ୍ରତିଶତ ବିରୋଧୀ ଦଳ ନେତାମାନଙ୍କ ବିରୋଧରେ ହୋଇଥିବାବେଳେ ସେମାନଙ୍କ ମଧ୍ୟରୁ ଅଧିକାଂଶ କଂଗ୍ରେସ ନେତା। ମୋଦି ସରକାର ଇଡିର ଦୁରୁପଯୋଗ କରି ରାୟପୁର ଅଧିବେଶନ ପୂର୍ବରୁ ଭାଜପାର ଭୀରୁତାକୁ ପ୍ରଦର୍ଶିତ କରିଥିବା ଖାର୍ଗେ କହିଛନ୍ତି। ଅନ୍ୟପକ୍ଷରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ବିରୋଧୀ ଦଳର ଅଭିଯୋଗକୁ ଖଣ୍ଡନ କରିଛନ୍ତି। ଦୁର୍ନୀତି କାରଣରୁ କଂଗ୍ରେସ କ୍ଷମତାରୁ ହଟିଥିଲା। ଏହି ଦଳ ଦୁର୍ନୀତି ପ୍ରସଙ୍ଗରେ କହିବା ଠିକ୍ ନୁହେଁ ବୋଲି ନିର୍ମଳା କହିଛନ୍ତି।
