ବୌଦ୍ଧ,୩୦।୬(ସ୍ବ.ପ୍ର.): ଜଙ୍ଗଲକୁ ଶିକାର କରିବାକୁ ଯାଇଥିବା ବୌଦ୍ଧ ଜିଲା ହରଭଙ୍ଗା ବ୍ଲକ କାନପୁର ଗ୍ରାମର ସଞ୍ଜୀବ ଭୋଇଙ୍କର ଅନ୍ୟ ଜଣେ ଶିକାରୀଙ୍କ ଗୁଳିରେ ମୃତ୍ୟୁ ଘଟିଛି। ଦୁଇଦିନ ପରେ ବୁଧବାର ରାତିରେ ଘଟଣା ଜଣାପଡ଼ିଛି। ପରେ ପୋଲିସ ମୃତଦେହ ଜବତ କରିଛି। ସେହି ଗ୍ରାମର ଶମ୍ଭୁନାଥ ଭୋଇ (୨୬)ଙ୍କୁ ପୋଲିସ ଅଟକ ରଖି ପଚରାଉଚରା କରୁଛି।
ସଞ୍ଜୀବ ଓ ଶମ୍ଭୁନାଥ ସୋମବାର ଗାଁ ନିକଟସ୍ଥ ଜିରାଡ଼ ଜଙ୍ଗଲକୁ ଶିକାର କରିବାକୁ ଯାଇଥିଲେ। ମାତ୍ର ଶିକାର ସମୟରେ କୌଣସି କାରଣରୁ ସଞ୍ଜୀବଙ୍କ ଦେହରେ ଗୁଳି ବାଜିଥିଲା। ଗୁଳି ବାଜିବା ପରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା। ଭୟରେ ଶମ୍ଭୁନାଥ ମୃତଦେହକୁ କିଛିଦୂରରେ ପିଙ୍ଗିଦେଇ ଘରକୁ ପଳାଇ ଆସିଥିଲେ। ସଞ୍ଜୀବ ଘରକୁ ନ ଫେରିବାରୁ ପରିବାର ଲୋକେ ଦୁଇଦିନ ଦରି ଖୋଜାଖୋଜି କରିବା ପରେ ନ ପାଇ ଶେଷରେ ବୁଧବାର ପୁରୁଣାକଟକ ଥାନାର ଦ୍ୱାରସ୍ଥ ହୋଇଥିଲେ। ପରେ ପୋଲିସ ଘଟଣାକୁ ଗୁରୁତ୍ୱ ଦେଇ ତଦନ୍ତ ଆରମ୍ଭ କରିଥିଲା। ଶିକାର କରିବାକୁ ଯାଇଥିବା ଅନ୍ୟ ଶିକାରୀ ଶମ୍ଭୁନାଥଙ୍କୁ ପଚରାଉଚରା କରାଯାଇଥିଲା। ଜଙ୍ଗଲରେ ଶିକାର ସମୟରେ ଗୁଳି ବାଜି ମୃତ୍ୟୁ ହୋଇଥିବା ଶମ୍ଭୁନାଥ ସ୍ବୀକାର କରିବା ସହ ମୃତଦେହ ପଡ଼ିଥିବା ସ୍ଥାନ ନେଇ ଦେଖାଇଥିଲେ। ପୋଲିସ ବୁଧବାର ରାତିରେ ଜଙ୍ଗଲକୁ ଯାଇ ମୃତଦେହ ଜବତ କରିବା ସହ ବ୍ୟବଚ୍ଛେଦ ଲାଗି ବୌଦ୍ଧ ମେଡିକାଲ ପଠାଇଥିଲା। ଏନେଇ ପୁରୁଣାକଟକ ଥାନାରେ ପୋଲିସ ଏକ ମାମଲା (ନଂ.୮୮/୨୨) ରୁଜୁକରି ଶମ୍ଭୁନାଥଙ୍କୁ ଅଧିକ ପଚରାଉଚରା ଚଳାଇଛି।
