ଚଣ୍ଡିଗଡ଼, ୧୩।୧୨: ସ୍ତ୍ରୀଙ୍କ ବିନା ଅନୁମତିରେ ସ୍ବାମୀ ତାଙ୍କର କଲ୍ ରେକର୍ଡ କରିପାରିବେନି। ଏଭଳି କରିବା ସ୍ତ୍ରୀଙ୍କ ଗୋପନୀୟ ଅଧିକାରର ଉଲ୍ଲଂଘନ ହୋଇଥାଏ ବୋଲି ପଞ୍ଜାବ ଏବଂ ହରିୟାଣା ହାଇକୋର୍ଟ ସ୍ପଷ୍ଟ କରିଛନ୍ତି। ଏକ ମାମଲାର ବିଚାର ସମୟରେ କୋର୍ଟ ଦାଖଲ କରାଯାଇଥିବା ରେକର୍ଡିଂକୁ ପ୍ରମାଣ ଭାବରେ ଗ୍ରହଣ କରିବା ଲାଗି ଫ୍ୟାମିଲି କୋର୍ଟ ପକ୍ଷରୁ ପ୍ରଦାନ କରାଯାଇଥିବା ନିଷ୍ପତ୍ତିକୁ ଏଡ଼ାଇ ଦେଇଛନ୍ତି। ଏଭଳି ରେକର୍ଡିଂ ଗୋପନୀୟ ଅଧିକାରର ଉଲ୍ଲଂଘନ ହୋଇଥିବାରୁ ଏହା ଗ୍ରହଣୀୟ ନୁହେଁ ବୋଲି କୋର୍ଟ କହିଛନ୍ତି।
ବିଚାରପତି ଲିସା ଗିଲ୍ଙ୍କ ନେତୃତ୍ୱରେ ଗଠିତ ଖଣ୍ଡପୀଠ ହିନ୍ଦୁ ବିବାହ ଆକ୍ଟ ୧୯୫୫ ଅନ୍ତର୍ଗତ ଧାରା ୧୩ ଅନୁସାରେ ଏକ ଛାଡ଼ପତ୍ର ମାମଲାର ବିଚାର ସମୟରେ ଏଭଳି ରାୟ ଦେଇଛନ୍ତିି।
ପଞ୍ଜାବ ଏବଂ ହରିୟାଣା ହାଇକୋର୍ଟରେ ଏକ ପିଟିଶନ ଦାଖଲ କରିଥିବା ଜଣେ ମହିଳା ଉଲ୍ଲେଖ କରିଛନ୍ତି ଯେ,ଦୀର୍ଘ ଦିନ ଧରି ସ୍ବାମୀଙ୍କ ସହିତ ତାଙ୍କର ବିବାଦ ଲାଗି ରହିଛି। ଏହି ବିବାଦ ଯୋଗୁଁ ସ୍ବାମୀ ୨୦୧୭ରେ ଭଟିଣ୍ଡା ଫ୍ୟାମିଲି କୋର୍ଟରେ ଛାଡପତ୍ର ପାଇଁ ଆବେଦନ କରିଥିଲେ। ସ୍ବାମୀ ଆମ ଦୁହଁଙ୍କ ମଧ୍ୟରେ ହୋଇଥିବା ଫୋନ୍ କଥାବାର୍ତ୍ତାର ରେକର୍ଡିଂକୁ ପ୍ରମାଣ ଭାବରେ ଉପସ୍ଥାପନ କରିଥିଲେ। ଫ୍ୟାମିଲି କୋର୍ଟ ମୋବାଇଲ ଫୋନରେ ରେକର୍ଡ ହୋଇଥିବା କଲକୁ ପ୍ରମାଣ ଭାବରେ ଗ୍ରହଣ କରିଛନ୍ତି। ଯାହା ନିୟମ ଅନୁଯାୟୀ ଠିକ ନୁହେଁ ବୋଲି ମହିଳା ଜଣଙ୍କ ଆବେଦନ ପତ୍ରରେ ଦର୍ଶାଇଛନ୍ତି।
ଏହି ମାମଲାର ଶୁଣାଣି କରି ହାଇକୋର୍ଟ ଆଶ୍ଚର୍ଯ୍ୟ ପ୍ରକଟ କରିଛନ୍ତି ଯେ ଜଣେ ବ୍ୟକ୍ତି କିପରି ବ୍ୟକ୍ତିଗତ ଗୋପନୀୟତା ଅଧିକାରକୁ ଉଲ୍ଲଂଘନ କରିପାରିବେ। କୌଣସି ସ୍ବାମୀ ବିନା ଅନୁମତିରେ ତାଙ୍କ ସ୍ତ୍ରୀ ସହିତ ହେଉଥିବା ଫୋନ ବାର୍ତ୍ତାଳାପକୁ ରେକର୍ଡ କରିପାରିବେ ନାହିଁ। ଯଦି ସ୍ବାମୀ ଏହା କରନ୍ତି, ତେବେ ଏହା ଗୋପନୀୟତା ଅଧିକାରର ଉଲ୍ଲଂଘନ ବୋଲି ବିବେଚନା କରାଯିବ। ଫ୍ୟାମିଲି କୋର୍ଟରେ ଉପସ୍ଥାପିତ ସ୍ବାମୀଙ୍କ ପ୍ରମାଣକୁ ହାଇକୋର୍ଟ ଗ୍ରହଣ କରିବାକୁ ମନା କରିଛନ୍ତି।
ହାଇକୋର୍ଟ କହିଛନ୍ତି ଯେ, ଏପରି ବାର୍ତ୍ତାଳାପ, ଯାହା ବିଷୟରେ ଅନ୍ୟ ସାଥୀ ମଧ୍ୟ ସଚେତନ ନୁହଁନ୍ତି, ଏହାକୁ ପ୍ରମାଣ ରୂପେ ଗ୍ରହଣ କରାଯାଇପାରିବ ନାହିଁ। ଭଟିଣ୍ଡା ଫ୍ୟାମିଲି କୋର୍ଟଙ୍କ ନିଷ୍ପତ୍ତିକୁ ହାଇକୋର୍ଟ ପ୍ରତ୍ୟାଖାନ କରିଦେଇଛନ୍ତି ଏବଂ କଲ ରେକର୍ଡିଂକୁ ସମଗ୍ର ମାମଲାରେ ପ୍ରମାଣ ଭାବରେ ଅନ୍ତର୍ଭୁକ୍ତ ନ କରିବାକୁ ନିର୍ଦ୍ଦେଶ ଦେଇଛନ୍ତି। ଏଥିସହ ହାଇକୋର୍ଟ ଛାଡପତ୍ର ଆବେଦନ ଉପରେ ୬ ମାସ ମଧ୍ୟରେ ନିଷ୍ପତ୍ତି ନେବାକୁ ଫ୍ୟାମିଲି କୋର୍ଟଙ୍କୁ ନିର୍ଦ୍ଦେଶ ଦେଇଛନ୍ତି।
