ନୂଆଦିଲ୍ଲୀ,୯।୧୨(ପି.ଟି.): ଦେଶର ଅନ୍ୟତମ ମର୍ଯ୍ୟାଦାସମ୍ପନ୍ନ ଫୁଟବଲ ଟୁର୍ନାମେଣ୍ଟ ଆଇ- ଲିଗ୍ ଏଥର କୋଲକାତାରେ ଜାନୁୟାରୀ ୯ ତାରିଖରୁ ଆରମ୍ଭ ହେବ। ପଦାର୍ପଣ କରିବାକୁ ଥିବା ନୂଆ ଦଳ ସୁଡେଭା ଦିଲ୍ଲୀ ଏଫ୍ସି ଓ ମହମ୍ମଡାନ ସ୍ପୋର୍ଟିଂ କ୍ଲବ ଉଦ୍ଘାଟନୀ ମ୍ୟାଚ୍ରେ ମୁହଁାମୁହିଁ ହେବେ। ଅଲ୍ ଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ଆଇ- ଲିଗ୍ର କାର୍ଯ୍ୟସୂଚୀ ମଙ୍ଗଳବାର ପ୍ରକାଶ କରିଛି। କୋଭିଡ୍ କାରଣରୁ ପୂରା ଟୁର୍ନାମେଣ୍ଟ ରୁଦ୍ଧଦ୍ୱାରରେ ଅର୍ଥାତ୍ ଫାଙ୍କା ଷ୍ଟାଡିୟମରେ ଖେଳାଯିବ।
କୋଲକାତାର ୩ଟି ଭେନ୍ୟୁରେ ମ୍ୟାଚ୍ଗୁଡିକ ଖେଳାଯିବ। ବିବେକାନନ୍ଦ ଯୁବା ଭାରତୀ ଷ୍ଟାଡିୟମ, କଲ୍ୟାଣୀ ମ୍ୟୁନିସିପାଲ ଷ୍ଟାଡିୟମ ଓ କିଶୋର ଭାରତୀ କ୍ରୀଡ଼ାଙ୍ଗନରେ ମ୍ୟାଚ୍ ଆୟୋଜନ ହେବ। ବିବେକାନନ୍ଦ ଷ୍ଟାଡିୟମରେ ସୁଡେଭା ଦିଲ୍ଲୀ ଓ ମହମ୍ମଡାନ ଅପରାହ୍ନ ୨ଟାରେ ପ୍ରଥମ ମୁକାବିଲାରେ ଅବତୀର୍ଣ୍ଣ ହେବେ। ଏହାପରେ ପଞ୍ଜାବ ଏଫ୍ସି- ଆଇଜଲ, ଗୋକୁଳମ କେରଳ- ଚେନ୍ନାଇ ସିଟି ଏଫ୍ସି ମ୍ୟାଚ୍ ଯଥାକ୍ରମେ ଅପରାହ୍ନ ୪ ଓ ସନ୍ଧ୍ୟା ୭ଟାରେ ଖେଳାଯିବ। ଏହି ଦୁଇଟି ମ୍ୟାଚ୍ କଲ୍ୟାଣୀ ମ୍ୟୁନିସିପାଲ ଷ୍ଟାଡିୟମରେ ଆୟୋଜନ ହେବ। ୧୧ଟି ଦଳକୁ ନେଇ ଆୟୋଜନ ହେବାକୁ ଥିବା ଏହି ଟୁର୍ନାମେଣ୍ଟ ପ୍ରଥମ ହାଫ୍ର କାର୍ଯ୍ୟସୂଚୀ ପ୍ରକାଶିତ ହୋଇଛି। ଫେବୃୟାରୀ ୨୪ ସୁଦ୍ଧା ପ୍ରଥମ ୧୦ ରାଉଣ୍ଡର ମ୍ୟାଚ ଖେଳାଯିବ।
ସବୁ ଦଳର ଖେଳାଳି, ଅଫିସିଆଲ, ରେଫରି ଓ ଅନ୍ୟ ଅଫିସିଆଲମାନେ ବାୟୋ ବବଲ୍ରେ ରହିବେ ବୋଲି ଏଆଇଏଫ୍ଏଫ୍ ମୁଖ୍ୟ କାର୍ଯ୍ୟନିର୍ବାହୀ ସୁନନ୍ଦା ଧର କହିଛନ୍ତି। ଏହା ଏକ ଭିନ୍ନ ପ୍ରକାର ଅଭିଜ୍ଞତା ଆଣିବ ବୋଲି ସେ କହିଛନ୍ତି। ତେବେ କରୋନା ଭାଇରସ୍ କାରଣରୁ ପରିସ୍ଥିତିକୁ ଦୃଷ୍ଟିରେ ରଖି ଦର୍ଶକମାନଙ୍କୁ ଷ୍ଟାଡିୟମ ଭିତରକୁ ଯିବାର ଅନୁମତି ଦିଆଯାଇ ନାହିଁ। ମହାମାରୀ କାରଣରୁ ଲିଗ୍ର ଗତ ସଂସ୍କରଣକୁ ସ୍ଥଗିତ ରଖାଯାଇଥିଲା। ତେବେ ଚଳିତ ବର୍ଷ ଅକ୍ଟୋବରରେ ଆଇ- ଲିଗ୍ କ୍ୱାଲିଫାୟର ଆୟୋଜନ କରାଯାଇଥିଲା ଓ ଏଥିସହିତ ଅବଶ୍ୟ ଫୁଟବଲ କାର୍ଯ୍ୟକଳାପ ଆରମ୍ଭ ହୋଇଥିଲା।
